Реагирајќи на неодамнешната изјава на министерката за образование Мила Царовска пратеникот од ВМРО-ДПМНЕ, Игор Здравковски вели дека со укинување на печатените учебници и воведување на дигитални, ја спроведува најдлабоката социјална поделба и дискриминација во последните години во Република Македонија. Според Здравковски, таа ја вади на површина сета лага наречена „Едно општество за сите“.

„Со оглед на тоа дека и самата Царовска кажува дека 1.300 ученици немаат струја, стотици ученици учат алтернативно, на телевизија и со земање печатени материјали од училиштата, стотици немаат уреди за следење на онлајн настава, таа треба да е сосема свесна дека околу 25.000 ученици остануваат на милост и немилост на судбината и финансиската немоќ на нивните родители, од проста причина што овие ученици се припадници на најранливите категории на граѓани“, вели Здравковски.

„Учебниците наместо МОН, според Царовска, ќе треба да ги печатат училиштата, кои од задолжените општини не можат да обезбедат финансии ниту за најосновните потреби, па оттука учебниците ќе паднат на товар на родителите. На оние истите родители кои немаат струја, немаат интернет, а не пак компјутер за своите деца. Образованието веќе нема да биде бесплатно, а социјалната нееднаквост меѓу учениците ќе се зголемува, со тоа и нерамноправноста и булингот, кој и онака е присутен во нашите училишта. Впрочем, видовте што се случуваше овие денови во Велес. Без печатени учебници се врши нехуман експеримент врз идните генерации на Македонија и во превез на модернизација се спроведува разрушување на и онака кревкото образование“, реагира Здравковски.

Тој потенцира дека без класична печатена книга нема вовед во знаење и љубов кон знаењето, ниту пак ќе имаме успешно образование.

„Нема право таа да ни ги осакатува децата, ниту пак Владата, со никакви наводно модерни, а всушност лажни реформи, со трошење на туѓи пари. Ја прашуваме министерката дали под превезот на модернизацијата, покрај тоа што ги укинува и историјата, македонскиот јазик, народното творештво, културното наследство, ги укинува и учебниците, со што без пишана трага на хартија ќе биде многу полесно да се уништи и целиот образовен систем и идентитетот на идните генерации“, праша Здравковски.

Пратеникот од опозициската ВМРО-ДПМНЕ Бојан Стојаноски со нова реакција околу случајот со Саша Богдановиќ. Според Стојаноски, новиот играч на Работнички, Аска, првпат играл за Работнички на 17 април на мечот во СРЦ Кале против Гостивар, каде го има во официјалната статистика.

„Тој е играчот кој требаше да му биде алиби на Богдановиќ за кршењето полициски час, кога беше фатен како седи сам во затворена кафеана која само за него работи. Но како и на Заев, така и на Богдановиќ муабетите им држат неполни 24 часа. Ова е извадок од листа на играчи кои дале кош, а тука е името и на Аска. Богдановиќ да каже како тоа го сместувал Аска, кој четири дена претходно веќе играл за Работнички, ако тогаш го сместувал, каде престојувал Аска тие четири дена, кај него дома или во друг хотел? И зошто преместувањето од едно во друго престојувалиште го правеле во полициски час? Или сепак не се работи за сместување, туку за алиби за кршењето на законите?“, вели Стојановски.

„Молчи Богдановиќ, ама молчи и Пазарна инспекција, ја нема да излезе на терен и да утврди дали и зошто кафеаната работеше за Богдановиќ и како тој се шеташе во полициски час. Го нема ниту МВР, а ниту директорот на БЈБ. Сите молчат, затоа што Богдановиќ, миленикот на Заев, е фатен во дупло кршење на законите“, истакна Стојаноски.

Стојаноски кажа дека наместо да си поднесе оставка и да се извини, Богдановиќ молчи и мисли дека јавноста ќе заборави.

Барајќи оставка пратеникот на ВМРО-ДПМНЕ истакна дека јавноста нема да заборави, зошто секој ден умираат по 30-тина сограѓани, уште илјада се заразуваат, а други се забавуваат по кафеани.

„Нема да заборави затоа што нема вакцини, а вие отворате кафеани во полициски час. Нема да заборави, затоа што 4.600 луѓе веќе не се помеѓу нас“, рече пратеникот од ВМРО-ДПМНЕ.

На онлајн-прославата по повод 30. роденеден на СДСМ, претседателот на партијата, Зоран Заев, истакна дека неговата партија 30 години води храбри, визионерски и државнички политики што водат напред.

Од вонвременскиот 8 септември 1991 година на плоштадот во Скопје до историскиот 30 март 2020 на платото пред седиштето на НАТО во Брисел, СДСМ е нераскинлив дел од секој успех на државата и граѓаните, рече Заев.

„Меѓународното признавање, приемот во ООН, создавањето на македонската армија, Охридскиот рамковен договор, поголемиот степен на децентрализација со територијалната поделба, градењето модерно демократско општество, па сѐ до кандидатскиот статус за ЕУ, договорот од Преспа, решавањето на отворените прашања со соседите, приемот во НАТО, создавање едно општество за сите, одлуката за почеток на преговорите со ЕУ, се трајните државотворни печати на СДСМ“, истакна Заев.

На меѓународен план, како што рече, СДСМ ја вратил државата на патот на евроинтеграциите.

„Без да калкулираме со личните и партиските рејтинзи, го решивме долгогодишниот спор со Република Грција, го заштитивме идентитетот и ги отворивме вратите на ЕУ и НАТО пред кои предолго чекавме. Пред нешто повеќе од една година, во март 2020, ја остваривме тридецениската стратешка цел – Република Северна Македонија стана 30-та земја членка на НАТО, на најсилниот и најголем воено-безбедносен сојуз во светот“, потенцира претседателот на СДСМ.

Според него, СДСМ победува, но и постојано се менува.

„Први во државата организиравме внатрепартиски непосредни избори за претседател на партијата, поставивме нов стандард во внатрепартиската демократија. Промените ќе продолжат и со конгресот, кој ќе се одржи во мај, со нова енергија, со нова политика, ќе продолжиме во реализација на зацртаните цели што носат напредок“, додаде Заев.

Тој потсети дека претстои важен период, особено во надминувањето на последиците од корона-кризата и ставање конечен крај на пандемијата, а со тоа и раст на македонската економија. Како и досега, СДСМ и во овие процеси ќе покаже одговорност, државотворност, храброст и посветеност, истакна Заев.