Македонија
Нема струја во струшките училишта, општината обвини за уцена
Двете струшки основни училишта „Браќа Миладиновци“ и „Јосип Броз Тито“, како и подрачните училишта во неколку села се исклучени од електрично напојување поради неподмирени долгови за струја. Денеска учениците во овие училишта ја следеа наставата по скратени часови, јавува Охридњус.
Градоначалникот на општина Струга Зијадин Села информираше дека се прават напори за надминување на овој проблем, а општината е подготвена да ги преземе долговите на училиштата и да ги исплати преку општинскиот буџет.„Ќе ја преиспитаме соработката што сме ја имале до сега со ЕВН по вчерашната акција на компанијата за исклучување на струја во училиштата. По сè изгледа ова е настап на третиот коалиционен партнер во Владата. Да се преземат вакви мерки во ова време кога веќе се скратува и денот и кога електричната енергија е неопходно средство за да функционираат училиштата тоа е уцена, а уцените се карактеристика на криминалци, а не на компании“, изјави Села.Од управите на училиштата велат дека наставата ќе се одвива по скратени часови само додека тоа го овозможуваат временските услови.„Наставата се одвива во вонредни услови по скратени часови од по 10 минути. Доколку има минусни температури наставата ќе биде прекината и ќе се одвива во нормални услови понатаму во саботи, ќе најдеме некаков модус вивенди“, вели Тони Савески, директор на ОУ „Јосип Броз Тито“.Инаку вкупниот долг за електрична енергија на училиштата во општина Струга изнесува околу 5 милиони денари. Бидејќи жиро сметките на поголемиот дел од струшките училишта се блокирани, минатата година нивните долгови ги презеде локалната самоуправа./крај/ох
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЛДП в петок организира „Pet Friendly“ ден во канцеларијата „Либерално ќоше“
Во новоотворената канцеларија на ЛДП „Либерално ќоше“ во срцето на Скопје в петок од 18:00 часот ќе се одржи „Pet Friendly“ ден за дружење, разговори и идеи на граѓаните со претседателката на Либерално-демократската партија Моника Зајкова.
– Водејќи се од нашата совесност, свесност и одговорност, покренавме иницијатива за носење на нов закон за благосостојба на животните. Милениците, се семејство, не потрошен предмет и затоа секој сопственик кој го остава својот миленик на улица треба да сноси одговорност и да се обезбеди регулиран систем на одговорно одгледување и размножување. Воедно да се обезбедат соодветни услови за бездомните кучиња и мачки и при тоа да ги заштити граѓаните од несакани повреди, е пораката на Зајкова.
Граѓаните се добредојдени на петочното дружење заедно со своите миленици, а своите идеи и предлози може да ги споделат и во писмена форма.
На полето на заштита на животните, ЛДП до Собранието поднесе и предлог за изменување и дополнување на Законот за заштита и благосостојба на животните, којшто ќе воведе построги мерки против оставање животни на улица, поодговорно сопствеништво и ќе ги подобри нивните услови.
Скопје
„Маски, смеа, рингишпил- дојди во Шеговил!“ – голема забава под маски во Кисела Вода
Под слоганот „Маски, смеа, рингишпил- дојди во Шеговил!“ општина Кисела Вода, в понеделник, на први април, организира голема забава под маски за најмладите.
Пред салата Расадник ќе биде поставен забавен парк со најразлични реквизити, ќе има кловнови и аниматори, а за музичкиот дел се задолжени „Поточиња”.
Настанот започнува во 11 часот, а за изборот на најдобра маска ќе одлучи жири комисија од општината. Најдобрите маски ќе добијат награди, велат од општината и ги покануваат сите дечиња да дојдат во Шеговил и со своите насмевки, шеги и маски да поминат еден прекрасен ден.
Македонија
Ванковска: Преспанскиот и бугарскиот договор се колонизаторски договори
Професорката Билјана Ванковска и претседателски кандидат на Левица во Фејсбук статус истакнува дека има разочарани млади луѓе кои мислат дека кога политичарите говорат за прашањата за Преспа и другите договори, тоа е само губење време и одвлекување на вниманието од реалните проблеми на земјата, сиромаштијата, невработеноста, корупцијата и сл..
„Точно е! Мнозинството граѓани едвај врзуваат крај со крај, очајни се од непостоење здравствен или образовен систем, сакаат развој а не вртење кон минатото.
Она што овие млади (а инаку умни) луѓе уште не го научиле е дека геополитиката (која ни ја наметнаа) е тесно поврзана со геоекономијата. Би очекувала својот критички ум да го свртат кон, на пример, поврзаноста на нашата колонијална положба со Преспа и Митилинеос. Или дури и со Бехтел и Енка… и уште многу ситни и не толку ситни зделки на македонските компрадорски елити кои нѐ продадоа како на сточен пазар, ни ги одзедоа и идентитетот и достоинството, ама и ги наполнија своите џебови врз база на бајките за ЕУ интеграција со смена на името и уставот.
It’s all about geopolitics, stupid!“, пишува Ванковска.
Според неа, Преспа и Бугарскиот договор не се само национални, идентитетски прашања, туку и класни и социоекономски. Ние, додава таа, сме во класично ропство, а принудени да аплаудираме на колонизаторите кои не се тука за наше добро, туку за свои интереси.