Општина Илинден ја асфалтираше улица „6“ во локалната економска зона „Стопански комплекс – Илинден“, проект кој е дел од континуираните активности за подобрување на патната инфраструктура и создавањето подобри услови за развој на локалните економски зони на територија на општината.

Градоначалникот на Општина Илинден, Александар Георгиевски, изврши увид во асфалтирањето, и потенцираше дека станува збор за улица во должина од околу 450 метри и широчина на коловозот од 6 метри.

Како што истакна градоначалникот Георгиевски, станува збор за значајна сообраќајна врска во рамки на локалната економска зона, чија реализација ќе придонесе за подобра пристапност, побезбедно одвивање на сообраќајот и поефикасно функционирање на компаниите што работат во овој дел од зоната.

Со реализацијата на овој инфраструктурен проект, Општина Илинден продолжува со инвестиции во модернизација на локалната патна инфраструктура, обезбедувајќи поквалитетни услови за работа на стопанските субјекти и создавајќи подобри услови за севкупниот локален економски развој, велат од Општината.

Општина Карпош започна со реализација на проектот за реконструкција на постојната улична мрежа и тротоарските површини на улицата „Атинска„ во у.з. „Владо Тасевски“.

Во рамки на градежните активности ќе биде извршена целосна реконструкција на коловозната конструкција која опфаќа асфалтирање на коловозната лента, замена на рабниците и замена на долниот строј. Во меѓувреме ќе се реконструираат и тротоарските површини кои ќе бидат уредени со комбинација на бекатон елементи и асфалт, известува Општина Карпош.

„Започнуваме целосна реконструкција на овој дел од улицата „Атинска“ која ќе биде завршена за 30 дена. Ги замолуваме нашите граѓани за трпение и разбирање за време на градежните активности“, истакна Лукровски.

„Проектот опфаќа реконструкција на улицата во должина од 435 метри, со што значително ќе се подобрат условите за движење на возилата и пешаците, а ќе се зголеми и безбедноста во сообраќајот.

Вкупната вредност на инвестицијата изнесува 16 милиони денари, а рокот за завршување на реконструкцијата на улицата е 30 работни дена.

Општина Карпош продолжува со континуирани вложувања во подобрувањето и модернизацијата на локалната инфраструктура, со цел создавање безбедна, функционална и квалитетна урбана средина“, се додава во соопштението од Општината.

Општина Аеродром започнува постапка за воспоставување систем за видеонадзор на детските и спортските игралишта, како и во парковите. На вчерашната седница на Советот беше усвоен предлогот за отпочнување на постапката.

Општината упатува благодарност до советниците „кои ја препознаа важноста на оваа мерка и дадоа поддршка за нејзината реализација“.

„Секое искршено игралиште претставува загуба за сите граѓани, а најмногу за најмладите. Затоа, покрај реконструкцијата и обновата на спортските и детските игралишта, Општина Аеродром презема конкретни чекори за нивна трајна заштита. Целта е да се спречи вандализмот и да се зачува јавниот имот.

Новиот систем за видеонадзор ќе придонесе за спречување на вандализмот, заштита на општинскиот имот и урбаната опрема, зачувување на парковите и игралиштата, како и поддршка на надлежните институции во откривањето сторители на казниви дела. Истовремено, ќе овозможи поголем јавен ред, повисоко ниво на безбедност и подобра заштита на јавната инфраструктура.

Реализацијата на проектот ќе се спроведе согласно со законските процедури, со целосно почитување на прописите за заштита на личните податоци и сите важечки стандарди.

Безбедноста е инвестиција во иднината. Со оваа мерка, Општина Аеродром продолжува да создава побезбедни, уредени и зачувани јавни простори, во интерес на сите граѓани и на идните генерации“, се вели во соопштението од Општината.