Скопје
Отворен првиот скејт-парк во Македонија
Првиот скејт-парк во Македонија, лоциран на кејот на реката Вардар во Скопје, во понеделник беше пуштен во употреба. Паркот е опремен со девет справи и може да се користи секој ден од 10 до 24 часот, а Град Скопје ќе ангажира инструктори кои ќе им даваат совети на сите заинтересирани.
На официјалното отворање на првиот скејт-парк во Скопје и во Македонија, присуствуваа Градоначалникот на Град Скопје, Коце Трајановски и премиерот, Никола Груевски.
„Површината за скејт-паркот е со димензии 15 на 50 метри, на која се поставени девет справи односно елементи со рампа на асфалтна подлога изработена според бараните карактеристики за овој вид спортови, а уредено е и место за одмор и собирање“, информираше Трајановски.
Премиерот Никола Груевски истакна дека идејата за изградба на скејт-парк во Скопје е предложена во рамките на Денот на идеи во Владата во 2012 година.
Скејт-паркот ќе може да се користи од 10 до 24 часот, од март до декември. Градот Скопје ќе ангажира и инструктори кои покрај тоа што ќе се грижат за редот и безбедноста во скејт-паркот, на сите заинтересирани ќе им бидат на располагање за совети, обука и едукација за возење на скејтборд, ролери и БМХ велосипеди на ова урбано место во Скопје.
Трајановски информираше дека од буџетот на Град Скопје се издвоени 12 милиони денари за изградба на паркот.крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Едукативен мото-настан утре во Кисела Вода
Утре, со почеток во 11 часот, пред салата Расадник, ќе се одржи едукативен мото-настан од отворен карактер „Сите возиме, но некои знаат“.
На присутните од страна на лиценцирани инструктори ќе им бидат презентирани важноста за техничка исправност на моторното превозно средство (мопед, скутер, мотор), правилната употреба на безбедносна опрема за возење, како и справување во реални ситуации на улица.
„Преку дружење со претставници и членови од мото-клубови, автошколи и здруженија ќе се изврши едукација за безбедно возење во и надвор од урбани средини, за брзината како фактор за општа безбедност и за намалувањето на загаденоста на воздухот преку користење електрични превозни средства“, велат од Општина Кисела Вода.
Скопје
Герасимовски: Конечно, Работнички се враќа на шампионските патеки
Градоначалникот на Општина Центар Горан Герасимовски вчера вечер присуствуваше на тренингот на КК Работнички во салата Кале. Со кошаркарите разговараа за издигнувањето на тимот и потребите за достигнување на високи резултати и на следните натпревари.
„Сакам да се заблагодарам пред се и на тренерот на цел стручен тим но и на сите играчи за одличните резултати коишто ги имаме годинава. Успеавме со клубот од невозможно да направиме возможно. Клубот којшто го начекавме пред две години на 10то место со 4-5 неисплатени плати и долг од 600 000 евра да го вратиме на победничките патеки. Важно е што во моментов табелата трепка што сме на прво место и се надевам дека тоа така ќе остане и до крај. Јас верувам дека ќе имаме успех оваа сезона и уште поголем успех следната“, им порача Герасимовски на кошаркарите.
При средбата Герасимовски ги извести играчите дека општина Центар го има имотниот лист на салата и успеа да го исполни ветувањето дека ќе ја врати сопственоста на салата под ингеренции на општината.
Општина Центар на крајот на минатата година доби финансиски средства од Владата во вредност од 30 милиони денари наменети за реконструкција на салата, при што Герасимовски ги информираше играчите со процесот и проект планот кој е веќе во изработка за реновирање на матичната сала на Работнички. Конечно Работнички се враќа на шампионските патеки, ви благодарам за тоа, порача Герасимовски.
Скопје
Без струја дел од Карпош
Регионалниот центар за управување со кризи на Град Скопје, по добиеното известување од ЕВН, информира дека, поради технички зафати во електродистрибутивната мрежа, без електрична енергија ќе остане дел од Карпош.
Од 9 до 14.30 часот корисниците од улицата Мексичка, улицата Хаванска и дел од улицата Варшавска во општина Карпош ќе бидат без струја.