Македонија
Арсовска: „Градски паркинг“ ја намали цената, со системски мерки ќе го решаваме сообраќајниот хаос во Скопје
Градоначалничката на град Скопје, Данела Арсовска, на прес-конференција презентира реализирани активности што беа ветени за првите 82 дена од мандатот и притоа се осврна и на ветувањето за намалување на цената на паркинзите, одлука што стапува во сила од 1 март годинава.
„Поднесовме иницијатива по која Управниот одбор на Јавното претпријатие ‘Градски паркинг’ на 28.1.2022 донесе одлука за намалување на цената за паркирање на градските паркинзи во Скопје од 1.3.2022 година, со што уште едно од барањата на граѓаните е исполнето. Воедно, Јавното претпријатие со планираните нови катни и монтажни паркиралишта во Чаир, Аеродром, Центар и во Кисела Вода, во согласност со програмата во идниот период, ќе овозможи паркирањето во Скопје не само да биде поевтино туку да биде и подостапно за граѓаните“, истакна Арсовска.
„Ветивме дека ќе ги вратиме одбројувачите на семафорите и дека ќе ги вратиме функционалните зелени бранови, тоа и го направивме. Исполнето е ветувањето за поставување бројчаници на семафорите, на крстосниците каде што не се следи движењето од ЦУКС. Поставени се бројчаници на булеварот Христијан Тодоровски-Карпош, на семафорот на крстосницата со ‘Натанаил Кучевишки’, на крстосницата со ‘Боца Иванова’ и на крстосницата со булеварот Босна Херцеговина, а одбројувачи ќе бидат поставени дополнително и на семафорите за кои е детектирано дека се од важност за регулирање“, рече Арсовска.
Од таму информираа дека поради зголемен број реакции на граѓани што пристигнувале до отворената канцеларија на Градот, Град Скопје во соработка со Јавното претпријатие „Улици и патишта“ спроведува акција за нивелирање на шахтите на булеварите и на коловозите во надлежност на Градот.
„Досега во првите 82 дена се нивелирани 62 шахти со цел за подобро одвивање на сообраќајот во Скопје, како и намалување на оштетувањата на возилата на кои алармираат граѓаните затоа што во минатото не биле соодветно поставени шахтите по должината на коловозите. Оваа активност продолжува, при што редовна пракса ќе биде повеќе да нема неквалитетно изведени шахти на коловози при градба или реконструкција“, заклучи Арсовска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Склучен Меморандум за соработка помеѓу Економскиот факултет – Скопје и Кроација осигурување АД, Друштво за неживотно осигурување Скопје
Денес во просториите на Економскиот факултет – Скопје, деканот проф. д-р Предраг Трпески одржа состанок со г-дин Александар Манев-генерален директор на Кроација осигурување АД, Друштво за неживотно осигурување Скопје и со претставници од истата институција.
Во рамки на остварената средба, се одвиваше плодна дискусија во насока на унапредување и продлабочување на меѓусебната соработка помеѓу двете институции како и обезбедување достапност на професионална размена на искуства заради остварување на заеднички цели. Во таа насока, состанокот се заокружи со потпишување на Меморандум за соработка помеѓу двете страни со кој се официјализираше соработоката помеѓу Економскиот факултет – Скопје и Кроација осигурување АД, Друштво за неживотно осигурување Скопје.
Со ова, двете институции се согласија да соработуваат во реализација на широк спектар на активности и иницијативи од взаемен интерес за едукација и подобрување на знаењето и стручноста преку најразлични активности и проекти од взаемен и општествен интерес, реализирање на практична настава за студентите од Факултетот, презентирање на практични проблеми, решенија, предизвици и можности за студентите на Факултетот, организирање работилници и конференции, и други активности.
За време на посетата, генералниот директор, г-дин Александар Манев и останатите претставници, во придружба на деканот и продеканите на Економскиот факултет – Скопје, ги разгледаа капацитетите со кои располага Економскиот факултет – Скопје.
ПР
Македонија
Тошковски: Приведен е и трет осомничен во врска со убиството на лекарот во скопска Железара
Техничкиот министер за внатрешни работи, Панче Тошковски, денеска изјави дека е приведено уште едно лице во врска со убиството на матичниот лекар во скопска Железара, кој беше најден со девет убодни рани.
„Во согласност со моите информации приведено е уште едно лице. Приведени се вкупно три лица. Претресот е завршен во текот на доцните часови. Се продолжува со други истражни дејства сè со цел да може да се утврди соодветната фактичка состојба. Штом имаме дополнителни нови информации, јавноста ќе биде дополнително известена“, рече Тошковски.
Тој не сакаше да ги коментира обвинувањата од СДСМ дека откога е дојден на местото министер за внатрешни работи, работите не одат на подобро.
„Вакви изјави не заслужуваат сериозен одговор затоа што се несериозни изјави. Тотално не би ги коментирал“, рече Тошковски и додаде дека македонскиот народ се смее на она што се обидуваат да го тераат како приказна и повика да завршат ваквите паушални обвинувања.
Македонија
Апасиев: НАТО не носи демократија, НАТО е кршач на меѓународното право и Повелбата на Обединетите нации
Претседателот на Левица, Димитар Апасиев, за декларацијата на Собранието по повод четири години од членството во НАТО истакна дека Нато не носи демократија.
Нато, според него, е кршач на меѓународното право и повелбата на Обединетите Нации.
„Без дозвола на Совет за безбедност НАТО ја нападна Југославија во 1999 година, ја нападна Либија, го нападна Ирак и редици други држави.
Последниот пункт е дека народот сакал во НАТО. Не е точно. Не е испочитуван член 120 од уставот кој што вели: Одлуката за стапување и истапување од сојуз или заедница со други држави е усвоена ако на референдум за неа гласало мнозинство од вкупниот број на избирачи. Референдумот во 2018 беше неуспешен и немаше цензус и оттука уставниот услов за да влеземе во НАТО не е испочитуван, што значи противуставно и против волјата на народот сме влезени во НАТО”, додава Апасиев.