Скопје
Поставен камен-темелник за изградба на трибина при стадионот во Илинден
Со свечено поставување камен-темелник за изградба на нова трибина, Општина Илинден продолжува со унапредување на спортската инфраструктура на фудбалскиот стадион во населба Илинден.
Проектот се реализира во повеќе етапи, при што во првата фаза, во соработка со Фудбалската федерација на Македонија, беше извршена целосна реконструкција и проширување на теренот. Поставена е нова вештачка трева, изградена е заштитна ограда и имплементиран е современ систем за дренажа, со што се обезбедени услови за одржување натпревари според современите светски стандарди и УЕФА критериуми.
Со оваа фаза е предвидена изградба на трибина со капацитет од 1.100 гледачи, како и современи подтрибински административни и технички простории. Проектот опфаќа изградба на соблекувални со санитарни јазли и тушеви, простории за судии и официјални лица, тоалети за посетители, вклучително и за лица со попреченост, магацински и складишен простор и посебен коридор за играчите. Дополнително, хортикултурно ќе се уреди околниот простор, ќе се изгради паркинг со капацитет за над 60 возила, ќе се постави ново осветлување со рефлектори и ќе се обнови комуналната инфраструктура.
На настанот присуствуваа градоначалникот на Општина Илинден, Александар Георгиевски, министерот за спорт Борко Ристовски, пратеничката Драгана Бојковска, како и претставници на јавните институции, членови на Советот на Општина Илинден и бројни граѓани.
Градоначалникот Георгиевски истакна дека оваа инвестиција претставува значаен придонес за развојот на спортската инфраструктура и создавањето подобри услови за младите, како и дека Општина Илинден и во иднина ќе продолжи со инвестиции насочени кон создавање современи услови за спорт и подобрување на квалитетот за живот на граѓаните.
Министерот Ристовски ја потенцираше важноста од ваквите проекти и изрази поддршка за понатамошен развој на спортот во општината.
Општина Илинден и во иднина ќе продолжи да ги унапредува условите за спорт, при што новата трибина ќе има значајна улога во развојот на спортските активности и зајакнувањето на стадионот како центар на спортскиот живот во општината и регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Општина Карпош: Улица „Џумајска“ со нов инфраструктурен сјај
Целосно е реконструирана и пуштена во употреба за сообраќај улицата „Џумајска“ во урбаната заедница „Кузман Јосифовски – Питу. Станува збор за отсечка на улицата која се протега од раскрсницата со ул. „Леринска“ до раскрсницата со ул. „Брадфорска“, во должина од 517 метри. Со вкупна инвестиција од околу 15 милиони денари, обезбедена од Министерството за транспорт, реконструиран е коловозот кој опфаќа ревитализација на асфалтната површина, замена на рабниците и замена на долниот строј, извести општината Карпош.

„Изведувач на градежните работи е „Друштвото за градежништво, производство, трговија и услуги увоз-извоз БИТЕМ ДООЕЛ Скопје“, а инвеститор на овој комунален проект е Општина Карпош со проектант „МГ Проект“, од Скопје.

Општина Карпош продолжува да инвестира средства во рамномерен инфраструктурен, урбан и комунален развој во сите четиринаесет урбани и месни заедници, кои се наоѓаат во нејзниот состав“, соопшти општина Карпош.
Македонија
Герасимовски: Центар го реализираше првиот детски фестивал „Детелинки“, малите ѕвезди блеснаа на сцената
Децата заедно со воспитно-згрижувачкиот кадар од центарската градинка „13 Ноември“, вчера приредија вистинска музичка и сценска магија на првиот детски фестивал „Детелинки“, што се одржа во Паркот на Франкофонија, во организација на Општина Центар.
Преку музика, танц, оригинални детски песни и многу насмевки, најмладите покажаа талент, креативност и искрена детска радост, додека публиката уживаше во вечер исполнета со емоции, аплаузи и фестивалска атмосфера.
„Општина Центар за првпат реализира детски фестивал и се надевам дека „Детелинки“ ќе прерасне во убава традиција. Како локална самоуправа, континуирано вложуваме и ќе продолжиме да вложуваме во проекти кои поттикнуваат креативност и создаваат простор за раст, игра и слободно изразување“, порача градоначалникот Горан Герасимовски.

Тој посочи дека со „Детелинки“, како и со другите настани наменети за сите генерации од Програмата за култура, одбележуваме 50 години постоење на Општина Центар.
„Ако детелинката носи среќа, тогаш најголемата среќа на нашата општина се токму децата, нашите весели и најскапоцени “детелинки“, порача Герасимовски.
Во рамки на фестивалот беше доделена благодарница на градинката „13 Ноември“ за нејзината долгогодишна работа и придонес во развојот на детската креативност и воспитување. Градоначалникот упати благодарност до целиот тим на градинката, како и до директорката Ружица Биџовска.
На фестивалот за првпат беше доделен и трофејот „Детелинки“, кој ќе стане симбол на новата фестивалска традиција. Трофејот секоја година ќе се пренесува од градинка на градинка како препознатлив белег на континуитет, креативност, среќа и детска радост.
Македонија
Делови од Карпош, Шуто Оризари и Центар денеска без струја
Од ЕВН Македонија АД известуваат дека денеска без електрична енергија ќе останат:
– во периодот од 09.00 до 14.00 часот, корисниците од улицата Александар Урдаревски лоцирани кон приклучокот на обиколницата во Шуто Оризари, општина Шуто Оризари, како и корисниците од улицата Козле од бр. 114 до бр. 124, општина Карпош;
– во периодот од 09.15 до 15.15 часот, корисниците од улицата Самоилова, улицата Јоаким Крчовски, Музеј на современа Уметност – Скопје, општина Центар.
