Македонија
Општината Карпош: Воспитно-образовниот процес во општината се одвива без пречки
Воспитно-образовниот процес во Карпош се одвива без пречки. Учениците, наставниците и родителите се придржуваат до предвидените протоколи за заштита од Ковид-19. Исто така, училиштата обезбедуваат квалитетна и инклузивна настава за сите ученици, известуваат од Општина Карпош.
Денеска, на увид во наставниот процес во ООУ „Димо Хаџи Димов“ во Влае 2 беа градоначалникот на општина Карпош, Стефан Богоев, и министерката за образование и наука, Мила Царовска.
Тие направија обиколка и на сензорната соба за ученици со попреченост, екоучилницата за настава на отворено и на кабинетот по хемија, кој е опремен со нови помошни средства. Увид направија и на наставниот процес во прво и четврто одделение.
„Инклузивниот пристап го гледаме преку сензорните соби за полесна настава на учениците со попреченост, кои во изминатите години ги отворивме речиси во секое училиште. Во време на пандемија не престанавме да ги унапредуваме условите. Па, така, во сите образовни установи направивме и екоучилници за настава на отворено. Тие се одраз на соработката меѓу општината, учениците, наставниот кадар и родителите, каде што децата ги реупотребија материјалите и создадоа корисен простор за своите потреби“, рече Богоев.
Градоначалникот се осврна и на стипендиите за талентирани ученици и ученици спортисти, кои Општината ги има предвидено во буџетот, но јавниот повик ќе биде објавен по завршување на изборниот процес.
Министерката Царовска напомена дека родителите/старателите не треба да се сомневаат дека со промените во наставата ќе се постигне подобар ефект во знаењето на учениците. Промените се во согласност со препораките на УНИЦЕФ, ОЕЦД и Светската банка, а во консултација со сите фактори вклучени во образовниот процес.
Директорката на училиштето „Димо Хаџи Димов“, Весна Кочовска, изрази благодарност до сите ученици, наставници и административно-технички кадар, кои се придржуваат до протоколите и ги следат насоките за безбедна учебна година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.
Македонија
Одѕивот до 15 часот е 35,89 отсто, најмалку гласале во Центар Жупа, а најмногу во Новаци
До 15 часот до Државната изборна комисија пристигнати се податоци за одѕив на гласачите од 2.110 избирачки места.
Од вкупно запишани 1.092.341 гласач на овие избирачки места, гласале 392.066, односно 35,89 проценти.
Според податоците што се пристигнати досега, најголем одѕив е забележана во Новаци со 57,69 % а најмал во Центар Жупа, 13,11 %.
Гласањето досега се одвива мирно на сите избирачки места.
До овој момент до ДИК се доставени вкупно 233 приговори за заштита на личното избирачко право. Од нив, 38 приговори се усвоени и на избирачите им е овозможено да го остварат своето право на глас, 21 приговор се отфрлени како неуредни, а 22 се одбиени. Другите приговори се во обработка.
На страницата rezultati.sec.mk може да се следи во живо одѕивот на гласачите, вкупен и по општини.