Градоначалникот на Град Скопје, Орце Ѓорѓиевски, демонстрира недозволиво ниво на ароганција и неодговорност, сега обвинувајќи ги вработените во ЈСП Скопје дека со своите тужби го ʼблокираатʼ претпријатието, реагираат од Левица.

Со тоа, додаваат од оваа партија, Ѓорѓиевски не само што ги дискредитира работниците кои се принудени по судски пат да ги бараат своите загарантирани права, туку директно ја префрла вината за катастрофалната состојба во ЈСП врз оние што се најмалку одговорни за неа.

Ваквиот пристап, оценуваат од Левица, претставува опасен обид да се криминализира легитимното барање на работнички права и да се наметне наратив во кој жртвата се претставува како виновник.

„Наместо јавно извинување за состојбата во која се доведени вработените, градоначалникот избра јавно да ги прозива и да ги изложува на нетрпеливост, создавајќи атмосфера на притисок и стигматизација.
Дали според Ѓорѓиевски работниците треба да молчат, трпат и да се откажат од своите права за да не ѝ пречат на неспособноста на раководството?
Овој однос јасно ја разоткрива перцепцијата на функционерите од ДПМНЕ – дека работниците не се носители на права, туку пречка што треба да се замолчи кога бара правда.

Дополнително, оваа реторика претставува очигледен дефокус од клучниот неуспех – четири години блокирање на Советот од страна на ДПМНЕ, што директно придонесе за тоа Скопје и денес да нема нови автобуси и да функционира со деградиран јавен превоз. Наместо одговори за ветените инвестиции, за нефункционалниот систем и за секојдневниот колапс, јавноста добива обиди за префрлање вина кон опозицијата, а сега и кон самите работници“.

Според Левица, особено интересен е фактот што ваквите напади доаѓаат во момент кога се отвораат прашања за скандалозни и штетни договори во ЈСП, вклучително и оној на Игор Јанушев со „Маратон“ и приватни агенции за привремени вработувања, кои, како што велат, генерираат милионски загуби за претпријатието.

„Наместо транспарентност и одговорност за овие практики, сведочиме на агресивна комуникација и обид за замолчување на секој што укажува на проблемите.

Работниците во ЈСП не се непријатели, ниту виновници, тие се луѓе што го одржуваат системот во живот и кои, со право, бараат заштита на своите права. Нападите врз нив не се само политички некоректни, туку и морално недозволиви.

Обидите за префрлање вина нема да поминат. Одговорноста за состојбата во ЈСП е кај оние што управуваат, а не кај оние што ја плаќаат цената на тоа управување“.

СДС и Филипче наместо да ликуваат на резултати од избори во други држави, нека си се посветат на партијата која е распадната на парчиња, истакна на прес-конференција Бране Петрушевски, пратеник на ВМРО-ДПМНЕ.

„СДС којашто некогаш беше релевантна и кредибилна, Филипче ја доведе во комбинација со Заев, да тоне се повеќе и повеќе во жива кал и да нема како да излезе од неа.

СДС којашто треба да биде главна опозиција и коректив на власта, се занимава со се, само со себе не. Се занимаваат со избори во други држави, а не си ги гледаат своите редови кои им се рушат се повеќе како кула од карти.

СДС ликува на победа на партија која е член на Европската народна партија или попозната како ЕПП, партијата Тиса, каде што е член и ВМРО-ДПМНЕ. Од друга страна пак, сестринската партија на СДС и член на Партијата на Европски Социјалисти од Унгарија освои 1,18% од гласовите. Тоа е нешто слично со рејтингот кој СДС го има во Македонија, и е многу близок до рејтингот на Филипче“.

Според него, СДС и Филипче прават се, само не си го гледаат сопствениот двор. Наместо да се дистанцираат од политиките на аболицираниот криминалец Зоран Заев кои ги доведоа до ова дереџе, додава Петрушевски, тие продолжуваат по неговите стапки и го величаат како да е најголем светец.

Оценува дека доколку СДС продолжи да се однесува вака, им се заканува бришење од политичката сцена.

„Воедно, ВМРО-ДПМНЕ ја честита победата на партијата Тиса и господинот Петер Маѓар, со кои очекуваме да ја продолжиме нашата билатерална соработка и на државно ниво да работиме на нашата интеграција во ЕУ“.

Премиерот Христијан Мицкоски, денеска одговарајќи на новинарско прашање во однос на обвинувањата од опозицијата и најавата дека ќе бараат ревизија на парите коишто се дадени од Унгарија во државава во однос на телекомуникација, енергетика и медиуми изјави:

„Видете СДСМ изминатиов период, најблаго кажано живее според онаа читанката „Алиса во земјата на чудата“, јас повеќе тоа би го класифицирал како СДСМ во земјата на лагите и конструкциите. Во текот на минатата година, ќе ве потсетам СДСМ велеше дека државата ќе банкротира. Не банкротиравме, напротив ја завршивме со еден од најдобрите пет економски резултати во Европа според раст на бруто домашниот производ. Потоа ја лажеа јавноста дека во април месец ќе дошле мигранти, еве го на средина на април сме, мигрант јас не видов се уште во Македонија. Потоа велеа дека само што не сме банкротирале, а веќе пензионерите и вработените коишто добиваат плата од Владата, на први април добија повисока плата. И за прв пат, се постигнаа историски договори со синдикатите УПОЗ и САДУ за вработените во државната администрација. Многу пати до сега СДСМ кажуваше работи, коишто вака можеби звучеа интересно за ушите на одредена јавност, но во суштина тоа ништо не се случуваше и во суштина немаше апсолутно никаков ефект во рамките на државата. Па така очекувам и овој пат, слободно тие може да си бараат, ќе си добијат се што е, се што можат институциите да им дадат како параметар. Инаку, што се однесува до она што го споменавте во телекомуникациите, станува збор за јавна процедура во којашто Агенцијата за електронски комуникации објавува повик. И на тој повик имаат право да се пријават сите оние коишто се заинтересирани да добијат лиценца за мобилен оператор. компанијата „4иГ“ којашто патем речено е партнер со германската „Раинметал“ и со „Спејс Х“ на Елон Маск, уплати веќе 9 милиони евра и се стекна со правотo да биде трет мобилен оператор. Вистинското прашање е, зошто во времето на СДСМ и ДУИ немаше трет мобилен оператор и зашто во тоа време македонските граѓани плаќаа најскапи цени за мобилните услуги. Тоа е вистинското прашање. А ваква транспарентна постапка, можат слободно во било кое време да си побараат до Агенцијата за електронски комуникации. Сигурен сум дека во една таква транспарентна постапка, тие ќе им одговорат. А друг тип на унгарски инвестиции како што споменувате, енергетика и слично, барем јас не сум запознаен, иако ќе бидат добредојдени доколку дојдат и доколку бидат согласно стандардите, законите и Уставот на Македонија“.