Министерката за труд и социјална политика, Јагода Шахпаска, денеска беше во посета на Рудникот за олово и цинк – САСА во Македонска Каменица. По средбата со генералниот директор Скот Јелланд и дел од раководството на САСА, се сретна и со рударите кои работат во внатрешноста на рудникот. Посетата ја предводеа лица кои се дел од стручната екипа на рудникот САСА.

„Навистина беше исклучително искуството да се биде на работното место, на работните позиции каде што рударите ги извршуваат своите работни задачи. Влеговме на позиции каде што се ископува рудата и го проследивме целиот процес на излез на рудата од рудникот. Министерството за труд и социјална политика, како надлежно од сферата на трудот заедно со Владата на РСМ, води политики кои се насочени кон вреднување на трудот на работниците, а во случајот зборуваме за рударите“, посочи Шахпаска.

Таа ја потенцираше важноста од почитувањето на безбедноста и здравјето при работа, затоа што само генерирање на безбедни работни места, резултираат со мотивирани работници. Истовремено, таа потврди дека условите во рудникот САСА се во согласност со сите пропишани стандарди. Дека безбедноста е на прво место потврдија и менаџментот на рудникот САСА.

Министерката Шахпаска истакна дека со законското решение во 2018 година, старосната граница на рударите беше спуштена од 58 на 50 години, но поради дилеми во толкувањето, Министерството работи на допрецизирање на оваа одредба. Со измените во законот, рударите со вкупен стаж од 40 години ќе одат во пензија.

„Истовремено, како Министерство работиме и на целосно нов Закон за безбедност и здравје при работа, затоа што наша обврска е да ја зајакнеме безбедноста на сите работници, а особено на оние професии кои се квалификувани како ризични“, посочи Шахпаска.

Таа порача дека Министерството за труд и социјална политика продолжува со заложбата за почитувањето на работничките права, безбедноста и заштита на здравјето при работа, а со тоа и контрола на почитување на истите, затоа што секој граѓанин е важен.

В недела одлучуваме во каков Центар сакаме да живееме. Јас сакам Центар да го видам како европска општина со среќни и насмеани граѓани, со поголеми зелени површини, чист со слободни тротоари и хумано градење, им порача на граѓаните Горан Герасимовски, кандидатот за градоначалник на Центар од СДСМ и коалицијата во денешната изјава со која се завршува кампањата за локалните избори во 2021 година.

Герасимовски рече дека програмата и проектите што ги презентирaл пред граѓаните во изминатиот период се реални и се произлезени од самите граѓани од нивните барањата и предлози.

„Јас и мојот тим долго работиме на вашите потреби и лоцирање на недостатоците во општината, сите ги забележавме и ја креиравме програмата. Јас сум сигурен дека мојата програма е најдоброто за општина Центар. А тоа е така затоа што за проектите нудам конкретни и прецизни решенија, испланирани во рамките на буџетот со временски рок на реализација. Впрочем, локалните избори не се само палета на проекти, туку и нивна исполнителност. Јас за моите проекти го гарантирам токму тоа“, изјави Герасимовски.

Tој ги повика граѓаните да ги разгледаат програмите и да одлучат за гласот в недела бидејќи некои од кандидатите ветуваат проекти што веќе ги презентира централната власт на СДСМ. Некои од проектите што се ветуваат пред граѓаните, според Герасимовски, немаат точна локација, временска рамка, ниту испланирани буџетски средства.

Герасимовски потенцира дека програмата „Најдоброто за Центар“ е реална и тоа е разликата помеѓу неговата и таа на другите кандидати. Притоа тој најави и вклученост на граѓаните при следните градби во општината преку јавна анкета или референдум.

„Ве повикувам да размислите во каков Центар сакате да ни поминува секојдневието. Јас ве повикувам сите масовно да се вклучите во изборниот процес, да изберете иднина за поубав Центар, ве повикувам да го заокружите бројот 12 и да прославиме уште една голема победа за Центар“, заврши Герасимовски.

Градоначалникот на Скопје и кандидат за втор мандат, Петре Шилегов, на последниот ден од изборната кампања од мостот на булеварот АСНОМ испрати порака која ја упати до разумот и до срцата на сите луѓе кои во Скопје го основале својот дом.

Како што кажа тој, новиот мост„Михајло Апостолски“ на булеварот АСНОМ не поврзува само две страни на еден булевар, не поврзува само две населби, три општини, туку овој мост ги поврзува граѓаните на Скопје.

„Мостот ја испраќа пораката дека Скопје веќе не е поделен град. Во Скопје веќе не се делиме, на важни и помалку важни, на наши и нивни, на Македонци, Албанци, Турци, Власи, Роми, Срби, Бошњаци и други. Овој мост е на сите кои макар еднаш ќе поминат преку него. Од исток кон запад, од север кон југ и обратно“, нагласи тој.

Додаде дека со изградбата на овој мост жителите на Аеродром веќе нема да чекаат по 40 минути на Железничка кога одат или се враќаат од работа.

„По овој мост ќе се движат безбедно и брзо и пешаци и велосипедисти, и јавен градски превоз и автомобили, без застој, без доцнење, без непријатности. Мостот на булевар АСНОМ е симбол на поврзувањето, другарството и слободата! И затоа, неслучајно, донесовме одлука токму овој мост да го носи името на народниот херој, храбриот генерал Михајло Апостолски кој бил еден од најистакнатите членови на Президиумот на АСНОМ, еден од најзаслужните за раѓањето и градењето на македонската држава, за ослободувањето на Скопје од фашистичкиот окупатор, за пишувањето и негувањето на нашата, скопска и македонска историја. Нека живее вечно споменот на овој голем човек во срцата на скопјани, нека го поврзува градот убав цврсто и силно како неговата борба за слобода и раѓањето на нашата Македонија“, порача Шилегов кој истакна дека на 17 октомври секој глас ќе биде важен за да продолжи напредокот на градот.