Македонија
СЈО по една година – многу очекувања, многу отворени случаи, обвиненија нема
Помина една година откако јавноста дозна за Катица Јанева, кога преку ноќ сите четири политички партии се согласија токму таа да биде Специјален јавен обвинител кој треба да го расчисти криминалот во државава по објавувањето на прислушуваните разговори.
Ова име на 15 септември минатата година беше непознато за целата македонска јавност и за медиумите, но за многу брзо време стана едно од најспоменуваните имиња во препукувањата меѓу политичките партии. За владејачката партија Јанева и нејзините обвинители работат за СДСМ, а на опозициската СДСМ којашто и предаде на Јанева 546.948 фајлови со прислушувани разговори, таа е надеж за, како што велат, враќање на правната држава. На годишнината од изборот на Јанева, Специјалното јавно обвинителство треба да го објави вториот шестмесечен извештај за својата работа. ОД СЈО не ни одговорија дали Јанева ќе го презентира јавно извештајот или како и минатиот пат, тој ќе биде само доставен до Собранието и Советот на јавните обвинители и јавно објавен на веб страницата на Обвинителството. Пред шест месеци Јанева, токму во првиот извештај најави дека во најскоро време може да се очекуваат првите обвиненија, но оттогаш поминаа шест месеци и досега не е покренато ниедно обвинение. Сегашни и поранешни функционери беа на распити во Основниот суд Скопје 1, но и во Специјалното јавно обвинителство, а само еден од осомничените функционери, градоначалникот на Битола, Владимир Талески е во куќен притвор. Сите други осомничени функционери кои беа на распит се на слобода, иако за некои од нив СЈО бараше притвор или мерки за претпазливост. Нема информации колку вкупно истражни и предистражни постапки има отворено СЈО. Во првите шест месеци СЈО реферираше дека во првите шест месеци Обвинителството отворило вкупно 150 предмети.Триесет од предметите се во истражна постапка, а 120 се предистражни постапки.Специјалното јавно обвинителство досега јавно презентираше пет случаи кои се наоѓаат во истражна постапка и за овие случаи побара мерки за обезбедување на дел од осомничените. Првиот случај „Титаник“ во којшто првоосомничени се поранешната Министерка за внатрешни работи, Гордана Јанкулоска, поранешниот Министер за транспорт и врски Миле Јанакиески и генералниот секретар Кирил Божиновски беше изненадување за јавноста. Јанкулоска и Јанакиески тогаш се појавија во судот, но не додоа изјави. Обвинителството за нив бараше притвор, но Судот ги одби барањата на СЈО. Обвинителството ги товари дека целосно ги криминализирале изборите во 2012 година со незаконско издавање лични карти и вметнување во избирачкиот список на лица кои по никој основ не смеат да бидат. На изборниот процес се влијаело и со насилство, поткупи, злоупотреба на државни капацитети за партиски цели, злоупотреба на медиумите, злоупотреба на јавните фондови и незаконско финансирање на изборната кампања.Обвинителството бараше мерки за претпазливост против шестмината осомничени во случајот „Тортура“, односно за нечовечкото постапување при апсењето на поранешниот Министер за внатрешни работи и лидер на „Обединети за Македонија“, Љубе Бошкоски.За првоосомничениот во овој случај, поранешниот директор на Управата за безбедност и контраразузнавање, Сашо Мијалков немаше барање за притвор бидејќи Обвинителството смета дека не постои опасност од бегство и нему не му беше одземена ниту патната исправа.Во овој случај осомничен е и актуелниот командир на „Алфите“, Ивица Антевски Пуки, кој учествуваше во апсењето на Бошкоски.„Тврдина“ е третата истрага на СЈО во која има петмина осомничени кои се товарат дека ја искористиле својата службена положба за да ја уништат опремата од нелегалното прислушување, вредна 10 милиони евра. Првоосомничен е Горан Грујевски, кој беше началник на Петтата управа на МВР, второосомничен е шефот на Кабинет на Мијалков, Тони Јакимовски, а третоосомничена е Јанкулоска. Таа беше на распит во Судот и за овој случај, но за разлика од првиот пат кога се појави во Судот таа даде изјава за медиумите и тврдеше дека не сторила ниту едно кривично дело и дека СЈО работи по инструкции на СДСМ.