Надворешна политика
Воена делегација на националната гарда на Вермонт примена од началникот на ГШ на АРМ
Висока воена делегација на националната гарда (НГ) на сојузната држава на САД Вермонт, предводена од командантот на НГ на Вермонт, генерал-мајор Стивен Креј, во понеделник беше пречекана во Генералштабот (ГШ) на АРМ, од страна на началникот на ГШ на АРМ, генерал-потполковник Горанчо Котески.
За време на престојот во ГШ на АРМ генералот Креј беше примен од Министерот за одбрана Зоран Јолевски, на која присуствуваше и амбасадорот на САД во Република Македонија Н.Е. Пол Волерс.
На разговорите во ГШ на АРМ пред гостите од НГ на Вермонт од страна на ГШ на АРМ беа презентирани искуствата од научените лекции во мисиите предводени од НАТО, ЕУ и ООН, како и учеството на АРМ во новата мисија на НАТО во Авганистан „Одлучна поддршка“, а беа разгледани и можностите за јакнењето на понатамошната соработка со НГ на Вермонт.
Во изјавата за медиумите, генералот Котески ја истакна одличната соработка на АРМ со НГ на Вермонт, укажувајќи посебно на: заедничкото учество во мировни операции, реализацијата на голем број заеднички вежби, обуки и едукација на припадниците на двете армии. НГШ на АРМ ја нагласи намерата за понатамошна соработка со НГ на Вермонт во сите области, при што посебно потенцираше на иницијативата за реализација на заедничка конференција со учество на армиите од земјите во регионот и националните гарди од сојузните држави во САД како нивни партнери за разгледување на можностите за формирање на сили за справување со природни непогоди, како и обука на медицински персонал. Генералот Котески соработката помеѓу НГ на Вермонт и АРМ, ја посочи како пример и поттик за соработката на Република Македонија и сојузната држава Вермонт во повеќе области.
Генералот Креј истакна дека е горд на соработката со АРМ и дека пријателството кое изминатите години е изградено, значи и партнерство. Тој истакна дека бројните активности помеѓу двете армии во изминатите години, го прават навистина силно партнерството помеѓу нив, нарекувајќи ги припадниците на двете армии ,,браќа и сестри по оружје“. Генералот Креј додаде дека вредностите за кои тој се залага во НГ на Вермонт се интегритет, служба и извонредност, ги споделуваат припадниците на двете армии.
По изјавите, се одржа церемонија на која од страна на НГШ на АРМ му беше доделена плакета на АРМ на полковник Дан Пајпс од НГ на Вермонт, а од страна на командантот на НГ на Вермонт на полковникот Зоран Секуловски му беше доделен медал за заслуга.
За време на престојот, генералот Креј ќе ги посети Воено-медицинскиот центар на АРМ, Центарот за обука на пилоти и воздухопловната бригада. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.