Министерката за образование, Мила Царовска, вели дека само учениците од една скопска гимназија организираат бојкот на наставата поради државната матура.

„Тоа се мали групи што искажуваат свој револт, секако дека тоа е нивно легитимно право, само една гимназија во Скопје има поорганизирано дејствување во однос на бојкот на наставата, сите други се мали изолирани групи во гимназиите во Скопје, а во Медицинското, на пример, нема ниту еден ученик што бојкотира“, вели Царовска.

Таа вели дека има две здруженија на средношколци, едното е она што е легитимирано од самиот старт, а другото е регистирано неодамна, првото е Сојузот на средношколците, а второто Глас на средношколците.
Според Царовска, матурата треба да се спроведе на начин на кој сега е утврдена, а понатаму да се измени и осовремени.

Таа истакнува дека сепак средношколците имаат избор помеѓу државната и училишната матура, во зависност од тоа дали сакаат да го продолжат своето образование.

Министерот за здравство Венко Филипче и министерката за образование Мила Царовска денеска на состанокот со претставниците на Сојузот на средношколци разговараа за почетокот на второто полугодие и под какви околности ќе се одвива наставата.

Наставата во второто полугодие продолжува со истите мерки и препораки како и досега. И во второто полугодие наставата во основните и средните училишта продолжува да се одвива онлајн со исклучок на учениците од прво до трето одделение кои посетуваат настава со физичко присуство во училница, согласно капацитетите на училиштата за спроведување на планот и протоколите на Министерството за образование и наука и со одобрување од родителите.

„Ја следиме епидемиолошката состојба и доколку следните месеци се покаже стабилизирање ќе донесеме други одлуки, но тоа ќе се случи откако ќе бидеме сигурни дека трендовите со намалување на новозаразени со ковид ќе продолжат“, рече Филипче.

Заменик-претседателот на Владата задолжен за европски прашања, Никола Димитров, во својство на национален координатор за странска помош во земјава, заедно со амбасадорот на Чешка во Северна Македонија, Мирослав Томан, и директорот на Дирекцијата за заштита и спасување, Беким Максути, денеска ја презентираа донацијата к што Чешката Република преку Механизмот за цивилна заштита на ЕУ ја обезбеди за Република Северна Македонија, како поддршка во борбата против Ковид-19.

„Подготвувајќи го процесот на имунизација, фокус на Владата на Северна Македонија е обезбедување  заштитен материјал, пред сè за оние коишто се во првите редови, за медицинскиот персонал. Нашите пријатели од Чешка излегоа во пресрет на нашето барање што беше поднесено преку механизмот за цивилна заштита на ЕУ“, рече Димитров.

„Чешка ни е голем пријател. Ја користам оваа можност да се заблагодарам на чешкиот народ, на чешката влада за оваа помош, од името на нашата влада и исто така затоа што се принципиелни поддржувачи на политиката на проширување, но и промотори и чувари на европската заедница на вредности, што стана особено видливо и јасно во декември минатата година“, додаде тој.

Од страна на Владата на Чешка беа донирани 108 000 хируршки маски, 18 000 ФФП2 маски и 5000 медицински скафандери, за медицинскиот персонал во земјава.​