Премиерот Димитар Ковачевски заедно со премиерот на Република Албанија, Еди Рама, имаше заедничка средба со претседателот на Украина, Володимир Зеленски. Ковачевски беше придружуван од заменик-претседателот на Владата на Република Северна Македонија, задолжен за економски прашања, координација со економските ресори и инвестиции, Фатмир Битиќи а средбата се одржа на маргините на вториот самит на Европската политичка заедница во Кишинев.

Тој ја истакна силната поддршка што Северна Македонија ѝ ја дава на Украина од почетокот на воената агресија од Русија врз Украина во февруари минатата година. „Северна Македонија ја осуди бруталната воена агресија што Русија ја врши врз независна и суверена Украина. Го подржуваме суверенитетот и територијалниот интегритет на Украина и нејзиното право да го трасира самостојно својот пат. Обезбедивме и ќе продолжиме да обезбедуваме поддршка во секоја форма што на Украина ѝ е потребна“, истакна, меѓу другото, премиерот Ковачевски.

Претседателот на Украина, Володимир Зеленски, се заблагодари за поддршката што украинскиот народ ја добива од Северна Македонија и истакна дека таа доаѓа во клучни моменти. „Не правевте калкулации, бевте покрај нас од првиот ден и украинскиот народ и ние го цениме тоа“.

Премиерот Ковачевски потсети дека Северна Македонија е дел од основачката група за формирање посебен меѓународен суд за кривичните дела од агресијата, со што јасно се позициониравме и овој пат на вистинската страна на историјата. Украина е меѓу приоритетите при претседавањето на Северна Македонија со ОБСЕ, воедно Северна Македонија ја подржува евро-атлантската интеграција на Украина и посветеноста на политиката на отворени врати на НАТО.

Премиерот Димитар Ковачевски денеска во Братислава се сретна со претседателот на Франција, Емануел Макрон. На средбата присуствуваше и министерот за надворешни работи Бујар Османи.

Премиерот му се заблагодари на францускиот претседател за неговиот личен ангажман во процесот на проширување на ЕУ и интеграцијата на Северна Македонија во Унијата.

Соговорниците се согласија дека не смее да има одложување на процесот на евроинтеграции, и затоа, и овој пат нема да отсуствува поддршката од Франција и меѓународната заедница во натамошните етапи и предизвици на патот кон членство во ЕУ.

Претседателот Макрон ја поздрави одлучноста на Владата да работи на реализирање на европската агенда и потенцира дека на тој пат ќе продолжи да има силна и гласна поддршка на Франција. Ковачевски и Макрон се согласија дека сега е момент да се направи јасен исчекор во пристапниот пат и да се овозможи успешно интегрирање на Северна Македонија во ЕУ.

Министерот за надворешни работи Бујар Османи во рамките на учеството на безбедносниот форум на „Глобсек“ во Братислава се сретна со министерката за Европа и клима на Германија, Ана Лирман.

Во фокус на разговорите беше нашето европско досие, при што Османи брифира за претстојниот процес на донесување на уставните измени, со цел отворање на првиот кластер од пристапните преговори и во овој контекст,се заблагодари за цврстата германска поддршка.

Османи ја запозна соговорничката со концептот „Повеќе интеграција пред членство во ЕУ“, со што, како што истакна, „периодот до полноправно членство би се искористил од земјите од регионот, од една страна, а од друга, би се додал повеќе кредибилитет на пристапниот процес“.

„Верувам дека се реалистични нашите барања за постепен пристап до фондовите, политиките и заедничкиот пазар на Унијата, со цел нашите државјани да ги чувствуваат придобивките од евроинтеграцијата порано. Со ова евроскептицизмот во раст би го трансформирале во заемна доверба, со побрзо темпо при реализацијата на реформите во нашата држава“, рече Османи.

Османи и Лирман разменија мислења и за актуелните случувања на северот на Косово, за итната потреба од деескалација на состојбите и враќање на дијалогот, кој треба да обезбеди одржливи решенија.