Заменик-претседателот на Владата задолжен за европски прашања, Бујар Османи, учествуваше на деветтото издание на „Компаративната анализа – извештаи на Европската комисија за Македонија 2014-2018“ во организација на Евротинк – Центарот за европски стратегии и Фондацијата „Отворено општество – Македонија“ (ФООМ).

„Една од најважните придобивки од оваа чиста препорака е дека извештајот покажа оти Македонија се врати на евро-атлантската агенда, на евроинтегративниот пат“, изјави Османи додавајќи дека овој впечаток е поткрепен и во изјавите на еврокомесарот Хан при предавање на извештајот, но и при посетата и во обраќањето на потпретседателката Могерини денеска.

„Извештајот покажа дека Република Македонија успешно ги адресира ургентните приоритети, што покажува дека е надмината политичката криза, а земјата е вратена на нормалниот демократски колосек“, истакна Османи додавајќи дека е констатиран и пристоен напредок во реформите, особено во делот на создавањето на основите, т.е. условите за стабилна долгорочна реформска агенда на државата.

Османи посочи и дека една од клучните придобивки претставува и напредокот во демократскиот и политичкиот квалитет имајќи предвид дека реформите се имплементирани со целосно почитување на процедурите на инклузивен начин, со вклученост како на граѓанскиот сектор и експертската јавност така и на опозицијата.

Претседателот на ВМРО-ДПМНЕ, Христијан Мицкоски, денеска оствари работен појадок со високата претставничка на ЕУ за надворешна политика и безбедност, Федерика Могерини, соопшти партискиот Центар за комуникации.

Двајцата соговорници во рамките на средбата зборувале за европските интеграции на државата, најновиот извештај на Европската комисија и нотираните недостатоци.

„Претседателот Мицкоски истакна дека Европската Унија ѝ е потребна на Република Македонија како начин за подигнување на стандардот на граѓаните, повисок квалитет на живеење и споделување на заедничките вредности. На тој план ВМРО-ДПМНЕ даде свој придонес давајќи суштински забелешки, кои беа внесени во реформските закони што беа донесени, со што партијата се вoдеше од државните интереси и интересите на граѓаните што за ВМРО-ДПМНЕ се на прво место. Мицкоски изрази загриженост за економската стагнација во државата, корупцијата, која е широкораспространета, и случаите што отвораат сериозен сомнеж за криминал во кој се вмешани највисоки преставници на власта“, соопшти ВМРО-ДПМНЕ.

Мицкоски пред Могерини посочил и дека политичкиот терор е широко застапен и тој се одвива на повеќе нивоа како начин на пресметка на власта со неистомислениците. Тој се пожалил и на притисоци врз медиумите и недостиг на демократски амбиент, што е сериозен предизвик, а кои државата ја уназадуваат во повеќе сфери.

Мицкоски во рамките на средбата заклучил дека Македонија мора да го продолжи патот кон Европската Унија сè до нејзино целосно интегрирање, а за тоа е клучна и поддршката од пријателите од Европската Унија, кои мора одблиску да ги мониторираат процесите и волјата на Владата да работи на надминување на нотираните забелешки во извештајот на Европската комисија.

Случајот „Монструм“ е жив пример за морбидната кампања на Зоран Заев и поигрувањето со огромни човечки трагедии за сметка на правењето сопствен маркетинг. Тоа е црн пример до каде е спремен да оди, само за да се додржи на власт, обвини Александар Нацев од ВМРО-ДПМНЕ.

„Обвинетите за случајот ‘Монструм’ се на слобода. Исто како што се бараше во платформата потпишана во Тирана. Тие благодарение на поддршката што ја имаат од власта одложуваат судски рочишта тврдејќи дека биле невини, а кој бил виновен не кажува ниту Заев ниту Фатиме Фетаи, која го презеде предметот за масакрот на Величетврток. Родителите на убиените деца потврдија дека виновниците се оние што беа претходно осудени“, рече Нацев.

Родителите на убиените, додаде тој,  јасно кажаа дека Зоран Заев им покажувал транскрипти од телефонски разговори помеѓу Невзат Бејта, тогашен потпретседател на ДУИ, и еден од обвинетите, Фејзи Азири. „Заев им кажал на родителите на убиените дека петте броја што се заведени како државна тајна, а комуницирале со обвинетите од ‘Монструм’, се на функционери од ДУИ“, рече Нацев.

Според него, СЈО во согласност со законот има обврска да го повика Заев во својство на сведок. „Имено, според член 217 од Законот за кривичната постапка, како сведоци се повикуваат сите лица за кои е веројатно дека ќе може да дадат известување за кривичното дело, сторителот и за други важни околности“, рече Нацев.

Тој вели дека Зоран Заев треба да престане да ја манипулира со јавноста и со родителите на убиените и да преземе одговорност за предизвиканите трауми и за злоупотребите што во континуитет нечовечки ги практикува.