Македонија
Се одржа конференцијата „Next generation wireless“
Во текот на претходниот викенд, Сеавус и Сеавус едукативен и развоен центар (СЕДЦ) ја одржаа својата прва конференција на тема „Next generation wireless“ каде се зборуваше за идните технологии за безжична комуникација. Настанот го проследија преку 200 присутни, а говорници беа еминентни експерти од академската и бизнис заедница во регионов и во светот. Преку нивните презентации, на македонската јавност им ја преставија визијата на светските компании и истражувачки центри за телекомуникациските технологии кои во овој момент се во рана фаза на дефинирање и истражување, а кои ќе се презентираат во јавноста во текот на следната декада.
Станува збор за телекомуникациските технологии од петтата генерација на ГСМ технологијата и технологии за пренос на податоци со многу голема брзина со користење на радио фреквенции од подрачјето на утра високи фреквенции од редот на 60GHz, како и преглед на трендовите на користење на телекомуникациските услуги понудени од операторите во Македонија.
Конференцијата започна со исклучителната презентација на Игор Тасевски од Ериксон, Шведска, кој говореше за достигнувањата во изработка на пробни решенија за 5G од Ериксон и нивните плановите за освојување на оваа технологија во иднина. Во текот на неговото излагање присутните имаа можност од прва рака да дознаат како ќе се одвиваат развојните чекори за целосно дефинирање на 5G технологијата и нејзино промовирање пред светската јавност во 2018 г., додека пак, нејзина комерцијализација се очекува да се случи во текот на 2020 г.
На презентацијата на Тасевски се надоврза д-р Лилјана Гавриловска, Раководител на Институтот за телекомуникации при ФЕИТ, која е врвен експерт од областа на телекомуникациите во нашиот регион, со интернационално искуство во истражување на најновите технологии преку работа на практични проекти и учество во академски истражувачки тимови во последниве две децении. Д-р Гавриловска говореше за методите за модулација на сигналите и особеностите на самиот комуникациски протокол, визијата за оваа технологија и најзначајните предизвици за разрешување на мрежите за радио пристап и централните мрежни терминали.
Третиот говорник, д-р Никола Рендевски од ФИКТ, Битола, говореше за предизвиците и предностите на комуникациските системи со краток ранг кои работат на 60GHz и нивната примена во воени и комерцијални цели, како и предизвиците кои претстојат за целосна комерцијализација на оваа технологија и нејзина примена во секојдневието.
Во вториот дел од конференцијата имавме можност да ги слушнеме Лазар Динов и Горан Јорданоски од Македонски Телеком, кои говореа за трендовите кои се промовираат преку последната верзија од 4G технологијата, навиките на корисниците на мобилна телефонија во Македонија, како и предизвиците со кои се соочуваат инженерите Македонски Телеком, за да ги задоволат потребите на сé понапредните корисници на нивните услуги.
На крај на целиот настан, имавме уникатна можност да ја проследиме презентација на д-р Александар Ристески од Институтот за телекомуникации при ФЕИТ, кој ни ја престави визијата за безбедносните протоколи кои би се имплементирале во 5G технологијата и предизвиците кои ќе произлезат од оваа имплементација.
Преку овој настан, Сеавус и СЕДЦ, заедно со говорниците на конференцијата, имаа можност да покажат дека и во нашиов регион се работи на најнови технологии, постојат кадри и услови за работа на решенија кои се носат со најновите трендови на светско ниво и остваруваат константна соработка со врвните истражувачки центри и технолошки-напредни компании во светот./крај/мф/би
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.