Премиерот Зоран Заев, заедно со директорот на Фондот за иновации и технолошки развој (ФИТР), Јован Деспотовски, денеска одржа средба со ученици иноватори и нивните ментори, кои како тим наречен MAKBot Pioneers ќе ја претставуваат Македонија на Светското првенство во Детроит во САД, организирано од Асоцијацијата за препознавање наука и технологија и од компанијата „Лего“.

Тимот MAKBot Pioneers е составен од девет ученици од сите основни и средни училишта од Кочани. Тимот функционира во склоп на СОУ „Гошо Викентиев“ и работи како дел на кабинетот по роботика.

Нивниот проект е посветен на употреба на неискористениот потенцијал на термичките води, кои кога се враќаат како отпадна вода ја имаат вистинската температура за одгледување на алгата спирулина.

Изразувајќи огромно задоволство од средбата, премиерот Заев истакнал дека е чест да се дружи со младите ученици, иноватори и нивните ментори, кои покажуваат на дело дека во Македонија може да се дизајнираат и создаваат корисни дела.

„Јас ги повикувам нив, но и сите млади, да работат, да создаваат и да креираат тука, во нашата Македонија. Притоа се обврзувам дека Владата ќе продолжи да ја интензивира поддршката за иновации, за информатичка технологија, за развој и за дигитализација на Македонија“, истакна Заев.

„Овој тим од вредни, креативни и посветени ученици и нивниот пронајдок – робот, кој извршува задачи во областа хидродинамиката, ќе ја претстави и промовира Македонија на светската мапа на млади иноватори и затоа ја заслужуваат сета наша поддршка. Да им честитаме на учениците, но и на нивните професори и ментори кои се заслужни за успешно завршената работа“, рече премиерот Заев.

Посакувајќи им среќа на претстојниот светски натпревар, кој ќе се одржи од 25 до 28 април, премиерот Заев на тимот млади иноватори им порача дека веќе го имаат постигнато најголемиот успех со тоа што ја добиле шансата да се натпреваруваат во групата на 107 учесници од над 60 земји.

„Се договоривме дека, без разлика на исходот на Светското првенство, ќе ми пишат имејл како си поминале и ќе ми пратат фотографии од Детроит“, додаде премиерот Заев.

Професорот Гордан Анастасов, изразувајќи благодарност за сите помагачи и спонзори, информира дека тимот од млади иноватори работел сам на идејата и реализацијата на роботот и проектот и освоил одлични резултати на регионални натпревари во Србија и Словенија, по што е поканет на Светското првенство.

Ученикот Горјан Илијевски пред присутните ја претстави работата на роботот направен од лего-коцки со разни приклучоци во зависност од мисијата што треба да ја извршува.

Министерството за информатичко општество и администрација денеска организира јавна трибина за Законот за централен регистар на населението и Законот за електронското управување и електронските услуги.

На јавната трибина свое обраќање имаше министерот за информатичко општество и администрација, Дамјан Манчевски, кој се осврна на придобивките за граѓаните од овие два нови закона.

„Само ден по Дигиталниот самит, започнуваме со реализација на планираните активности, кои ќе придонесат кон дигитализација на Македонија. Регистарот на населението е основа и за порталот за е-услуги, каде што граѓаните ќе може најголем дел од услугите што секојдневно им се потребни да може да ги добијат по електронски пат. Ова претставува платформа за креирање електронски идентитет на граѓаните и постојано ќе се надградува со податоци од други институции. Регистарот на населението има цел да ги донесе услугите до граѓаните на поедноставен начин да се добиваат сите потребни документи, што ќе придонесе до подобрување на квалитетот на животот“, истакна министерот Манчевски потенцирајќи дека регистарот на населението не е и нема да биде замена за попис на население.

Како што информира тој, регистарот на населението под определени услови ќе биде даден на користење и на комерцијалните институции, што ќе отвори и нови можности и зголемување на придобивките за граѓаните.

На трибината се обратија и странскиот правен експерт Георги Димитров и претставниците на граѓанскиот сектор како партнери на овој процес, Билјана Бејкова од НВО „Инфоцентар“ и Љупчо Петковски од „Евротинк“. Како што истакнаа тие, станува збор за процес што не завршува со еднократно донесување регистар на населението. Целта е да се надмине проблемот со шетање по шалтери, за сите граѓани, а особено за социјално ранливите категории. Според нив, регистарот на населението ќе го надмине и проблемот на постоење разни податоци во разни институции.

Вистинскиот збор што му е најпотребен на нашиот регион во полето на безбедноста е партнерство. Партнерство што се постигнува со градење доверба заради веродостојни податоци, заеднички операции и заштита на информацијата, порача претседателот Ѓорге Иванов на отворањето на состанокот на директорите на агенциите за разузнавање од земјите учеснички во процесот Брдо-Бриони, што денеска се одржува во Скопје.

„Иднината на нашиот регион е во Европската Унија. Но, сепак, од некои земји членки на Унијата добиваме мешани пораки за замор од проширувањето. Тој замор, меѓу другото, се должи и на перцепцијата за Балканот како периферија на Европа, како регион што е инхерентно нестабилен. Недостигот на доверба меѓу нас е совршена шанса за влијание на трети страни врз економскиот просперитет на државите, оживување на етнонационалистичките проекти и спречување на интеграцијата во ЕУ и во НАТО. За да ја промениме ваквата перцепција, ние мора, наместо реактивни, да бидеме поактивни. Заканите со кои се соочуваме бараат креативност, партнерство и неконвенционално размислување“, рече претседателот Иванов.

Според македонскиот претседател, постојат сè повеќе нетериторијални творби и предизвици што територијалната држава сама по себе сè потешко може да ги контролира. Според претседателот Иванов, како никогаш досега за спречување на меѓународниот тероризам, илегалната миграција, транснационалниот организиран криминал, употребата на интернетот за субверзија, хибридните закани и нелинеарната војна се потребни интероперабилност на податоците, заедничко работење и меѓусебно помагање.

„Да го искористиме овој прв состанок за да пратиме јасна порака до европските центри. А тоа е порака дека ние, државите од регионот, можеме да соработуваме во оваа област од витално значење за нашите општества и за Европа. Нашите агенции за разузнавање може заедно да нудат креативни и прагматични решенија за безбедносните предизвици со кои се соочуваме“, рече претседателот Иванов.

Состанокот на директорите на агенциите за разузнавање на земјите учеснички во процесот Брдо-Бриони се одржува првпат по иницијатива на Република Македонија и на него се дискутира за безбедносната поврзаност,ж како сегмент на регионалната соработка. Собирот е во пресрет на состанокот на лидерите на земјите учеснички од процесот Брдо-Бриони, што на 27 април ќе се одржи во Скопје.