Политика
Димовски: Предлозите на СДСМ се бледа копија на ВМРО-ДПМНЕ
СДСМ со денешните предлози на закони се обидува да биде бледа копија на ВМРО-ДПМНЕ без никакво покритие и без никаков кредибилитет, изјави во четвртокот во Собранието Илија Димовски, шеф на пратеничката група на владејачката партија откако претходно најголемата опозициска партија поднесе три предлог-закони.
Претходно пратеничката група на СДСМ, откако по долгиот бојкот на парламентот од 1-ви септември според меѓупартискиот договор за надминување на политичката криза се врати во Собранието, најави во четврток дека ќе предложи три закона, со коишто ќе се укине екстерното оценување, ќе се зголеми минималната плата во земјава и ќе се постави контрола во трошењето на парите на граѓаните.
„Зад себе СДСМ нема оставено никакви позитивни политики ниту во областа на работничките права, ниту во образованието, ниту во работата со Буџетот на Република Македонија“, рече Димовски во изјавата за новинарите.
Според него, од фактот дека СДСМ долго време не учествувал во работата на Собранието произлегува и „несериозното“ пристапување кој одговорноста што ја имаат во Собранието на Република Македонија. „Толку се неискусни и желни за поддршка од граѓаните, која ја немаат, што мислат дека носењето на сериозни одлуки е играње на маалска игра“, заклучи координаторот на парламентарната група на ВМРО-ДПМНЕ.
„Како и досега, СДСМ ќе ја лаже јавност, ќе ветува сé и сешто, само да им се допадне на граѓаните, но сите паметиме дека секогаш кога беа на власт не исполнија ниту едно свое ветување. Граѓаните од нив паметат запустени и стари училишта без вложен денар за нивна реконструкција или изградба на нови, паметат 200 илјади невработени и паметат трошење на буџетски пари за бисери на нивните министерки“, рече Димовски
Оцени ден денешните предлози на СДСМ служат само за дневен маркетинг и се без никаква сериозна анализа и можност за реализација. „Ние нема да дозволиме Собранието да биде злоупотребено за промоција на неодговорната политика на СДСМ. Тие самите знаат дека граѓаните не ги поддржуваат заради немањето на доверба во нив, па сега со вакви неиздржани предлози ќе се обидуваат да привлечат барем мала симпатија. Знаеме дека ќе предлагаат се и сешто, но нема да им дозволиме да си поигруваат со интелигенцијата на граѓаните“, додаде Димовски.
Во врска со предлогот за зголемување на минималната плата, претставникот на владејачката партија потсети дека во време на владеење на СДСМ не постоеше минимална плата, иако таа партија имаше предизборно ветување дека ќе ја воведе, како и дека во тој период синдикатите неколкупати бараа воведување на минимална плата и секогаш беа одбивани, и оти во време на СДСМ минималните плати биле 4.000 денари
„Да останеше СДСМ на власт до денес сé уште ќе немаше закон за минимална плата, а денес таа изнесува 9. 590 денари, а за само неколку месеци, од следниот јануари, по сила на важечкиот закон минималната плата секако ќе биде зголемена на 10.080 денари. Дополнително во законот е предвидено секоја година усогласување на минималната плата со просечната исплатена плата“, рече Димовски.
Коментираше натаму дека усвојувањето на предлогот на СДСМ ви значело дека веднаш најмалку 30.000 работници би останале без работа поради зголемените трошоци на фирмите.
„Очигледно е дека СДСМ овој предлог го има доставено без никаква консултација со синдикатите и стопанствениците, бидејќи ако го направеле тоа сами ќе знаеле дека во оваа фаза ваквиот предлог не само што нема да помогне, туку ќе остави 30.000 луѓе на улица или ќе значи затворање на многу фирми и фабрики“, порача Димовски.
Во врска со предлозите за укинување на екстерното тестирање истакна дека станува збор „крајно несериозен и неодговорен“ предлог од кој, како што оцени, се гледа дека за опозициската партија било поважно да добие „ситен политички поен врз грбот на децата“, а воопшто не води сметка за потребата од континуирано и долгорочно подобрување на квалитетот на нашето образование.
„Владејачкото мнозинство не сака да прифати оваа тема да биде тема за партиско препукување и поткусурување. Иднината на децата и нивното квалитетно образование не смее да зависи од сегашната политичка безидејност на СДСМ. Тие сакаат да приберат поддршка иако се свесни дека оваа одлука ќе нанесе далекусежни негативни последици на многу деца поединечно“, порачаа од пратеничката група на ВМРО-ДПМНЕ а Димовски истакна дека од нивна страна ќе бидат прифатени „само сериозни предлози кои ќе го подобруваат образованието без разлика од кого доаѓаат, но нема да прифати вакви политички подметнувања“.