Во овој предмет не беа определени мерки за претапзливост за никого, освен за Грујевски за кого СЈО бараше притвор, но Судот му го одзеде пасошот.Од функционерите во притвор заврши само градоначалникот на Битола, Владимир Талевски за случајот „Транспортер“, односно за малверзации со ученичкиот превоз.Специјалното јавно обвинителство ги товари Талески и уште 22 лица за злоупотреби со превозот на ученици во Битола, тешки 360.000 евра.Во Основниот суд на распит беше и поранешниот премиер и сегашен лидер на ВМРО-ДПМНЕ Никола Груевски за кого Обвинителството побара мерки за претпазливост за случајот „ТНТ“ во којшто е осомничен заедно со Јанакиески и градоначалникот на општина Гази Баба, Тони Трајковски.За нив е отворена истражна постапка за незаконско рушење на станбено деловниот објект „Космос“, во сопственост на бизнименот, Фијат Цановски, кое, според СЈО, било направено заради политичка одмазда. Од случаите кои се во рацете на СЈО, единствено случајот „Пуч“, во којшто осомничен е лидерот на СДСМ, Зоран Заев, е во судска процедура, а судењето продолжува в петок./крај/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Нашата понуда е јасна и искрена, понудата на ВМРО-ДПМНЕ е дестабилизација и застој
Контактот со граѓаните и грижата за нивните проблеми нема да заврши на денот кога ќе завршат изборите. И затоа, ветувам дека како претставник на граѓаните во идното Собрание на Македонија, ќе останам достапен за вас, за вашите грижи, маки, но и идеи и предлози.
Ова го истакна Д-р Венко Филипче, носител на листата на кандидати за пратеници на СДСМ и Коалицијата за европска иднина за Изборната единица 4. Филипче изборното претставување го започна од Демир Капија каде што имаше обраќање на граѓански митинг.
„Политиката носи одговорност. Одговорност за она што ќе се случува со нашата земја во иднина. Одговорност за тоа како ќе живеат граѓаните во неа. Одговорност за создавањето услови за мирен и спокоен живот, ослободен од грижи и сиромаштија. И јас ја прифаќам таа одговорност“, рече Филипче.
Одговорност носи и СДСМ која во изминатите седум години мандат се соочи со повеќе кризи: економска, здравствена, енергетска. Но, кризите не се изговор за грешките што беа направени, рече Филипче, додавајќи дека како одговорна партија СДСМ учи од грешките.
„Го вложивме секој денар за да ги поддржиме семејствата и компаниите во економската криза. Го вложивме секој атом енергија да ги лечиме и спасуваме луѓето во Ковид кризата. Ги донесовме сите мерки да ги намалиме трошоците на родителите да имаат повеќе за своите деца. Ние со дигната глава можеме да кажеме дека СДСМ водеше исправни политики во интерес на сите граѓани во услови на светска дестабилизација. Тоа е дефиниција за лидерство и патриотизам“, изјави Филипче.
Наспроти државничката улога на СДСМ, стои ВМРО-ДПМНЕ чија улога е да го блокира општеството и државата.
„Пред нас се избори на кои граѓаните бираат помеѓу два многу различни концепти. Едниот е нашиот, кој гарантира зачувување на мирот, стабилноста и интегрирање на Македонија во Европа. Нашата порака е јасна и искрена. СДСМ го нуди патот на развојот и сигурноста. Од друга страна е концептот на ВМРО-ДПМНЕ кој се заснова на дестабилизација, застој, блокади и доведување во прашање на се она што е постигнато. Нивната понуда е неискрена, нејасна и опасна за иднината на земјата“, рече Филипче.
Ваквата политика на ВМРО-ДПМНЕ е резултат на нивната стратегија чија цел не е напредокот, туку назадувањето, не е мирот, туку конфликтот. Не е градењето пријателства, туку создавање внатрешни и надворешни непријатели, амбиент кој го создава ВМРО-ДПМНЕ, истакна Филипче.
