Политика
Милошоски: Срамна одлука на Јанева, ВМРО-ДПМНЕ повеќе не и верува
Она што Зоран Заев го нарача и го нареди, Верушевски да се ослободи од притвор, Катица Јанева го исполни. Срамна и жална е леснотијата и ароганцијата со која Јанева поданички и додворувачки побрза да му удоволи Заев, изјави во петок Антонио Милошоски, член на ИК на ВМРО-ДПМНЕ.
„ Одлуката на Јанева да не побара продолжување на притворот на Зоран Верушевски, првоосомничен во случајот Пуч, е скандалозна, неправична и многу опасна. Дали Зоран Верушевски објасни на судот кој бил чадорот од скајп комуникација? Дали Зоран Верушевски објасни на судот што мислел заедно со другите осомничени кога меѓусебе најавуваа граѓанска војна во Македонија по урнек на Украина и леење крв по улиците? Зоран Верушевски не откри ништо од ова на судот, а Катица Јанева го ослободи? Затоа оваа одлука е опасна“, рече Милошоски.
Според него, постојат сериозни основи на сомнение дека со ваквата одлука на Јанева, тој може да изврши повторување на делото за кое се сомничи и може да изврши влијание врз сведоците.
„Имајќи во предвид дека јавно е признаено дека Верушевски и Заев договарале бегство на Верушевски од Република Македонија, повеќе е од извесна опцијата дека сега кога Верушевски не е во притвор, тој може да стане недостапен на органите на прогонот, особено во ситуација кога министер за полиција е генералниот секретар на СДСМ. Извесност на опцијата за бегство од земјата е третиот основ по кој задолжително се определува притвор“, додаде Милошоски.
Членот на ИК на ВМРО-ДПМНЕ смета дека со оваа своја одлука, Катица Јанева наместо во интерес на правдата, делува во интерес на попречување на правдата.
„Со оваа одлука, Катица Јанева настапи како бранител на Зоран Заев и Верушевски, обвинети во истиот случај. Со оваа одлука Јанева нанесе непроценлива штета на правниот поредок во Република Македонија на правната пракса, и оваа одлука претставува невиден срам за целокупната јавно-обвинителска професија, и за тој срам е одговорна лично таа и тоа е факт кој ќе остави трага и кој нема да може да се избрише, но тој факт ќе биде поврзан лично со неа и со никој освен неа и таа треба да биде свесна за ова што го прави“, порача Милошоски.
Негова оценка е дека Јанева од денес во очите на целокупната јавност претставува само класичен партиски апаратчик на СДСМ.
„Од овие причини кои се очигледни за целокупната јавност, а кои потврдуваат и јасно прикажуваат тесна ко-ординираност на постапките на Јанева со Заев, и она што е најскандалозно извршување на наредбите кои ги дава Заев од страна на Јанева, ВМРО-ДПМНЕ веќе не верува во независноста на Јанева“, рече Милошоски.
Тој додаде дека ВМРО-ДПМНЕ изразува сериозна резерва кон секој чекор кој ќе го преземе Јанева во иднина, како во поглед на нејзината непристрастност, така и во поглед на законитоста на нејзините дејствувања.
„ВМРО-ДПМНЕ смета дека секоја наредна постапка на Јанева ќе биде, како и досега, директно мотивирана од политичката агенда на СДСМ и Заев, и дека наместо да дејствува непристрасно и објективно во функција на законот, таа ќе ги исполнува партиските наредби на СДСМ и ќе работи единствено во функција на политичкиот интерес на криминогеното раководство на СДСМ“, потенцираше Милошоски.
Според него, Катица Јанева ќе биде директен соучесник во противправни и кривични дела доколку Верушевски избега.
„Катица Јанева ќе биде соучесник во кривични дела доколку Верушевски располага со незаконски стекнатите материјали. Јанева освен тоа што го крши законот во делот на не постапување во врска со материјалите кои произлегуваат од незаконското следење на комуникации, а во моментов се кај Заев, таа прави и ново дело и бесрамно се става во функција на лидерот на опозицијата“, рече Милошоски. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски од Чаир: На Македонија ѝ треба обединување и единство, а не поделби, владата на ВМРО-ДПМНЕ ќе вложи 1 милијарда евра за проекти во сите општини
Се чувствува победничка атмосфера и енергија, тоа е важно за сите нас и ни дава мотив да продолжиме посилно да се бориме. Овие денови кои ни преостануваат треба максимално да се мобилизираме, а најновите анкети кои ги добив утрово велат дека ќе биде голема победата и на 24 април и на 8 мај, изјави претседателот на ВМРО-ДПМНЕ, Христијан Мицкоски на митингот во Чаир.
Мицкоски истакна дека сега во Македонија имаме политичка гарнитура која повеќе од две децении е на власт, тоа се ДУИ чија суштина се поделби и грабеж на народот.
– Кога ќе анализирате која е суштината на ДУИ, Али Ахмети и Артан Груби, Бујар Османи, Талат Џафери и останатите, кај нив нема ништо посебно тие само го делат народот по етничка основа и така опстојуваат. Дали некој може да се сети некоја добра работа која Али Ахмети и Артан Груби ја имаат направено, но можам да кажам десетици лоши работи, рече Мицкоски.
