Скопје
Отворена новата катна гаража „Тодор Александров“ во центарот на Скопје
Новата катна гаража „Тодор Александров“, што изминатиов период се градеше на улицата Даме Груев, во центарот на Скопје, во вторник свечено беше отворена.
„Како дел од заложбите за решавање на проблемот со паркирањето во центарот, Градот Скопје изгради модерна катна гаража која обезбедува јавен паркинг за 604 лесни возила, вклучувајќи и паркинг-места за лица со посебни потреби и 120 велосипеди“, рече на отворањето скопскиот градоначалник Коце Трајановски.
Објектот е висок 23 метри, има бруто развиена површина од 29.183 квадратни метри, како и приземје, седум ката над земја и две нивоа под земја. На приземјето и на првиот кат се предвидени само деловни простории, а другите катови се исклучиво наменети за паркирање.
Влезот во катната гаража за лесните моторни возила е од североисточната страна на објектот, преку подземната улица која води до првото подземно ниво на гаражата. Излезот од гаражата е од првото подземно ниво преку подземната улица, на југоисточната страна на објектот, директно на улицата Даме Груев. Движењето на возилата по катови се одвива преку спирална рампа. На секој кат е изведена остава и тоалети за посетителите, вклучувајќи и тоалет за лицата со посебни потреби.
Паркингот за велосипеди е сместен во клунот на објектот, а до него се пристапува директно преку посебен лифт, како и преку 3-те патнички лифтови што се наменети за посетителите.
Трајановски додаде дека катната гаража „Тодор Александров“ е опремена со најсовремени и најквалитетни системи за откривање и јавување на слободни паркинг-места; систем за наплата на паркирањето; видео-надзор со 87 камери и контролна соба; систем за противпожарна заштита; систем за откривање и јавување на СО2 и гас; систем за заштита од атмосферски празнења, како и систем за климатизација и вентилација.
„Фасадата на објектот е покриена со ламинирано сигурносно стакло. Просторот околу гаражата е партерно уреден. Проектот за катната гаража на улицата Даме Груев е на Градежниот институт „Македонија“ АД Скопје. Катната гаража ја изградија градежниците на „Бетон“ АД Скопје, а Градот Скопје за овој значаен зафат издвои околу 780 милиони денари. Со новата катна гаража „Тодор Александров“ ќе стопанисува ЈП „Градски паркинг“, а паркирањето ќе чини 30 денари за час“, нагласи денеска градоначалникот Трајановски.
Претседателот на Владата на Република Македонија, Никола Груевски, упати честитка до граѓаните по повод 8.Септември – Денот на независноста на Република Македонија.
„Овој ден е потврда на нашата волја за независна држава. Што ние ќе оставиме за следната генерација зависи само од нас. Нашите дела преточени во проширени булевари, изградени водоводни мрежи, катни гаражи, училишта, болници и театри се наши честитки до граѓаните. Ми претставува особено задоволство што денеска ја отвораме катната гаража „Тодор Александров“, најголемата катна гаража во Скопје. Верувам дека таа ќе ги реши долгогодишните проблеми со паркирањето во центарот на градот и дека ќе ја користат и околните жители и посетителите на Скопје“, истакна премиерот Груевски. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
В недела посебен сообраќаен режим во Скопје
Министерството за внатрешни работи известува дека на 31.3.2024 (недела), со почеток во 9 часот, поради одржување атлетска трка на 10 км, со траса на движење од долниот паркинг на Средно Водно по регионалниот пат (Р2138) до паркингот на манастирот „Св. Пантелејмон“ и обратно, Единицата за безбедност на патниот сообраќај при СВР Скопје ќе преземе мерки за посебен режим на сообраќај, при што сообраќајот ќе се пренасочува по околните сообраќајници.
Министерството за внатрешни работи апелира до граѓаните да ги почитуваат наредбите што ги издаваат полициските службеници на сообраќајниците на кои ќе се одвива настанот.
Скопје
Герасимовски: Центар со стратешки план ќе ги дефинира приоритетите за енергетска транзиција
Потребна е стратегија и патоказ за да имаме одржлив процес за енергетска транзиција во Општина Центар, ова е заклучокот од денешната работилница што се одржа во Енергетската канцеларија во локалната самоуправа. На работилницата на која учествуваа експерти, претставници на невладини организации, преставници на Општината и општинското претпријатие Енергија центар, соговорниците дискутираа за актуелните проекти во доменот на енергетиката, зелената агенда, животна средина и др.
Градоначалникот Герасимовски презентираше до каде е Општината во процесот на енергетска трансформација и транзиција. Тој потенцираше дека фотоволтаичната централа поставена на градинката Пепелашка минатото лето дава одлични резултати во намалување на трошоците за електрична енергија, а следно е поставување на централа врз покривот на ООУ ,,Киро Глигоров”. Наша цел е да поставиме фотоволтаични системи на сите основни училишта, но засега почнуваме прво со ООУ „Киро Глигоров“. Мораме да бидеме претпазливи и внимаваме на секој детаљ. Засега сме во процес на јавен тендер и фирмите учесници треба да ги исполнат критериумите.
Вангел Андрески, директор на Енергија Центар ја потенцираше улогата на првото вакво претпријатие во државата за производство и продажба на електрична енергија од обновливи извори.
„Со поддршка на Фондацијата „Фридрих Еберт“ успеавме да формираме вакво претпријатие, а процесот беше макотрпен и понекогаш фрустрирачки, со многу докуменатција, барања за куп дозволи по разни институции. Сега кога веќе започнавме со работа се соочивме со нов проблем, а тоа е потреба од едукација и подигање на свеста на граѓаните за придобивките на фотоволтаиците и нивната безбедност за корисниците, истакна Андрески, зборувајки за проектот кој се планира за ООУ ,,Киро Глигоров”.
Експерите се согласија дека иднината е токму во енергетската транзиција и трансформација која треба да почне од локално за да се прошири на национално ниво. Заштедите, но и бенефитите за животната средина се од непроценлива важност за воведување на вакви „зелени“ енергетски системи, но за разлика од другите држави во ЕУ и регионот, ние сме се уште во пионерска фаза.
Сите заштедени средства, велат експерите, по теркот на европските држави, понатаму треба да се влеваат во проектите од доменот на животната средина, преку субвенции за здрав и еколошки начин на живот на граѓаните.
Денешната работилница ,,Патоказ за енергетска транзиција – дефинирање на стратешки пристап кон одржлива иднина на Општина Центар” се организираше под покровителство и соработка со Фондација Фридрих Еберт, невладината Гринер и Општина Центар.
Скопје
Едукативен мото-настан утре во Кисела Вода
Утре, со почеток во 11 часот, пред салата Расадник, ќе се одржи едукативен мото-настан од отворен карактер „Сите возиме, но некои знаат“.
На присутните од страна на лиценцирани инструктори ќе им бидат презентирани важноста за техничка исправност на моторното превозно средство (мопед, скутер, мотор), правилната употреба на безбедносна опрема за возење, како и справување во реални ситуации на улица.
„Преку дружење со претставници и членови од мото-клубови, автошколи и здруженија ќе се изврши едукација за безбедно возење во и надвор од урбани средини, за брзината како фактор за општа безбедност и за намалувањето на загаденоста на воздухот преку користење електрични превозни средства“, велат од Општина Кисела Вода.