Општество
Адеми: Да се искористат можностите што се нудат во националните и меѓународните програми
Министерот за образование и наука Абдилаќим Адеми, во понеделник на Економскиот факултет при Универзитетот „Св. Кирил и Методиј“, во Скопје, имаше свое обраќање на презентациите на тема „Програми на Унијата“ и „Стипендии Габриела Коневска Трајковска“ во организација на Секретаријатот за европски прашања.
Адеми се осврна на најголемите Европски рамковни програми за истражување, развој, иновации и мобилност, Хоризонт 2020 и Еразмус +.
„Република Македонија во последниве 3-4 години, интензивно работеше на креирање адекватни услови за целосно заокружување на законската рамка во поглед на научно-истражувачката и иновациската дејност, како и донесување на најзначајните стратешки документи. Покрај амандманот на Законот за научно-истражувачка дејност, со кој се предвидува 40% од школарината да се алоцираат за фундаментални и применети истражувања, модернизација на научно-истражувачката инфраструктура и нејзино одржување, обуки, тренинзи и сл., усвоен е и Законот за иновациска дејност, истакна министерот Адеми, напоменувајќи дека кон крајот на 2013 започна со работа Фондот за иновации и технолошки развој, чија основна функција е да обезбедува поддршка за финансирање и ко-финансирање на развојни и иновативни проекти, грантови за трансфер на технологии, како и техничка и консултативна поддршка за старт ап и постоечките компании“, рече Адеми.
Од стратегиите тој ги издвои Националната стратегија за иновации 2012-2020 и Регионалната научно-истражувачка стратегија за иновации на Западен Балкан.
„Сето ова создава добра база за натамошно јакнење на севкупниот научноистражувачки потенцијал и капацитети, а со тоа и поуспешно користење на можностите кои се нудат во севкупните национални и меѓународни програми, а особено Хоризонт 2020 и Еразмус +, рече Адеми, додавајќо дека со потпишувањето на Договори за учество во овие програми, Република Македонија се стекна со статус на асоцијативна членка, што значи еднакви права и обврски како и земјите членки на ЕУ“, истакна министерот за образование и наука.
Министерот Адеми, пред присутните потенцираше дека Република Македонија бележи навистина добри резултати од учествата во рамковните програми за истражување и развој, почнувајќи од ФП6, каде беше лидер во Регионот со 64 проекти и 6.2 милиони евра, потоа во ФП 7 каде Република Македонија има повеќе од 120 проекти со 13-14 милиони евра.
„Мојата порака за сите вас е да го капитализирате ова искуство, знаење и потенцијал и максимално да одговорите на предизвиците што пред вас ги отвораат програмите Хоризонт 2020 и Еразмус+. Ве поканувам сите вас да исчекорите и да се вклучите во програмите, да ги пронајдете своите можности и да ги збогатите своите капацитети“, рече во своето обраќање министерот за образование и наука м-р Абдилаќим Адеми. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.