„Тоа е амбиентот кој ќе биде секојдневие ако победат на изборите. Со ВМРО-ДПМНЕ нема напредок, затоа што едноставно напредокот не им одговара. Затоа што тие не би знаеле да се снајдат во таква ситуација. ВМРО-ДПМНЕ знае да води политика само ако Македонија е во калта, долу. Знаат да пливаат во политиката само ако разговараме за поделби, за етнички конфликти, за лажен патриотизам“, рече Филипче.
Затоа, Филипче ги повика граѓаните да бираат мудро на овие избори истакнувајќи дека СДСМ нуди јасна визија за иднината во која Македонија економски расте во Европската Унија и во која оние кои заминаа ќе сакаат да се вратат во држава која ќе нуди еднакви услови како развиените земји.
„Сега е време за размислување со ладна глава, бидејќи одлуките денес имаат големи последици на иднината. СДСМ е партијата која секогаш е на вистинската страна на историјата, која и кога греши не скршнува од вистинскиот пат. Затоа повикувам на масовно обединување кое значи само подобра иднина и сигурен пат напред. А јас, лично ветувам дека во мене секогаш ќе имате партнер и другар а мојата врата ќе биде отворена за сите“, заврши Филипче.
Македонија
„Просечна пензија од 30.000 денари и минимална пензија од 20.000 денари“, најави Ковачевски
За нашите пензионери обезбедуваме просечна пензија од 30.000 денари и минимална пензија од 20.000 денари, порача од предизборниот митинг на СДСМ и Коалицијата за евопска иднина, претседателот на СДСМ, Димитар Ковачевски.
Ковачевски нагласи дека пензиите денескка, во однос на 2016 година се зголемени за 55% и ќе продолжат да растат.
„Јас ветувам дека ќе работам ден и ноќ да ги исполнам очекувањата на мнозинството граѓани да живеат во европска Македонија. Не се откажавме досега, нема да се откажеме ниту отсега. Ние не се откажуваме од иднината“, рече претседателот на СДСМ, Димитар Ковачевски, на предизборниот митинг на СДСМ и Коалицијата за европска иднина во Демир Капија.
Македонија
Ковачевски: СДСМ и Коалицијата се единствена опција за европска иднина на државата
„СДСМ и Коалицијата се единствена опција за европска иднина на државата. Ние нудиме јасен план и визија како до 2030 година Северна Македонија да стане земја членка на ЕУ. Наспроти нашите политички конкуренти ВМРО – ДПМНЕ кои немаат ниту план, ниту визија, ниту одлучност, ниту волја да го направат тоа“, порача претседателот на СДСМ, Димитар Ковачевски, од предизборниот митинг во Демир Капија.
Ковачевски нагласи дека изборот е кристално јасен.
„Избирате помеѓу надеж за подобра, европска иднина со СДСМ или безнадежност и враќање назад со ВМРО ДПМНЕ. Нашите идеи се прогресивни, со јасна визија за европска иднина на државата за што имаме голема поддршка од нашите пријатели од ЕУ“, истакна Ковачевски.
Претседателот на СДСМ додаде дека од друга страна, Мицкоски ќе го одолговлекува европскиот пат и за тоа ќе го обвини Брисел.
„ВМРО-ДПМНЕ не нуди никаков план за јасен напредок во евроинтеграциите, напротив, може да слушнете нивни изјави каде велат дека не треба да станеме членка на ЕУ сто години, а можеби и никогаш. Тоа покажува дека ја продолжуваат политиката на Никола Груевски. Со нив, Северна Македонија ќе се врати во чекалниците и во темното минато на недемократските процеси“, нагласи Ковачевски.
„СДСМ никогаш не се откажува! И нашите противници мора да го знаат тоа! Не ни треба враќање назад во изолација и неизвесност туку напредок и членство во ЕУ, нема откажување од подобра иднина за нашите граѓани“, порача претседателот на СДСМ, Димитар Ковачевски, од предизборниот митинг на СДСМ и Коалицијата во Демир Капија.