Скопје
Анкета: Голем интерес за велосипедот како превозно средство, потребна е инфраструктура
Заинтересираност за велосипедот како превозно средство е голема, а соодветно на ова расте и потребата за квалитетна велосипедска инфраструктура.
Ова е генералната констатација на веб акетата што ја спроведе Агенција Рејтинг, во соработка со Архитектонскиот факултет, и неформалното здружение „На Точак“, а за потребите на Општина Центар, со која беа опфатени 895 испитаници. Целта на истражувањето беше да се обезбедат податоци од граѓаните и нивното секојдневно искуство од движењето низ градот, за проблемите со кои се соочуваат додека користат велосипед како транспорт, со крајна цел подобрување на условите за возење на велосипед и подобрување на самата велосипедска инфраструктура во Општина Центар. Според резултатите од анкетата високи 60,8 % од испитаниците кои се изјасниле дека возат велосипед, истиот го користат како превозно средство, и тоа 66,9% од нив секој ден или неколку пати неделно. 27,3% од испитаниците го користат велосипедот за рекреација, 8,9% за спортување, а само 2,4% изјавиле дека не возат велосипед. Kако главни фактори кои ги спречуваат граѓаните да возат велосипед се издвојуваат пречки на патеките, недостаток на велосипедска инфраструктура, небезбеден паркинг и небезбеден сообраќај. Понатаму, со 82,6%, паркираните возила се убедливо најголем проблем за корисниците на велосипеди. Потоа следат високите рабници при премин кон коловозите со 62,4%, и лошото одржување на подлогата, односно појавата на дупки, нерамнини и вирови, со 60,3%.Преку прашањето “Колку следниве фактори влијаат во изборот на рутата што ја користите за возење велосипед, во моменталните инфраструктурни услови?” анкетата покажа дека избегнување на паркирани возила и постоењето на издвоена патека за велосипеди се примарни за корисниците на велосипеди, со 59,1% и 54,2%, соодветно. Веднаш по нив следат избегнување средби со возила во движење – 48,7%, чувство на безбедност – 47,8%, и изборот на зона со помали дозволени брзини за моторен сообраќај – 27,3%.Треба да се истакне дека на високи 96,7% од корисниците на велосипед центарот на град Скопје им е дел од секојдневната или повремена рута, што дополнително ја истакнува потребата за подобрување на велосипедската инфраструктура во овој регион. Оттаму следува и високата заинтересираност за иницирање програми од Општина Центар. Имено, дури 88,3% од испитаниците би поддржале програма за планирање велосипедска инфраструктура, 82,7% за обележување велосипедски патеки, а 74,5% за планирање на зони на смирен сообраќај.Следниот дел од истражувањето беа две тековни програми на Општина Центар, кои директно ги засегнуваат корисниците на велосипеди – Цел Центар на точак и развој на апликацијата Strava. Според добиените одговори, голем дел од жителите на Општина Центар веќе аплицирале и добиле субвенции за велосипед, а високи 66,7% се заинтересирани да се вклучат. Во однос на апликацијата Strava, 46,4% сигурно би се согласиле да ја користат при возење велосипед, а 45, 1% можеби би прифатиле. Како главна мотивација да го сторат тоа, со 66,2%, убедливо се издвојува целта на собирањето податоци, односно подобрување на условите за користење на велосипедот за превоз во Општина Центар.„Општина Центар се стреми да ги насочи своите напори кон конкретните потреби на граѓаните, кои се осознаваат преку вакви истражувања, а се реализираат преку програми како што се “Цел Центар на точак, анализа на велосипедското движење преку апликацијата Strаva и “Зона 30”. Токму затоа, со задоволство го најавуваме вториот дел од ова истражување и повикуваме што повеќе испитаници да се приклучат кон истото, со цел заедно да ги подобриме условите за возење велосипед во центарот градот“, порачува локалната власт. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Арсовска изврши увид во завршните градежни работи на реконструкција на водоводната мрежа на улицата Антон Попов
Градоначалничката на Град Скопје, Данела Арсовска заедно со претставници од Секторот за планирање и уредување при Град Скопје и скопското јавно претпријатие „Водовод и канализација“ извршија увид во завршните градежни работи на реконструкција на водоводната мрежа на улицата Антон Попов во општината Гази Баба.
