Македонија
Преткривична пријава за штипската фирма „Коле Транс“, дали градоначалникот Захариев е главната цел?
Поради основано сомнение за сторено кривично дело бесправна експлоатација на минерални суровини – песок, Основното јавно обвинителство во Штип покрена преткривична постапка против штипската фирма „Коле транс“.
Од Штип, Иван Бојаџиски
Според основниот јавен обвинител Ристе Бојаџиев, обвинителство дало налог на штипската полиција да го истражува случајот. На нашето барање да даде повеќе информации во врска со овој случај за кој подолго време се говори во штипската јавност, обвинителот Бојаџиев ни рече дека тоа било сé што во овој момент тој од името на функцијата која ја обавува можел да го каже за јавноста.
И додека штипската јавност со нестрпливост чека да ја виде разврската на случајот, во градот под Исарот е познат фактот дека токму фирмата „Коле транс“, во времето на градоначалникот Илчо Захариев, се етаблира како фирма која извршува најмногу работи за сметка на општината во изминатите 3,5 години. Оваа фирма, по договор со градоначалникот, обезбедува(ла) песок и друг градежен материјал, изведувала работи на асфалтирањето на улици низ градот и селата (лакирање на улиците, како што милуваат да кажат штипјани), и извршувала повеќе други работи од областа на градежништвото. Многупати се слушнати информации дека песок бил ваден без претходно да се обезбеди концесија за локалитетот на кој се работи, а во последниот случај имало укажувања дека високи профити се извлекувани и од вадење песок на локалитет кој на археолошката карта бил означен како зона на која не можат да се изведуваат никакви работи без претходна согласност на Заводот за заштита на спомениците на културата и музеј Штип. Заради документирање на случајот полицијата од „Коле транс“ ги одзела службените компјутери.
Во однос на овој пикантен случај, во Штип се говори дека ќе допре и до градоначалникот Захариев како наредбодател на незаконските дејанија. Во градот протекоа информации и за тоа дека Игно Иванов, директор на фирмата „Стипион“ , јавно претпријатие кое во името на општината стои како нарачател на поголемиот дел градежни зафати во Штип и општината, во однос на овој случај двапати бил повикуван на распит во полицијата и дека полицијата го одзела службениот компјутер и на градоначалникот Захариев. Во овој случај, според упатените, се работи за работи запечатени со милионски суми, секако во евра.
„И ние ги слушаме таквите информации низ градот, но кажавме дека нема да коментираме се додека надлежните институции одговорно не си ја завршат работата во однос на овој случај“, изјави Владимир Милошев, претседател на Општинската организација на СДСМ во Штип./крај/мф/иб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ванковска: Преспанскиот и бугарскиот договор се колонизаторски договори
Професорката Билјана Ванковска и претседателски кандидат на Левица во Фејсбук статус истакнува дека има разочарани млади луѓе кои мислат дека кога политичарите говорат за прашањата за Преспа и другите договори, тоа е само губење време и одвлекување на вниманието од реалните проблеми на земјата, сиромаштијата, невработеноста, корупцијата и сл..
„Точно е! Мнозинството граѓани едвај врзуваат крај со крај, очајни се од непостоење здравствен или образовен систем, сакаат развој а не вртење кон минатото.
Она што овие млади (а инаку умни) луѓе уште не го научиле е дека геополитиката (која ни ја наметнаа) е тесно поврзана со геоекономијата. Би очекувала својот критички ум да го свртат кон, на пример, поврзаноста на нашата колонијална положба со Преспа и Митилинеос. Или дури и со Бехтел и Енка… и уште многу ситни и не толку ситни зделки на македонските компрадорски елити кои нѐ продадоа како на сточен пазар, ни ги одзедоа и идентитетот и достоинството, ама и ги наполнија своите џебови врз база на бајките за ЕУ интеграција со смена на името и уставот.
It’s all about geopolitics, stupid!“, пишува Ванковска.
Според неа, Преспа и Бугарскиот договор не се само национални, идентитетски прашања, туку и класни и социоекономски. Ние, додава таа, сме во класично ропство, а принудени да аплаудираме на колонизаторите кои не се тука за наше добро, туку за свои интереси.
Македонија
ВМРО-ДПМНЕ: Идната наша влада ќе изгради нов објект за Клиничкиот центар во Скопје и ќе ја доизгради Клиничката болница во Штип
Идната влада на ВМРО-ДПМНЕ ќе изгради нов објект за Клиничкиот центар во Скопје и ќе ја доизгради Клиничката болница во Штип, велат од ВМРО-ДПМНЕ.
„Главен фокус на идната влада во здравството ќе биде укинување на дуализмот. Ќе се спроведе спојување на клиниките во еден интегриран Универзитетски Клинички центар „Мајка Тереза“. Интегриран Клинички центар во Скопје ќе значи подобри услуги за пациентите и намалување на трошоците при јавните набавки, кои ќе бидат вршени централизирано. Владата предводена од ВМРО-ДПМНЕ ќе го заокружи целиот процес со Клиничкиот центар во Скопје со изградба на нов објект“, дополнуваат од ВМРО-ДПМНЕ.
Како што велат, истовремено владата ќе биде силно фокусирана и на довршување со градбата на Клиничката болница во Штип.
„По изградбата на Клиничката болница истата ќе биде опремена со најсовремена опрема и истата ќе се доекипира со соодветен медицински кадар. Владата на ВМРО-ДПМНЕ ќе го има здравјето на граѓаните на прво место, затоа континуирано ќе вложуваме во здравството. Време е да ја вратиме државата на народот“, завршуваат од ВМРО-ДПМНЕ.
Македонија
Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат Асаф Еисин, велат од ВМРО-ДПМНЕ
Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат, Асаф Еисин, кои е вклучен во кампањата на Стево Пендаровски и СДС, велат од ВМРО-ДПМНЕ.
„Како и секогаш Пендаровски, Ковачевски и СДС кога се фатени во скандал или криминал се служат само со навреди, лаги и манипулации наместо да дадат конкретни одговори на релевантни прашања поврзани со скандалот. Повеќе од десетина дена, откако признаа дека се среќавале со контроверзниот израелски консултат Еисин, нема одговор како тој е ангажиран во нивната кампања, како го исплаќаат и дали тој е ангажиран за црна кампања, кампања на поделби и етикетирања. Јавноста заслужува одговори како овој балкански мешетар СДС и Ковачевски го исплаќаат, бидејќи во ниту еден извештај за финансиско работење неговиот ангажман не е заведен, и дали истиот е плаќан со црни пари, кеш на рака, од криминалните тендери на власта, пари украдени од граѓаните“, дополнуваат од ВМРО-ДПМНЕ.
Како што посочуваат, од СДС треба да одговорат, дали покрај ангажирањето на Еисин, во Македонија се дојдени и две други лица, кои се локална поддршка на консултантот на Еисин, кои се сместени во центарот на Скопје во еден хотел и веќе активно работат на црната кампања на СДС за претстоините избори.
„Ги повикуваме надлежните институции веднаш да се одважат и да се ангажираат за расчистување на овој скандал, да го откријат финансирањето на консултантот и вклучувањето на странски државјани во кампањата за изборите. Време е за промени. Следува одговорност за секој сторен криминал, за секој скандал и за секое крадење на народни пари“, завршуваат од ВМРО-ДПМНЕ.