Македонија
ОНА: Јанкулоска да не шири лаги и невистини, борбите ќе продолжат
Ослободителната народна армија(ОНА), која во саботата ја презеде одговорноста за нападите во Куманово, ја обвини во недела македонската министерка за внатрешни работи Гордана Јанкулоска дека „шири лаги и невистини“ и ја повика јавно да соопшти кои се уапсените кои се предале.
Во соопштението проследено до албанските медиуми, што го објави Bota sot, македонската полиција се нарекува „антидемократска државна полиција на ПЈРМ“.
„Оружениот судир во Куманово и околината е реакција на структурите на ОНА, а не на терористичка група, како што се вели во официјалната варијанта на МВР на ПЈРМ“, пишува во соопштението кое е потпишано со „портпарол на ОНА“, со Гостивар како место од каде е испратено.
„Изјавата на Јанкулоска за штетата што ја претрпеа нејзините криминални сили е точна, пет мртви полицајци и повеќе од 20 ранети, тоа е последица на нашата остра реакција, која никако нема да запре во следните денови“, предупредуваат од ОНА во соопштението, за кое нема официјална потврда за неговата веродостојност.
„Јанкулоска мора да ги соопшти со вистинско име ’уапсените’, по ’нивното предавање’, да не го заплашува албанскиот народ и уште еднаш да ги враќа оние уплашени цивили за да облечат воени униформи“, повикува ткн ОНА.
Оваа паравоена формација укажува дека „нејзините вооружени сили се целосно организирани, способни и со доволно средства за продолжување на борбите.
Во соопштението, за кое нема официјална потврда, ОНА „ги информира албанските влади во Тирана и Приштина, наместо натамошни бесполезни дипломатски зборови за оваа ситуација, да свртат позитивно внимание кон европските меѓународни организации, со цел да се запре насилството на полицијата врз недолжното цивилно население“.
„Не сносиме одговорност за оние Албанци кои останале во рамките на полициските и воените структури на државата ПЈРМ. Структурите на ОНА се во одбрана на албанскиот народ и го повикуваат да биде внимателен и да биде што подалеку од местото каде што ќе се водат понатамошните оружени судири“, се наведува во соопштението, кое завршува со паролата „Да живее албанскиот народ“.
Соопштението под број 4 го објави Bota sot, а е потпишано од Гостивар. /крај/мф/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
ЈСП: Јавниот превоз по неделен возен ред, жичницата на Водно нема да работи
Јавното сообраќајно претпријатие Скопје соопшти дека јавниот превоз ќе функционира по неделен возен ред, а жичницата на Водно нема да работи.
Како што се појаснува во соопштението, дежурни од седум до 14 часот ќе бидат билетарниците на Транспортен центар и таа во Ѓорче Петров.
Македонија
Променливо облачно и потопло со сончеви периоди
Времето денеска ќе биде променливо облачно и потопло со сончеви периоди. Кон крајот на денот ќе има локален слаб дожд, краткотрајно пороен, проследен со појава на ретки грмежи. Ќе дува умерен, а во западните делови повремено засилен ветер од југозападен правец. Минималната температура ќе биде во интервал од 4 до 10, а максималната ќе достигне од 16 до 24 степени.
Во Скопје променливо облачно и потопло со сончеви периоди. Во делови од котлината ќе има услови за појава на краткотраен пороен дожд со ретки грмежи. Ќе дува слаб до умерен променлив ветер. Минималната температура ќе се спушти до 6, а максималната ќе достигне до 22 степена.
Во четврток ќе се задржи променливо облачно време со повремени врнежи од дожд. Локално врнежите ќе бидат поројни, проследени со појава на грмежи, а на повисоките планини ќе преминуваат во повремен слаб снег. Од петок следува период на претежно стабилно и потопло време.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.