Скопје
Општина Чаир ги заменува старите службени возила со електрични
Советот на општина Чаир, на предлог на градоначалникот Изет Меџити, донесе одлука за замена на целокупниот возен парк на општината со нови еколошки возила на електричен погон.
На оваа одлука ѝ претходеше анализа која покажа дека замената на постојните службени возила на општината со нови ќе има реални продобивки за општината и жителите на Чаир. Имено, новите електрични возила ќе бидат корисни за животната средина, бидејќи не ја загадуваат околината, а истовремено се и поекономични, со што се овоможува заштеда на средства од општинскиот буџет, кои ќе бидат пренаменети за реализација на други приоритетни проекти.„Со оваа одлука сакаме да дадеме пример за тоа како може да се делува во насока на долгорочно унапредување на животната средина, а особено на квалитетот на воздухот што сите ние го дишеме. Свесен сум дека со само една активност невозможно е да се постигнат посакуваните резултати, но и малите чекори водат кон решението“, изјави градоначалникот на Чаир Изет Меџити, најавувајќи дека набрзо општината ќе го постави и првиот полнач за автомобили на електричен погон, кој покрај новите општински автомобили, ќе можат да го користат и граѓаните кои ќе одлучат да набават вакви возила. За да се омасови оваа иницијатива и да се подобрат состојбите преку елиминирање на еден од главните причинители на загадувањето на воздухот – сообраќајот, Меџити најави покренување на иницијатива до Градот Скопје и во ЗЕЛС за проширување на оваа активност, особено во делот на инсталирање на полначи за електрични автомобили на јавен простор, со што ќе бидат исполнети предусловите за нивно користење. „Постапката на продажба на постојните службени возила на општина Чаир е во тек, а јавната набавка за пет нови електрични возила ќе биде објавена по 15-ти јануари, односно откако законски ќе стапи на сила новиот општински буџет“, објасни претседаталот на Советот на општина Чаир, Захир Бектеш. Оваа активност е дел од долгорочната платформа „Нека биде чисто. Заедно за Чаир“, која започна оваа година, а во чии рамки се реализираат голем број активности за унапредување на животната средина на територија на општина Чаир, како што се акции за чистење на јавните површини, садење дрва и проширување на зелените површини, хортикултурно уредување и друго. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
ЈСП: Јавниот превоз по неделен возен ред, жичницата на Водно нема да работи
Јавното сообраќајно претпријатие Скопје соопшти дека јавниот превоз ќе функционира по неделен возен ред, а жичницата на Водно нема да работи.
Како што се појаснува во соопштението, дежурни од седум до 14 часот ќе бидат билетарниците на Транспортен центар и таа во Ѓорче Петров.
Скопје
Петровец, Сарај, Карпош, Кисела Вода и Центар денеска без струја
Регионалниот центар за управување со кризи на Град Скопје, по добиеното известување од ЕВН, информира дека поради технички зафати во електродистрибутивната мрежа, без електрична енергија ќе останат делови од општините Петровец, Сарај, Карпош, Кисела Вода и Центар.
· од 8.30 до 14.30 часот корисниците од селата Кожле и Бадар, како и тунелот кај Катланово на автопатот Велес – Скопје (општина Петровец);
· од 9 до 11 часот корисниците од село Кондово (општина Сарај);
· од 9 до 11 часот корисниците од делови од улиците Вич и Разловечко востание (општина Карпош);
· од 9 до 12 часот корисниците од делови од улиците Иван Козаров и Тоне Томшиќ. (општина Кисела Вода);
· од 9 до 15 часот корисниците од дел од улицата Максим Горки, односно објектите во околината на Домот на градежниците (општина Центар);
· од 11 до 13 часот корисниците од дел од улицата Орце Николов, поточно објектите во околината на куќните броеви 155 и 156 (општина Карпош)
Скопје
Санкционирани 229 непрописно паркирани возила на територијата на општина Центар
ЈП Паркинзи на општина Центар и општина Центар во соработка со Сообраќајната полиција-Скопје во текот на една недела санкционираа 229 непрописно паркирани возила кои го попречувале нормалното и безбедно одвивање на сообраќајот.
„Во периодот од 15.04. до 21.04.2024 година, со помош на специјалните возила „Пајак“ на ЈП ПОЦ отстранети се 123 непрописно паркирани возила, а со поставување на механичко средство „Блокатор“ санкционирани се 106 возила кои биле затекнати на резидентни паркиралишта, а не биле корисници-резиденти на секторот во којшто биле паркирани“, велат од ПОЦ.
ЈП ПОЦ и општина Центар секојдневно водат грижа за да го доведат во ред сообраќајниот хаос настанат од непрописно паркираните возила на територијата на Општина Центар. Потсетуваме на почитување на сообраќајните правила од страна на секој учесник во сообраќајот со цел одржување на ред и безбедност на улиците, се додава во соопштението на ПОЦ.