Мицкоски нагласи дека сега ДУИ сериозно ќе бидат изненадени на овие избори, а им се познава нервозата затоа што после 8 мај треба да одговараат за сето она што му го направија на народот, за целиот грабеж.
Мицкоски се осврна на проектите кои ги планира идната влада од ВМРО-ДПМНЕ и посочи дека се планира да се инвестира 250 милиони евра секоја година во општините, 1 милијарда во 4 годишен мандат.
– Во Чаир ќе има висока сума, еден од проектите е проширување на булеварското решение на влезот од Бит Пазар кон Чаир и тоа мора да се направи и го повикувам градоначалникот да се пријави со повеќе проекти. Тоа ќе додаде вредност во квалитетот на живеење. На Македонија и треба обединување и единство не поделба, потенцираше Мицкоски.
Мицкоски додаде дека идната влада на ВМРО-ДПМНЕ планира да отвори нови 55.000 работни места, да функционира со владеење на правото на целата територија и нема да има територии каде ќе владејат шерифи.
Да обезбедиме пристојни услови за поголем инвестициски бран и од странство и од домашни инвеститори за да може децата да останат тука. Мораме и тие кои си отидоа да ги вратиме назад. Да обезбедиме надеж. Ве повикувам на 24 април сите да се обединиме околу број 2 и да гласаме за Гордана Силјановска Давкова, а потоа да се обединиме и заедно на 8 мај да испишеме историја за коалицијата Твоја Македонија предводена од ВМРО-ДПМНЕ, изјави Мицкоски.
Македонија
Доц. д-р Бобан Карапејовски: Ќе обезбедиме вработување на најдобрите 200 студенти, како и стипендии од 500 евра месечно
Носителот на листата на кандидати за пратеници во ИЕ 1, Бобан Карапејовски на денешната прес конференција рече дека во програмата на Движењето ЗНАМ – За наша Македонија за парламентарните избори, наречена „Проглас за достоинствена Македонија“ еден од приоритетите се образованието и науката, кои се суштински за градењето силна и просперитетна држава.
„Во Прогласот за достоинствена Македонија на Движењето ЗНАМ – За наша Македонија, предвидовме два сегменти: зголемување на достоинството на вработените во образованието и во науката и поставување нов систем, со кој овој сектор ќе се врати во фокусот и ќе помогне во создавањето функционално писмен и високообучен кадар, како и продлабочување на
научните истражувања“, рече Карапејовски и додаде: „Во однос на првиот постулат, достоинството на вработените во образовниот сектор, е предвидено платите на наставниците и на професорите да се зголемат до 100 % од актуелните. И, тоа е најмалку што можеме да направиме за да му го вратиме угледот на учителот и да ги привлечеме најдобрите да бидат
даскали на нашите деца“.
Тој потенцира дека за најдобрите студенти ќе се обезбедат стипендии во износ од 500 евра месечно, а за најдобрите двесте студенти вработување во научните и во институциите на системот.
„Партиските вработувања мора да запрат! Не смее партиската книшка да биде услов за вработување. На универзитетите и во државните институции треба да работат најдобрите за најдоброто за сите нас. Ни треба научен подмладок веднаш, како и
ревизија на условите и зголемување на квалитетот на акредитираните универзитети, кои се множат на секој чекор, а не даваат квалитет“, рече тој.
Карапејовски рече дека наставните програми и планови ќе се усогласат со модерните технологии и достигнувања и појасни дека ќе се изгради систем што ќе поттикнува креативно, аналитичко и логичко размислување кај учениците, но и ќе поттикнува креативност во областа на бизнисот и на финансиската едукација. Учебниците ќе бидат усогласени со новите наставни планови и програми и напишани од најдобрите автори, навреме доставени до учениците.
Тој исто така рече дека издвојувањата од буџетот за науката ќе се зголемат, а ќе има и посебни стимулации за оние што успеваат да објавуваат во најпрестижните списанија и да соработуваат со колегите од најдобрите светски универзитети, како и посебни субвенции за таканаречните национални дисциплини.
Македонија
Пендаровски: Ги знам нивните лажни анкети, ги знам и реалните анкети и реално ви кажувам дека на 8 мај победуваме!
На само неколку дена пред првиот круг на гласање, од Скопје кандидатот за претседател Стево Пендаровски искажа верување дека по повеќе од три децении независност, македонските граѓани многу добро знаат да препознаат чија програма е реална, а која е во расчекор со времето во кое живееме.
„Овој претседател и оваа политичка гарнитура никогаш не давале лажни надежи и ветувања за брза реализација на стратешките цели на државата. И денес пред вас, не велам дека Македонија за само неколку години ќе биде најразвиената држава во Европа, не ветувам дека целиот тој процес ќе трае само неколку месеци, но, говорам и повторувам секаде дека најголемиот ризик е ако на изборите им дадеме шанса на оние за кои претходно веќе видовме како владеат со луѓето цели 11 години“, истакна Пендаровски.
Пендаровски денеска повика на масовна излезност на 24 април и на 8 мај, за како што рече, да не се враќаме во режим.
„Ги знам нивните лажни анкети, ги знам и реалните анкети и реално ви кажувам дека победуваме на 8 мај. Со заокружување на бројот 1 продолжуваме кон Европа и кон развиениот свет и дефинитивно не се враќаме назад во режим и заробена држава“, рече Пендаровски.