Освен што не плаќала струја, Данела Арсовска со нејзините и семејните фирми ја оставила салата Расадник како руина, целосно запуштена, oбвини денеска претставникот на СДСМ, Дарко Каевски.

„Фирмата на Данела Арсовска, ‘Империјал Данела’ ДООЕЛ Скопје, понатаму ‘Империјал’ ДООЕЛ Скопје во 2002 година потпишала договор за закуп на спортската сала Расадник. Со членот 4 од договорот, фирмата на Aрсовска се обврзала да ја реновира кровната конструкција, да го смени паркетот на теренот, да ги реновира соблекувалните и да го уреди просторот околу салата“, нагласи Каевски кој го приложи и договорот кој, како што кажа, Арсовска го потпишала на 10 јануари 2002 за месечна закупнина од 1.000 евра плус ДДВ.

Претставникот на СДСМ кажа дека договорот има и анекс со кој се надополнува членот четири и се додаваат и хотел со 24 легла, пет терени за сквош, фитнес центар, отворен базен, помошни објекти и петнаесет бунгалови.

„Ништо од ова како што гледате не е направено. Ова е потврда дека Данела не може да управува ниту со сала, а најмалку со град. Со неа на чело на Градот, и Скопје би бил запуштен и запоставен како оваа сала“, обвини Каевски порачувајќи дека во недела граѓаните ќе заокружат број 12 за, како што кажа, Скопје да остане во сигурни раце.

Во текот на вчерашниот ден аплицирани се вкупно 2.504 дози вакцини, од кои 713 се аплицирани како прва доза, 1.730 се ревакцинирани, а 57 граѓани примиле трета доза вакцина, соопшти Министерството за здравство.

Заклучно со 14 октомври вкупно се вакцинирани 797.988 граѓани, ревакцинирани се 758.001, а трета доза примиле 1.039 граѓани. 53% од граѓаните над 40 годишна возраст се ревакцинирани, а 33% од популацијата од 18 до 39 години примиле барем една доза вакцина.

Опфатот со вакцинација со една доза вакцина, на полнолетната популација е 47% , а со две дози опфатени се 45% од граѓаните над 18 години. Според бројот на аплицирани вакцини, 38% од целата популација во нашата земја е вакцинирана, а 35% од популацијата во државата примила две дози вакцина.

Министерството за здравство ја објави анализата на вакцинирани од позитивни случаи со Ковид-19 во периодот од 6 август до 14 октомври.

Според анализата, за вакцинирани се сметаат лицата што биле вакцинирани со две дози и поминале најмалку 14 дена од примање на втората доза вакцина.

Како што информираат од Министерството, во споменатиот период на територијата на државата 40.208 граѓани биле позитивни на Ковид-19, а од нив 25 % биле целосно вакцинирани, односно 10.066 лица.

Од Министерството посочуваат дека сепак и натаму останува голем бројот на невакцинирани граѓани што се заразиле од Ковид-19.

„Според статистиката за изминатите два месеца, 30.142 граѓани, односно 74,9 % од позитивните на Ковид-19 не биле вакцинирани. Процентот на хоспитализирани лица што се невакцинирани изнесува 79 %, а само 21 % од сите моментно хоспитализирани пациенти се целосно вакцинирани“, се наведува во соопштението.

Анализата покажува и дека смртноста кај невакцинираните е драстично поголема.

„Во периодот од 6 август до 14 октомври на територијата на државата починале 1.382 пациенти од Ковид-19, од кои 1.149 пациенти, односно 83 % не биле вакцинирани, а само 17 %, односно 233 примиле вакцина. Според анализите, починатите имале повеќе комбинирани хронични заболувања. Пациентите биле вакцинирани со сите типови вакцини што ги има на располагање кај нас“, велат од Министерството за здравство, од каде што уште еднаш укажуваат на важноста од вакцинација.