Подобри услови за престој во градинките добија децата што ги посетуваат објектите на Јавната детска градинка „8 Март“ во општина Кисела Вода.

За дечињата, кои поголемиот дел од денот го поминуваат во градинката „Расадник“, набавени се 300 нови душеци за рекс-креветчињата, нова постелнина, нови градеробери, плакари за складирање на детските креветчиња, теписони за игра, повеќе пластични анатомски столчиња, нови 124 детски дрвени столчиња и 23 масички. Покрај ова, во објектот „Расадник“ целосно обновени се 7 бањи.

А за децата во градинката во населбата Пржино набавени се 200 душеци за детските рекс-креветчиња, нова постелнина, детски столчиња и масички, теписони за игра, гардеробери за сите простории, потемнувачки зебра-завеси, клупи за соблекување/облекување чевли и анатомски пластични столчиња.

Објектите на „8 Март“, „Пепрутка 1 и 2“ опремени се со нови душеци за бебешки креветчиња, анатомски пластични столчиња и повеќе теписони за игра и забава на децата. Нови теписони набавени се за објектите „Стапалче“, „Ѕуница“ и „Зелениково“.

Отворен е јавниот оглас за избор на изведувач за пречистителната станица за вода за пиење во Штип, која ќе биде поврзана со хидросистемот „Злетовица“, каде што порано имаме изградено систем, но не е во функција, рече министерот за земјоделство, шумарство и водостопанство, Трајан Димковски, кој заедно со градоначалникот на општина Штип, Благој Бочварски, ја посети пречистителната станица за вода, која се наоѓа во населеното место Баби.

Како што велат, проектираниот капацитет на филтер-станицата во Штип за преработка на сурова вода од хидросистемот „Злетовица“ е 500 литри во секунда. Досега не било возможно овој капацитет целосно да се исполни поради, како што се наведува, променливата количина вода со која Штип се снабдуваше од речиси седумдесет бунари. Количината вода не е стабилна и постојано варира, а особено е проблематичен летниот период кога Штип се соочува со недостиг од чиста вода за пиење.

„На 5 февруари се затвора повикот, ќе се разгледаат понудите и многу бргу ќе се почне со градежните активности бидејќи парите се веќе обезбедени од МЗШВ. Во Карбинци е избран изведувачот, каде што ќе се почне со работа и вредноста е околу 85 милиони денари, а за пречистителната станица во Штип вредноста е околу 295 милиони денари за доградба на станицата со најсовремена технологија“, изјави министерот Димковски и притоа посочи дека до крајот на 2020 година општина Штип целосно ќе се приклучи кон хидросистемот „Злетовица“.

Во Штипскиот Регион исто така во завршна фаза е и изборот на најповолен понудувач за изградба и надзор над изведба на прочистителна станица во Карбинци. Во текот на 2020 година ќе се објави тендер за изградба на пречистителна станица за Лозово.

До крајот на 2020 година предвидено е да се изградат и цевководи и пристапни патишта до пречистителните станици за Карбинци и Лозово. Со сите овие активности се завршува првата фаза од проектот „ХС Злетовица“ за кој државата има обезбедено буџет од 5 милиони евра. Со овој капитален проект ќе им се овозможи континуирано и стабилно водоснабдување на речиси 100.000 жители од овој регион (Пробиштип, Свети Николе, Штип, Карбинци и Лозово). Со ова ќе се реши лошата состојба со водоснабдувањето со пивка вода во североисточниот дел на нашата држава.

Проектот „Хидросистем ‘Злетовица’“ понатаму продолжува со втора и трета фаза, кои се наменети за изградба на систем за наводнување на приближно 3.500 хектари обработливо земјоделско земјиште во регионот на Пробиштип (втора фаза) и изградба на мали хидроелектрични централи (трета фаза). „Хидросистемот ‘Злетовица’“ е повеќенаменски (водоснабдување, наводнување и енергетика) и се смета за проект од врвен национален интерес.

Министерството за труд и социјална политика соопштува дека во согласност со Законот за празниците на РМ („Службен весник на РМ“ бр. 21/98 и 18/07), 27 јануари 2020 година (понеделник), Свети Сава е неработен ден за граѓаните припадници на српската заедница во Република Северна Македонија.

Истовремено, Министерството за труд и социјална политика на граѓаните припадници на српската заедница им го честита празникот Свети Сава.