Скопје
Промовирани новите велосипедски патеки во Скопје
Со велосипедско дефиле што се возеше по должината на булеварот „Илинден“, а коешто го предводеше градоначалникот на Град Скопје, Коце Трајановски, во понеделник беа промовирани новоизградените и реконструирани велосипедски патеки од рутата 1, од проектот „Скопје велоград 2017“.
„Денеска, на Денот на пролетта, ги промовираме новоизградените и реконструирани велосипедски патеки од рутата 1, од сложениот проект „Скопје велоград 2017“, со кој ќе ја унапредиме велосипедската инфраструктура во Скопје и ќе ја зголемиме безбедноста во велосипедскиот сообраќај“, рече градоначалникот Коце Трајановски.Со велосипедските патеки од рутата 1 се овозможи поврзување на Гази Баба, преку центарот на градот со Карпош. Како дел од оваа рута, изградени се и реконструирани велосипедски патеки во вкупна должина од 7.600 метри, и тоа: на булеварот „Александар Македонски“, од клучката кај хотелот „Континентал“, до клучката Естекада, од двете страни; на улицата „Беласица“, од булеварот „Гоце Делчев“ до клучката кај хотелот „Континентал“, од двете страни; на булеварот „Гоце Делчев“, од булеварот „Крсте Мисирков“ до улицата „Беласица“, од двете страни; на булеварот „Илинден“, пред зградата на Владата и на потегот од крстосницата со булеварот „Свети Климент Охридски“ до фонтаната „Лотосов цвет“, од двете страни и на булеварот „Илинден“, на потегот од Матично до крстосницата со улицата „Љубљанска“, од едната страна. За изградба и реконструкција на велосипедските патеки од Рута 1 и на пешачките патеки по нивната должина Градот Скопје вложи 48 милиони денари. Градежните работи ги изведуваа екипите на ЈП „Улици и патишта“.Трајановски додаде дека Градот Скопје веќе интензивно работи на изградба и реконструкција на велосипедските патеки од Рутата 2 од проектот „Скопје велоград 2017“ што треба да ги поврзат Аеродром – Центар – Карпош со Ѓорче Петров.Во наредниот период ќе следуваат градежни работи и на Рутата 3 којашто треба да ги поврзе Кисела Вода со Центар и Карпош и на Рутата 4 којашто треба да ги поврзе Бутел, Чаир и Центар. „Овој проект треба да заврши во 2017 година, но ние правиме напори поголемиот дел од најавените велосипедски патеки да ги завршиме во текот на оваа, 2016 година. Ќе напоменам и дека имаме одлична соработка со невладината организација „На точак“ кои ни помагаат со сугестии и забелешки и се надевам дека нашата добра соработка ќе продолжи и натаму. Нашата цел е да создадеме добри услови за возење велосипед во Скопје и да ги поттикнеме граѓаните во што поголем број да користат велосипед како транспортно средство“, нагласи градоначалникот Коце Трајановски./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
ЈСП: Јавниот превоз по неделен возен ред, жичницата на Водно нема да работи
Јавното сообраќајно претпријатие Скопје соопшти дека јавниот превоз ќе функционира по неделен возен ред, а жичницата на Водно нема да работи.
Како што се појаснува во соопштението, дежурни од седум до 14 часот ќе бидат билетарниците на Транспортен центар и таа во Ѓорче Петров.
Скопје
Петровец, Сарај, Карпош, Кисела Вода и Центар денеска без струја
Регионалниот центар за управување со кризи на Град Скопје, по добиеното известување од ЕВН, информира дека поради технички зафати во електродистрибутивната мрежа, без електрична енергија ќе останат делови од општините Петровец, Сарај, Карпош, Кисела Вода и Центар.
· од 8.30 до 14.30 часот корисниците од селата Кожле и Бадар, како и тунелот кај Катланово на автопатот Велес – Скопје (општина Петровец);
· од 9 до 11 часот корисниците од село Кондово (општина Сарај);
· од 9 до 11 часот корисниците од делови од улиците Вич и Разловечко востание (општина Карпош);
· од 9 до 12 часот корисниците од делови од улиците Иван Козаров и Тоне Томшиќ. (општина Кисела Вода);
· од 9 до 15 часот корисниците од дел од улицата Максим Горки, односно објектите во околината на Домот на градежниците (општина Центар);
· од 11 до 13 часот корисниците од дел од улицата Орце Николов, поточно објектите во околината на куќните броеви 155 и 156 (општина Карпош)
Скопје
Санкционирани 229 непрописно паркирани возила на територијата на општина Центар
ЈП Паркинзи на општина Центар и општина Центар во соработка со Сообраќајната полиција-Скопје во текот на една недела санкционираа 229 непрописно паркирани возила кои го попречувале нормалното и безбедно одвивање на сообраќајот.
„Во периодот од 15.04. до 21.04.2024 година, со помош на специјалните возила „Пајак“ на ЈП ПОЦ отстранети се 123 непрописно паркирани возила, а со поставување на механичко средство „Блокатор“ санкционирани се 106 возила кои биле затекнати на резидентни паркиралишта, а не биле корисници-резиденти на секторот во којшто биле паркирани“, велат од ПОЦ.
ЈП ПОЦ и општина Центар секојдневно водат грижа за да го доведат во ред сообраќајниот хаос настанат од непрописно паркираните возила на територијата на Општина Центар. Потсетуваме на почитување на сообраќајните правила од страна на секој учесник во сообраќајот со цел одржување на ред и безбедност на улиците, се додава во соопштението на ПОЦ.