Со изведбата на водоводните приклучоци на овој потег кои се поврзуваат со постојната водоводна мрежа со профил од 150 милиметри, се решава повеќедеценискиот проблем на жителите со честите прекини во водоснабдувањето поради застареноста на системот, а се решаваат загубите на вода и трошоци за поправките на дефектите на водоводната мрежа, велат од Град Скопје.
Изведбата на овој проект претставува дел од програмата на градоначалничката Данела Арсовска за обновување на градската мрежа, во децениски заборавените населени места, што претставуваше и долгогодишно барање на жителите од тој дел на градот, се додава во соопштението на Град Скопје.
Скопје
Скопје викендов со изменет режим на сообраќај поради одржување на предизборни митинзи
Поради одржување митинг од изборната кампања за претседателските избори 2024 година на 21 април (недела) во 13.00 часот пред седиштето на Европската унија на ул.„Св. Кирил и Методиј“ во Скопје, Единицата за безбедност на патниот сообраќај при СВР Скопје ќе преземе мерки за посебен режим на сообраќај на оваа улица почнувајќи од 19:00 часот на 20 април (сабота) до 21.00 часот на 21 април (недела), соопштуваат од МВР.
Притоа, за сообраќај ќе биде затворена ул.„Св.Кирил и Методиј“ на потегот од крстосница со булевар „Кочо Рацин“ до крстосница со булевар „Св. Климент Охридски“.
Исто така, на 21 април во 20.00 часот на плоштад „Македонија“ во Скопје ќе се одржи митинг од изборната кампања за претседателските избори 2024 година.
Од тие причини, Единицата за безбедност на патниот сообраќај при СВР Скопје ќе преземе мерки за посебен режим на сообраќај во централното градско подрачје, а сообраќајот времено ќе се запира на сообраќајниците по кои ќе се движат учесниците на настанот.
За таа цел, МВР апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвиваат настаните
Скопје
Советот на Општина Центар даде зелено светло за бесплатни тренинзи на јуниорите на КК Работнички во салата на ООУ ,,Коле Неделковски’’
На денешната 35. Седница на Советот на Општина Центар е усвоен предлогот на градоначалникот Горан Герасимовски за користење на училишната спортска сала во ООУ ,,Коле Неделковски” за потребите на младите кошаркари на КК Работнички, без надоместок, додека не биде реновирана салата во Градски парк.
На советниците градоначалникот Герасимовски им појасни дека се работи за исклучителна ситуација која ќе трае само додека не се создадат услови за одржување тренинзи во реновираното здание и дека оваа одлука е наменета само за јуниорскиот тим.
,,Ова не е одлука за првиот тим на Работнички туку за младинскиот клуб на КК Работнички бидејќи во моментот кога ќе почне да се реновира салата, тие ќе немаат простор за тренинзи. Знаеме каква е финасиската ситуација на младинскиот тим. Истиот функционира и од спортскиот ваучер што го доделува Владата, кој за жал доцни. И поради тие причини и поради тоа што самиот тим е сопственост на Општината, ние мораме да се грижиме за клубот и за младинците што таму тренираат и играат. Затоа мислам дека барањето е издржано и очекувам советниците да се согласат” истакна Герасимовски.
Предлог одлуката за користење на спортската сала во ООУ ,,Коле Неделковски” без надоместок од страна на КК Работнички за 2024 година е усвоен со 21 гласа ЗА, ниеден глас против и без воздржани.
Одлуката беше донесена откако КК Работнички-Скопје побара од Општината, како акционер, да добие тренинг термини во основните училишта за својот младински тим, поради реновирање на салата.
,,Како наш единствен акционер, сопственик и воедно сопственик на основните училишта во општината ве замолуваме да ни дозволите нашите младинци да тренираат во една од салите на школите кои се во ваша надлежност, стои во дописот на КК Работнички-Скопје испратен до Општина Центар.