Општество
FIA открива кои податоци се следат на „поврзаните автомобили“
FIA Region I откри дека сопствениците на возила кои се од типот „поврзани автомобили“, треба да имаат право да изберат кои податоци би сакале да ги споделат или пак, потполно право да го исклучат делењето податоци.
Во врска со „поврзаните автомобили“, со оваа кампања се бара заштита на податоците, при што законодавството треба да обезбеди возачите да ја задржат сопственоста на податоците, а нивното користење да биде само преку информирана согласност од страна на возачот.Се бара и слободен избор, при што возачите треба да имаат право да го изберат давателот на услугите.Исто така, треба да се овозможи лојална конкуренција, а давателите на услуги треба да имаат право да развиваат безбедни производи и функционалности.Кампањата „МоеВозило, МоиПодатоци!“ (MyCar, MyData!) и студиите беа лансирани во Европскиот парламент во Стразбур на 24 ноември 2015 година, на коктел организиран од европратеничката Evelyne GebhardtИстрагата спроведена на две возила, конвенционално возило на гориво и електрично возило, откри дека податоци за профилот на возачот, локацијата на возилото, должината на патувањето, како и лични податоци од синхронизацијата на мобилните телефони, се следат и повратно се праќаат до производителот. Јавната анкета спроведена со цел да се идентификува степенот на познавање на јавноста, покажува висок степен на заинтересираност за „поврзаните автомобили“. Меѓутоа испитаниците од 12 европски земји, при анкетирањето, пренесоа јасна порака: 90% се изјаснија дека податоците за возилото му припаѓаат на сопственикот или возачот на автомобилот. Токму оваа порака е пренесена на европратениците за време на настанот организиран по повод лансирањето на кампањата „МоеВозило, МоиПодатоци!“ (MyCar, MyData!). Притоа, граѓаните се најмногу загрижени за откривање на приватни податоци (88%), комерцијална употреба на личните податоци (86%), хакирање на возилото и негово следење. 95% од испитаниците веруваат дека постои потреба од посебно законодавство за заштита на податоците на возилото и возачот.„Постои јасна разлика меѓу податоците кои се следат и оние кои граѓаните навистина се подготвени да ги прифатат кога станува збор за податоци од „поврзаните автомобили“. Треба да се пронајде решение не само за заштита на податоците, туку и за обезбедување на континуирана информираност и слободен избор на даватели на услуги. „Поврзаните автомобили“ се веќе на пазарот, способни да следат и комуницираат приватни податоци за потрошувачите. Сега е моментот креаторите на политиката да завземат цврст став и да ги заштитат потрошувачите“,рече претседателот на FIA Region I, Thierry Willemarck. „Потрошувачите имаат право да знаат кои податоци ги споделуваат кога го возат својот автомобил. Во моментов, само производителите на автомобили имаат пристап до овие податоци. Европејците заслужуваат да имаат контрола над нивните податоци и давателите на услуги со кои ќе изберат тие податоци ќе ги споделат. Исто така, тие мора да имаат можност да ја исклучат целокупната комуникација“, рече европратеничката Evelyne Gebhardt.На основа на овие две студии, FIA Region I и нејзините клубови, членки од Европа, меѓу кои и АМСМ, ја започнуваат кампањата „МоеВозило, МоиПодатоци!“ (MyCar, MyData!), со цел зголемување на јавната свест за податоците од „поврзаните автомобили“, донесување соодветна законска регулатива и обезбедување на фер пост-продажни услуги за „поврзаните автомобили“./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.