Скопје
Арсовска: Градот Скопје е прва единица на локалната самоуправа со проект за рециклирање и реупотреба на градежен отпад
Управување со отпад и развој на локалната економија е тема на дводневната ТАИЕКС работилница која со поддршка на Европската делегација се одржува во Скопје. На отворањето на работилницата се обратија градоначалничката на град Скопје Данела Арсовска, раководителот на соработка на Делегацијата на ЕУ Стефен Худолин, заменик-министерот за локална самоуправа Зоран Димитровски и претставникот на ТАИЕКС инструментот за поддршка на локалната самоуправа, Николас Домингез Мендоза.
Арсовска во воведното обраќање истакна дека Градот Скопје неодамна го потпиша договорот за реализација на европскиот проект Re-Construct финансиран од ЕУ, за креирање и управување екосистем за имплементација на циркуларен модел за справување со градежен отпад.
– Со помош на овој проект за првпат на национално ниво во единица на локална самоуправа се отпочнува со третирањето на градежниот отпад, изнаоѓање начини за негова иновативна пренамена и негова повторна употреба. Главната цел на овој проект е да се зголемат и подобрат капацитетите на Град Скопје за рециклирање и реупотреба на градежен отпад и транзиција кон циркуларна економија – изјави Арсовска.
Арсовска истакна дека ТАИЕКС мисијата на овие актуелни теми е значајна и придонесува за развој на капацитетите, искористувајќи го знаењето и воспоставените практики од европските земји во насока на подобрување на локалното справување и унапредување на системот за управување со отпадот согласно меѓународните стандарди.
Шефот за соработка во Делегацијата на Европската Унија, Стефен Худолин го истакна значењето на Зелениот договор и дека тој не треба да се однесува само на животната средина, туку дека тој треба да биде применет во секоја област, како и дека локалната самоуправа во Македонија треба посветено да реализира активности опфатени од Зелениот договор по примерот европските практики.
На работилницата, голем број меѓународни експерти од оваа област дискутираа, разменуваа искуства, даваа совети и насоки, а беа споделени и практични примери за неколку области од Акциониот план за циркуларна економија со цел да се поддржи развојот на циркуларни системи за управување со отпад во различни општини во Македонија, а учествуваа и претставници од надлежните градски јавни претпријатија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Советот на Општина Центар даде зелено светло за бесплатни тренинзи на јуниорите на КК Работнички во салата на ООУ ,,Коле Неделковски’’
На денешната 35. Седница на Советот на Општина Центар е усвоен предлогот на градоначалникот Горан Герасимовски за користење на училишната спортска сала во ООУ ,,Коле Неделковски” за потребите на младите кошаркари на КК Работнички, без надоместок, додека не биде реновирана салата во Градски парк.
На советниците градоначалникот Герасимовски им појасни дека се работи за исклучителна ситуација која ќе трае само додека не се создадат услови за одржување тренинзи во реновираното здание и дека оваа одлука е наменета само за јуниорскиот тим.
,,Ова не е одлука за првиот тим на Работнички туку за младинскиот клуб на КК Работнички бидејќи во моментот кога ќе почне да се реновира салата, тие ќе немаат простор за тренинзи. Знаеме каква е финасиската ситуација на младинскиот тим. Истиот функционира и од спортскиот ваучер што го доделува Владата, кој за жал доцни. И поради тие причини и поради тоа што самиот тим е сопственост на Општината, ние мораме да се грижиме за клубот и за младинците што таму тренираат и играат. Затоа мислам дека барањето е издржано и очекувам советниците да се согласат” истакна Герасимовски.
Предлог одлуката за користење на спортската сала во ООУ ,,Коле Неделковски” без надоместок од страна на КК Работнички за 2024 година е усвоен со 21 гласа ЗА, ниеден глас против и без воздржани.
Одлуката беше донесена откако КК Работнички-Скопје побара од Општината, како акционер, да добие тренинг термини во основните училишта за својот младински тим, поради реновирање на салата.
,,Како наш единствен акционер, сопственик и воедно сопственик на основните училишта во општината ве замолуваме да ни дозволите нашите младинци да тренираат во една од салите на школите кои се во ваша надлежност, стои во дописот на КК Работнички-Скопје испратен до Општина Центар.
Скопје
Герасимовски: Решен децениски проблем со безбедноста на сообраќајот на улицата Наум Наумовски-Борче
Општина Центар ја отстрани рампата на улицата „Наум Наумовски Борче” кај хотел Дувет, на раскрсницата помеѓу „Ленинова” и „Партизанска” која претставуваше проблем и пречка за функционирање на сите учесници во сообраќајот.
Со овој потег општината го реши деценискиот проблем на барање на жителите, по поднесена петиција во која се потпишаа 327 граѓани. Ова е направено во согласност со ДУП-от и за овој зафат се добиени потребните дозволи од сите надлежни институции.
На улицата се поставени столпчиња за безбедност во сообраќајот и за влегувањето на возилата во подземните гаражи. Со овој зафат се обезбедува пристапна зона која ќе биде проодна и безбедна за граѓаните.
,,Конечно го решаваме долгогодишниот проблем на ваше барање. Улицата станува безбедна за пешаците и за вас жителите. На овој потег постојано се случуваа сообраќајни незгоди и затоа ова моравме да го направиме. Со вадењето на рампата воедно и ја ослободивме улицата од сите пречки поради кои имаше проблеми”, им се обрати Герасимовски на собраните жители.
Општина Центар известува дека улицата ќе биде двонасочна, во широчина од 7 метри, по 3.5 од секоја страна, ќе се отстрани страничната урбана опрема и ќе се намалат надворешните тераси на угостителските објекти долж улицата „Наум Наумовски Борче”.
Со ова исто така ќе се оневозможи дивото паркирање на улицата што претходно претставуваше проблем за пешаците.
Скопје
Дел од неколку скопски населби без струја
Поради планирани прекини во електродистрибутивната мрежа без електрична енергија ќе останат следните корисници:
· Во период од 09,00ч до 16,00ч дел од корисниците во с. Волково и с. Кучково ( о. Ѓ. Петров);
· Од 09,00ч до 14,00ч корисниците од ул. Банско, ул. Баница, ул. Наум Охридски и ул. Жванска (о. К. Вода);
· Од 07,00ч до 15,00ч новите згради спроти Мерцедес ул. 852 (о. Г. Баба) и
· Во период од 09,00ч до 15,00ч дел од ул. Милан Мијалковиќ, ул.Пржино, ул.Кавалска (о. К. Вода).