Општество
ИЈЗРМ: Во Македонија 95 проценти од населението има пристап до безбедна вода
Институтот за јавно здравје на Република Македонија по повод Светскиот ден на водата 22 март, постави анкета за влијанието на безбедната вода за пиење врз здравјето на официјалната интернет страница (http://iph.mk/anketa).
Целта е да се вклучат што поголем број граѓани за да се добијат податоци за тоа колку јавноста е информирана за тоа која вода е безбедна за пиење, и дали прават разлика меѓу безбедна вода и квалитет на водата за пиење.
Особено е важно да се добијат податоци од каде јавноста најчесто се информира за тоа, и какво влијание има безбедната вода врз здравјето на населението, односно кои заболувања можат да бидат последица од небезбедна вода за пиење.
Заболувањата со потекло од небезбедна вода се причина за смрт на повеќе од 1,5 милиони деца во светот, годишно.
Податоците добиени преку анкетата ќе овозможат информациите од интерес за превенција на здравјето на населението да стасаат токму до целните групи за кои се наменети.
Безбедната и здравствено исправна вода за пиење во доволни количини обезбедена до потрошувачите ги подобрува условите за живот, ја подигнува здравствената култура на повисоко ниво и ја унапредува животната средина во целост.
Во 2011 година, на Светскиот ден на водата ИЈЗРМ анкетираше околу 200 граѓани, при што доби сознанија дека 52 проценти од испитаниците пијат повеќе од литро водна на ден, во најголем процент пијат вода од чешма, 34 проценти пијат комбинирано од чешма и пакувана, а 27 проценти пијат само пакувана вода. Речиси половина од испитаниците не внимаваат колку вода трошат во текот на денот. ИЈЗРМ подготвува годишни извештаи за квалитетот на водата за пиење во Република Македонија. Начинот и постапката за тоа се регулирани со Правилникот за безбедност на вода.
Во Македонија 95 проценти од населението има пристап до безбедна вода за пиење. Институтот за јавно здравје во координација со 10-те Центри за јавно здравје се грижи за безбедноста на водата во Македонија. ИЈЗРМ има цел преку прашалникот во таа насока да ја вклучи и јавноста.
Во светот, најмногу во земјите во развој, секоја година умираат 2,2 милиони луѓе од болести поврзани со вода.. Причина за тоа е небезбедно снабдување со вода за пиење, несоодветна санација и хигиена.
Институтот за јавно здравје на РМ веќе десет години на 22 март го одбележува Светскиот ден на водата со разни активности на разни локации во Скопје со цел, како превентивна институција да влијае врз подигање на свеста кај населението за значењето на безбедната вода за здравјето, и особено за зачувување на водените ресурси како непроценливо богатсво.
Водата е неопходна за живот. Улогата на водата е добро позната на сите, без неа луѓето можат да опстанат неколку дена. Сочинува 75% од телесната тежина на доенчињата до 55% кај постарите лица, неопходна за клеточната хомеостаза и животот. Водата сочинува 92% од крвта, 75% од мозокот и мускулите, 22% од коските. Најдобар е растворувач, ги пренесува хранливите материи до клетките, а ги изнесува штетните материи. Важна е за електролитната рамнотежа, регулација на телесната температура, помага преку бубрезите да се елиминираат токсичните материи, важна за работата на системот за варење, нервниот систем, правилна функција на зглобовите и коскениот систем.
Дневните потреби за вода се околу 2-2,5 литри. Како течности се внесува околу 1-1,2 литри, преку храната околу 1,1литри и од оксидационите процеси на метаболизмот околу 0,2-0,3 литри. Се излачува преку бубрезите (урината) околу 1,2-1,5 l дневно, преку кожата околу 0,5 l, преку белите дробови 0,5 l и со фецесот 0,1 l. Се разбира дека дневните потреби за вода зависат од физичката активност, тежината на работата, микроклиматските услови, одредени индивидуални карактеристики (возраст, пол, одредени физиолошки или патолошки состојби и др.) /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.