Република Македонија ќе биде општество на еднакви граѓани и тоа никој повеќе не може да го спречи. Демократските процеси се почнати, назад нема“, порача во неделата лидерот на СДСМ, Зоран Заев во обраќањето на настанот„Осмомартовски марш во организација на Форумот на жените на СДСМ под мотото „За рамноправност – За соживот“.

„Со партиите со кои го обезбедивме парламентарното мнозинство сме согласни. Ќе поттикнеме секој правен субјект да мора да има синдикат што ќе ги штити правата на работничките и работниците“, порача Заев.

Рече дека сите работи кои се ветени во предизборната кампања и за коишто се зазема СДСМ ги правата „заедничкиот јазик на којшто зборуваме, ова е јазикот на животот на којшто сите ќе се разбереме – живот за сите, правда за сите“.

„Дами мои, формираме реформска, европска Влада којашто ќе обезбеди живот за сите жени, за сите граѓани во Македонија. Таа Влада, избрана од околу 700.000 граѓани, ќе се грижи за сите жени, за сите деца и ќе води грижа за сите граѓани на Македонија. Обезбедуваме еднаквост и стабилност. Заедништво, а не поделби. Интеграција, а не изолација“, рече Заев заблагодарувајќи има се на бројните активистки што сте тука, и што ќе бидат тука за Македонија.

Претходно челникот на социјалдемократите во обраќањето зборуваше за мотивите кои како партиско раководство ги добиле од жените да направата промена на власта, потсетувајќи дека обезбедил 67 мандати за формирање на владата.

„… Не сакаат власа да ја предадат, банални изговори изнаоѓаат како само и само власта да не ја предадат, а сакаме со убаво, сакаме со убаво затоа што малкумина сме, роднини паѓаме, толку ни е Македонија. Ајде денеска уште еднаш да испратиме порака со лесно, но пред сé и со убаво, да направиме промена на власта. Oд овде, од оваа говорница, со оваа прекрасна глетка, ајде на нашите политички противници да им испратиме 20-30 илјади убавини, да ги видат зашто убаво да ја промениме власта. Дозволете со кренати знаменца да направиме една убава слика, со убаво се промени власта“, рече Заев упатувајќи им порака на челникот на ВМРО-ДПМНЕ Никола Груевски и шефот на државата Ѓорге Иванов, кој се уште одбива да му го довери мандатот за составување влада.

„Ова денеска е и марш на победата и за Мира. Самохрана мајка, која ризикуваше да го изгуби своето работно место, бидејќи и лани стоеше со нас овде кога зборувавме за промените. Денес Мира заедно со вас ги донесе промените!
Благодарение на жените како Мира, во Македонија ќе има флексибилно работно време за самохраните родители. Ќе го воведеме уште во првите 6 месеци од мандатот. Еднородителските семејства со плата пониска од просечната, ќе ги ослободиме од јавните давачки како што се такса, јавен превоз, општински комунални давачки. Нема да плаќаат надомест во градинка и во основно училиште“, вети меѓу другото Заев.

„Вие сте тоа, дами мои. Вие сте симболот на еднаквоста. Вие дарувате живот. А животот е еден. И може да биде убав. И може да биде квалитетен. И правичен. Во едно општество за сите во коешто сите мајки и сите деца имаат исти права да бидат исто среќни“ додаде истакнувајќи дека за тие права заедно се бореле и се избориле.

„Бидете горди на себе, заради тоа што заедно испишавме историја за Македонија. Дами мои и јас сум горд на сите вас, затоа што имав чест да стојам до жени борци, кои иако имаат семејства, иако беа соочени со предизвиците на режимот, достоинствено застанаа спроти режимот, одлучно му рекоа НЕ и избраа живот. Никој нема право да оди против волјата на мнозинството граѓани на Македонија. Почитувани мајки, ќерки, сопруги, работнички, интелектуалки, од град и од село, Македонки, Албанки, Турчинки, Србинки, Влавки, Ромки, Бошњачки – во Македонија заедно, заедно сплотени донесовме живот. И ќе има живот за сите! Република Македонија ќе биде општество на еднакви граѓани и тоа никој повеќе не може да го спречи“, рече Заев.

Изрази увереност дека демократските процеси се почнати и оти не може да има повлекување од нив.

„Градинките ќе работат во две смени. Клучните државни институции ќе работат во две смени, до 20 часот, за да го олесниме функционирањето на родителите и посебно на мајките. Ќе обезбедиме државна поддршка за зголемување на бројот на жени претприемачи, со што ќе овозможиме жените да водат сопствени бизниси. Ќе овозможиме вработувања на жените во руралните средини и поддршка за жени – фармерки“, рече меѓу другото Заев обраќајќи им се на активистките и поддржувачи на СДСМ./крај/мф/сн