Во врска со предлозите на СДСМ за измени во законите за Буџетот на државата, Димовски посочи дека таквата практика не постоела во ниту една европска држава, карактеризирајќи го предлогот на социјалдемократите како „апсурден и физички невозможен“ бидејќи од Буџетот и од сите институции дневно се вршат илјадници трансакции кон физичките лица и кон правните лица.
„Трето, во насока на максимална транспарентност за приходите и плаќањата од Буџетот, Министерството за финансии на месечна основа објавува фискални табели во кои јавно се публикуваат приходите и расходите во буџетот. Четврто, на крајот на секоја фискална година Министерството за финансии до Собранието доставува завршна сметка во која пратениците имаат целосен увид во извршување на буџетот на државата. Петто, по барање на СДСМ пред неколку години отидовме и натаму, па од минатите избори во изборниот период Министерството за финансии на дневна основа ги објавува расходите на сите институции, а податоците можат да се најдат на интернет страната на Министерството бидејќи со закон определивме должност да се гледа трошењето на државните пари“, заклучи Димовски повторувајќи дека и овој предлог според него покажува дека СДСМ се обидуваат да го променат впечатокот за отсуството од парламентот и неработењето изминатите 15 месеци./крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Македонија е одземена од народот од страна на ДУИ и измеќарите од СДС, поради нивните политики луѓе гореа живи, се случуваа трагедии и иселување
„Македонија е одземена од народот, за жал наместо државата да му припадне на суверенот, а тоа е народот на кој што и треба да му припаѓа, државата во нашиот случај е украдена од народот од страна на една мала група на луѓе кои од денеска уште неколку недели ќе бидат во владата на Република Македонија. Таа група на луѓе ја предводат првенците од ДУИ на чело со Али Ахмети, Артан Груби, Бујар Османи и малкумина измеќари од СДСМ кои сеуште се таму слепи послушници на политиките на ДУИ и Али Ахмети“, истакна претседателот на ВМРО-ДПМНЕ Христијан Мицкоски на денешниот митинг на ВМРО-ДПМНЕ во Зрновци.
Претседателот Мицкоски потенцираше дека овие луѓе се виновни за неправдата, криминалот, опустошувањето, понижувањето, за целото зло кое и е нанесено на Македонија во изминатите 6 и половина години.
„Ќе ве потсетам, сетете се поради нивната неодговорна политика живи луѓе гореа во модуларната болница во Тетово; поради нивната криминална политика и начин на кој ги издаваат дозволите за да туристичките агенции управуваат со возилата десетици луѓе за жал го загубија својот живот не далеку од главниот град на нашиот источен сосед во трагедијата на „Беса транс“, се сеќавате колкумина од нив ветуваа дека ќе донесат живот какви ти се не знам услови за работа на земјоделците, загарантиран откуп по загарантирана цена, а 6 и половина години нивите ни останаа неорани, младите си заминаа, земјоделците се помалку се занимаваат со земјоделието затоа што не само што нема загарантиран откуп туку и тоа малку што денес се обработува и произведува нема кој да го купи“, дециден е Мицкоски.
Претседателот Мицкоски истакна дека дури и на СДСМ им е јасно дека победник на следните претседателски и парламентарни избори ќе бидат ВМРО-ДПМНЕ и коалицијата Твоја Македонија и Гордана Силјановска Давкова,
„Затоа ни е потребно ова обединување, затоа ни е потребна масовна излезеност. Сите заедно најпрво на 24 април да ја направиме Македонија горда, а потоа на 8 мај да ја направиме и горда и твоја со победа на Гордана Силјановска Давкова и ВМРО-ДПМНЕ со коалицијата „Твоја Македонија“, рече Мицкоски.
Македонија
Пендаровски: Тие ја сакаат Македонија само кога се на власт, ние ја сакаме и кога сме и кога не сме, бидејќи таа ни е единствената мајка
Во рамки на изборниот караван, кандидатот за претседател Стево Пендаровски денеска се сретна со граѓаните на село Белчишта, општина Дебрца и со граѓаните на општина Вевчани.
Говорејќи за начинот на владеење на опозицијата кога беше на власт, Пендаровски во село Белчишта истакна дека во нивно време имаше две групи на граѓани, односно нивни и наши, симпатизери на ВМРО и останати. И дека за разлика од сегашната владејачка структура која не направи крупни стратешки грешки со кои би била загрозена државата, ВМРО – ДПМНЕ и крупни и ситни грешки.
„На опозицијата и пречи што Македонија оди напред, кон развиените земји бидејќи ние сме заслужни за тие успеси, а не тие. Тие ја сакаат Македонија, само кога се на власт, а ние ја сакаме и кога сме и кога не сме на власт, бидејќи таа ни е единствената мајка“, рече Пендаровски.
