Движењето ЗНАМ за Наша Македонија со остра реакција на соопштението на СДСМ, обвинувајќи го актуелното раководство на партијата за криминал, корупција и, како што наведуваат, „бугарофилски политики“. Од партијата велат дека СДСМ преку, како што оценуваат, „лаги и политички памфлети“ се обидува да го дефокусира вниманието на јавноста од сопствените проблеми и падот на довербата.

Во реакцијата, ЗНАМ тврди дека постапката поврзана со деталниот урбанистички план во Куманово е целосно законска и транспарентна, посочувајќи дека иницијативата била поднесена од компанијата ЛИДЛ, а документацијата била јавно достапна во системот е-урбанизам. Од партијата нагласуваат и дека за предметниот опфат постои важечки ДУП уште од 2010 година.

Според ЗНАМ, вистинскиот проблем за СДСМ е што, како што наведуваат, во Куманово веќе осум години не функционирал „рекетарскиот модел на владеење“. Во реакцијата се истакнува дека градот се развива, се модернизира инфраструктурата и се вложува во повеќе области.

Партијата застана и зад лидерот Максим Димитриевски, за кого велат дека имал храброст да се спротивстави на, како што наведуваат, „штетните политики и националните понижувања“. Во реакцијата, претседателот на СДСМ, Венко Филипче, повторно е прозван за наводни бизнис-релации во Бугарија, при што од ЗНАМ поставуваат повеќе прашања поврзани со фирмата POWER i8 Ltd. и, како што велат, компании поврзани со семејството Заев.

„Молкот на СДСМ за овие прашања е најголемото признание“, велат од ЗНАМ, додавајќи дека партијата ќе остане доследна на принципите на Илинден и АСНОМ и, како што наведуваат, нема да дозволи државата повторно да биде туркана кон „политичка сервилност и национални отстапки“.

Основното јавно обвинителство Скопје поведе постапка и предложи мерка притвор против 45-годишник осомничен за кривично дело – Телесна повреда според член 130 став 2 во врска со став 1 од Кривичниот законик. Осомничен е дека вршел семејно насилство во Кисела Вода при што телесно ја повредил неговата поранешна партнерка.

Како што се наведува во соопштението од ЈОРСМ, ја извлекол на сила од домот во кој живеела жртвата, ја влечел и туркал до неговиот дом во близина, ја внел внатре и физички ја нападнал, удирајќи ја со шлаканици, клоци и со мобилен телефон. На жената и нанел телесни повреди – рани и хематоми по главата и телото.

На осомничениот од страна на судија на претходна постапка претходно му биле определени мерки на претпазливост за насилство извршено кон неговата мајка и снаа за брат. Последниот настан укажува дека за кратко време тој ги повторува насилничките дејствија, односно манифестирал насилничко однесување и спрема неговата поранешна партнерка. Во исто време, постои ризик од бегство со цел да избегне кривична одговорност за сторените кривични дела, па јавниот обвинител сега од судот побара да определи најстрога мерка – притвор за осомничениот.

Во рамките на ЕУРОМЕЛАНОМА 2026 денеска во Градскиот парк во Скопје се одржуваат бесплатни прегледи на бемки, дамки и сомнителни промени од врвни дерматолози, кои исто така ги советуваат граѓаните за заштита од сонце и препознавање на ризични промени, но и совети за правилна УВ – заштита. До пладне беа прегледани над сто пациенти.

-Целта на денешниот настан е промовирање на месец мај како месец посветен на превенција, рано откривање и лекување на кожните карциноми со посебен акцент на малигниот меланом, изјави примариус д-р Зорица Зафировиќ додавајќи дека имна многу заинтересирани граѓани за нивната превентивна акција.

Примариус д-р Зафировиќ изрази задоволство што се зголемува свесноста кај граѓаните во однос меланомите и кожните болести.

-Ја постигнуваме целта за раното откривање и детекција на какви било сомнителни промени со посебен акцент на кожните карциноми и информираме и ги упатуваме во нашите институции за понатамношен третман. Неколкумина беа реално, рече таа.

Во изминативе години токму преку овие акции се откриени неколкумина болни со канцер на кожа, но лекарите велат дека свеста кај граѓаните е зголемена и оти оние што се сомневаат дека имаат некакви проблеми доаѓаат на кожни прегледи.

Бројот на лицата заболени од меланом секоја година се зголемува, а причината за тоа, како што вели проф. д-р Силвија Дума од Клиниката за дерматологија е тоа што се случува во природата, но и навиките на младите луѓе, како што се солариумите, изложеноста на сонце…

-Ние работиме нели на таа превенција за фотопротекција, да укажеме дека таа протекција започнува од нулта година, рече проф. д-р Дума. Според неа, се поретки се случаите пациенти да се јавуваат доцна на преглед кај нив.

Меланомот и останатите форми на рак на кожа може да се појават кај секого, но кога се окриваат навреме, шансите за успешно лекување се значително поголеми.

Во рамки на ЕУРОМЕЛАНОМА 2026 бесплатни прегледи се организираа и во државните и приватни болници и здравствени домови.