Цената на билетот во автобусите на Јавното сообраќајно претпријатие ЈСП Скопје што се купува кај возачот и по воведувањето на новиот електронски систем ќе изнесува 35 денари, а не 60 денари како што беше најавено претходно, предвидува Предлог одлуката за која Советот на Град Скопје треба да расправа на седница во вторник.

„Цената останува иста. Првичната предлог одлука за цена од 60 денари за билет беше за да се намали чекањето при вадење карта кај возачот, бидејќи ако има поголем број патници во тој случај се зголемува времето на чекање на автобусот на автобуската станица додека возачот ги извади картите“, рече во сабота на прес­конференција градоначалникот на Скопје Коце Трајановски.

Цената на билетот за едно возење останува 35 денари и се прави унификација со цената во приградските линии која се намалува од 40 на 35 денари. Останува иста и цената на ноќното возење, 40 денари, а има намалување на месечниот билет кој за првата зона чинеше 1.650 денари на 1.400 денари.

„Исто така, имаме големо намалување на годишните билети од 16.060 денари на 15.400 денари. Со новиот тарифник годишниот билет ќе важи точно една година од датумот кога е изваден, а не како досега до крајот на годината без оглед кога е извадена. Ве воведува билет за менување автобуси, кој ќе биде со важност од час и половина чија цена е 60 денари. Доколку земете во просек дека со овој билет секој патник ќе може да оствари најмалку три патувања, а често и повеќе цената на поединечно возење од 35 денари се намалува на 25 денари“, рече Игор Јанушев, директор на ЈСП. Се воведува и дневен билет за неограничен број возења од 5 часот изутрина до полноќ кој ќе чини 120 односно 150 денари во зависност дали е во прва или втора зона. .

Се воведуваат и тримесечен билет со цена од 4.000 и 4.500 денари и шестмесечен од 7.800 и 8.600 денари.

Откако во целост ќе се имплементира системот, ќе нема билети во хартиена форма. Сите електронски билети ќе се впишуваат во два вида електронски картички што се воведуваат: неперсонализирана и персонализирана.

„Неперсонализираната картичка може да се купи во сите билетари на ЈСП, во сите осум инфо центри или на кое било продажно место. Оваа картичка чини 150 денари со две гратис возења. На неа може да се стави одредена сума пари во вид на електронски паричник и при секое влегување во автобус затоа што валидацијата е задолжителна парите ќе се одземаат од картичката и тоа ќе чини 35 денари за возење колку што е сегашната цена“, рече Јанушев, додавајќи дека оваа картичка може да ја користат повеќе лица.

Персонализираната картичка, појасни, може да се извади во осумте инфо центри низ Скопје, а се што е потребно граѓаните да носат со себе документ за лична идентификација. Таму ќе бидат фотографирани и картичката ќе се изработи најмногу за две минути. На оваа картичка може да се запишат и месечни, три месечни, сезонски или какви било билети и ја заменува т.н слободна карта.

Уредите за електронскиот систем за наплата ќе почнат да се инсталираат во автобусите на приватните превозници од јануари и според Јанушев се очекува од почетокот на мај и тие да станат дел од системот.

ЈСП Скопје моментно има 30­ина билетари, но наскоро, според директорот Јанушев, врз основа на договорот со Мастер дилер ќе има повеќе од 60 продажни места. Таму ќе може да се купи неперсонализрана картичка и да се врши надополнување на двата вида картички. Бројот на автобуски постојки на ЈСП Скопје изнесува 3.000./крај/со/бб