Од Вевчани, кандидатот за претседател Стево Пендаровски порача дека луѓето знаат да проценат дали некој мисли само на себе и на својот џеб или мисли на нашата иднина. Зборувајќи за неговата против кандидатка, која не се појавила на митингот во Вевчани најавен за пред два дена, Пендаровски истакна дека не ни треба претседател кој има некој над себе.
„Не можам да замислам да кажуваш дека си претседател на сите, а да има некој над тебе, некој кој ќе ти кажува како да работиш. Таков е случајот со Силјановска и со Мицкоски. Овој што ја поддржува сака да биде и претседател и премиер. Ајде да го промениме уставот и да му овозможиме да биде и претседател на Собрание истовремено. Барем ќе заштедиме пари, а за ефектите понатаму ќе видиме“, додаде Пендаровски.
Денеска е предвидено Пендаровски да се обрати на митинзи и пред граѓаните на Струга и на Охрид.
Македонија
Димитриевски од Струга: Во Македонија има луѓе што можат да ги обединат граѓаните за суштестените прашања
Претседателскиот кандидат на Движењето ЗНАМ – За наша Македонија, Максим Димитриевски денеска беше во Струга.
„Струга е град сличен на градот од кадешто доаѓам. Мултиетничка средина, во која треба да се сакаме и почитуваме и да живееме заедно. Но притоа не смееме да дозволиме политиката да ги дели граѓаните и да создава чувство на граѓани од втор ред. Сведоци сме дека во нашата држава се случуваат големи неправди, а особено спрема припаданиците на македонскиот народ. Се случува еден феномен на партизација на целиот систем од оние што со пушка влегоа во Собрание, па потоа во извршната власт, а сега гледаме како ја запоседнуваат и судската власт и ги користат останатите, наводно големи партии, како привезок во коалиција, кои притоа се ставааат во целосна функција на ДУИ“.
„Токму затоа не сакам да ја оставам државата да расте и да се развива така. Затоа се одваживме да се вратиме таму каде што припаѓаме, на крушевските и АСНОМ-ските корени. Ние сакаме во суштина да ги промениме работите во
Македонија “.
Димитриевски рече дека Движењето ЗНАМ е нов политички субјект којшто сака да ги обединува, а не да ги дели граѓаните. Првенствено Македонците, а потоа и сите етнички заедници заедно. Тој посочи дека треба да се научиме како да живеме и да градиме реален соживот. Бидејќи, како што рече, соживот е да имаш права, но и обврски. Потребно е да има взаемна почит.
Тој нагласи дека целиот систем е креиран така за да биде поделен на два блока, кај македонскиот и два во албанскиот блок. И додека албанскиот блок, односно политичките субјекти, за националните прашања е секогаш единствен, македонскиот пука по сите шавови.
„Мора да се најдат луѓе коишто ќе го обединат народот. И затоа ќе ви кажам, Максим не може тоа да го направи сам. Вие сте ми потребни и не ме оставајте сам.“ потенцира тој.
„Доколку ја добијам поддршката од граѓаните на овие претстојни избори, ќе бидам Претседател на сите граѓани на Македонија. Првото нешто што ќе го направам е ќе понудам на сите политички субјекти коишто ќе ја сочинуваат идната власт, а дополнително и на опозицијата, да потпишат национална платформа за македонските национални интереси, бидејќи нам ни е тоа повеќе од потребно во овој момент“.
Тој додаде дека доколку биде избран за Претседател на државата, согласно неговата предизборна програма ќе работи на формирање на едно независно тело од експерти од Европската унија коишто ќе треба да се посветат на работење и анализа на сите пресуди од Стразбур против Република Бугарија за обесправеноста на македонските организации таму“’.
Димитриевски, исто така, рече дека согласно Програмата ќе формира и експертски тим, од наши и надворешни експерти кој ќе има за задача да поработи и на времената рамка којашто е во сила во моментот и на нејзина адаптација на општо прифатливите и општествените услови во Македонија, согласно желбата на македонските граѓани.
„Недозволиво е како народ и како држава да бидеме негирани. Ние постоиме во континуитет и како народ и како јазик, со сопствена историја, култура и тоа е одраз на заложбите и борбите на нашите претци. Недозволиво е некој во 21 век, којшто е член на Европската унија да не негира во континуитет. Затоа сметам дека следната политичка елита, која и да е на власт, а ќе биде таа на којашто граѓаните ќе и дадат мандат, треба сериозно да се посвети на ова поле, дополнително да ја разработи оваа преговарачка рамка и со Европската унија и ова билатерало прашање да го решиме на релација Скопје- Софија. Македонија мора да продолжи на патот на евроинтеграциите, но не по секоја цена, бидејќи мора да влеземе во Европската унија со крената глава, како Македонци и како засебна нација“, потенцира Димитриевски.
Караванот на ЗНАМ денеска беше и во Вевчани, каде што Димитриевски имаше средби со граѓани, а вечерва ќе биде во Охрид.