„Новиот закон е ‘политички популизам’ – остава без работа 10.000 луѓе, отвора врата за црниот пазар, а државата ја соочува со потенцијални загуби од над една милијарда евра“

Претставници и вработени од индустријата за игри на среќа на Јавната расправа во Собранието укажаа на уставно спорни и дискриминаторски одредби од предложената регулатива.

„Новиот закон за игри на среќа не е закон за дополнителна регулација на оваа индустрија, туку закон за затворање на легалните објекти, со кој се таргетира строго регулираниот и лиценциран сектор, беше предупредено на јавната расправа пред собраниската Комисија за финансирање и буџет. Претставници и вработени од индустријата за игри на среќа укажаа на повеќекратни негативни последици од новиот закон – гасење на легалниот пазар кој годишно носи повеќе од 350 милиони евра приходи во државниот буџет преку давачки, даноци и придонеси и индиректно поддржува меѓу 54.000 и 100.000 работни места; изместување на регулираниот сектор во црни текови без никаква контрола, бидејќи новиот закон не ја штити младината, туку ја прави лесна мета на диви играоници; поради губење на стекнати права и нарушување на инвестициската клима, државата ризикува да влезе во спорови со инвеститори пред домашни и странски институции, што би можело да ѝ нанесе штета која се мери во десетици и стотици милиони евра. Приредувачите истакнаа дека Министерството за финансии како овластен предлагач на новиот Предлог-закон за игри на среќа до Владата треба сериозно да го земе предвид потенцијалното оспорување на клучните одредби пред Уставниот суд, што може да предизвика тужби кои драматично би го оштетиле државниот буџет.

Предлогот на новиот закон беше оквалификуван како обид за собирање евтини политички поени преку уништување на најголемиот приватен работодавач во земјата, со целосно игнорирање на засегнатите страни и кршење на Уставот. Претставниците на индустријата порачаа дека предложените законски мерки не се насочени кон заштита на граѓаните, бидејќи тие нема да престанат да играат, туку играта ќе се пресели таму каде што државата нема никаква контрола. Со донесувањето на новиот закон најмногу би профитирале нелегалните оператори, бидејќи додека се затвораат легалните и строго регулирани компании, тие ќе отвораат нелегални канали без лиценца, без контрола и без никакви давачки кон државата.

Се нагласи и дека одредбата за дистанца од 500 метри од училиштата претставува противуставна дискриминација која државата потенцијално ја соочува со милионски тужби. Се укажа и дека наметнатата дистанца зависи од променливи урбанистички околности, бидејќи било која општина може да одлучи да гради училиште на помалку од 500 метри од постоечки автомат клуб или казино и со тоа да создаде правна претпоставка за затворање. Приредувачите објаснија дека оваа одредба практично би значела затворање на сите легални објекти, оставајќи повеќе од 10.000 луѓе без работа и отворајќи врата за црниот пазар и дивите играчници.

Како пример беше наведена ситуацијата во Албанија, каде државата се откажа од четиригодишната забрана за игри на среќа токму поради експлозијата на

сивата економија, масовното отворање нелегални играчници и големите буџетски финансиски загуби, но сè уште не се опоравила од последиците на оваа погрешна одлука.

Стопанската комора исто така побара повлекување на предложеното законско решение за игри на среќа, предупредувајќи на последиците кои тоа би ги предизвикало врз бизнис секторот и економијата, со аргументи дека предложените измени се носат без соодветна анализа и дека можат да имаат сериозни последици врз компаниите кои легално работат во овој сектор, но и врз државниот буџет.

Приредувачите упатија апел до пратениците од сите политички партии да покажат разбирање и наместо популизам, да прифатат формирање мешовита работна група која би изработила ново, одржливо законско решение во согласност со сите европски стандарди.

фото/Depositphotos