Скопје
„Скопје креатива“ објави конкурси за изработка на дизајни за пет брендови
Платформата „Скопје креатива“ објави наградни конкурси за изработка на дизајни за пет македонски брендови.
Компанијата „Инфинити солушнс“ ги повика ИТ дизајнерите од Македонија да се вклучат во нивниот повик за изработка на софтверски продукт, брендот „Мама с“ објави конкурс за изработка на уникатна и лесно монтажна полица за поставување на нивните производи, компанијата „Пакомак“ ги повика сите дизајнери да направат креација од амбалажен отпад, а компанијата „Вива“ да изработат препознатлива маскота за нивните сокови.
Градоначалникот на Град Скопје, Коце Трајановски и претставници од бизнис –заедницата во четврток одржаа конференција за медиуми по повод објавувањето јавни повици до креативците од нашиот град, кои ќе учествуваат во наградните конкурси организирани преку платформата „Скопје креатива“.
На конференцијата присутните беа информирани за деталите на годинешната програма на проект-платформата за развој на креативните индустрии „Скопје креатива“, со цел создавање инвентивни и конкурентни креативни производи и услуги за фирмите или компаниите во компаниите учеснички во проектот.
„Проектот и фестивал „Скопје креатива“ има цел да промовира, афирмира и создава конкретни производи и услуги, кои ќе бидат конкурентни на светскиот пазар. Идејата на овој проект е да овозможи посилно да се поврзат креативните индустрии од една страна и бизнис-заедницата од друга страна, со цел да се подигне свеста за значењето од ваквата соработка, а воедно и да се зголеми профитабилноста на индустријата во целост. „Скопје креатива“, на овој начин покажува и докажува дека ваквите врски меѓу креативниот потенцијал и бизнис-заедницата отвора можност за ангажирање на лицата вклучени во ваквите инцијативи, а воедно се дава посебно значење на уметничкото изразување во областа начерена креативна индустрија“, истакна градоначалникот Трајановски.
На конференцијта за медиумите директорката на Универзална сала, Вера Бошковска, најави дека во рамките на проектот „Скопје креатива“, ќе се објави и првата дигитална дата-база на податоци за бесплатна регистрација на сиот креативен потенцијал од нашиот град, која ќе биде достапна преку официјалната веб страница на „Скопје креатива“, а ќе претставува уште една можност за директно вклучување на креативците и бизнис-секторот од нашава држава.
Проектот „Скопје креатива“ е поддржан од Град Скопје, а ќе го реализира Униврзална сала.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Арсовска изврши увид во завршните градежни работи на реконструкција на водоводната мрежа на улицата Антон Попов
Градоначалничката на Град Скопје, Данела Арсовска заедно со претставници од Секторот за планирање и уредување при Град Скопје и скопското јавно претпријатие „Водовод и канализација“ извршија увид во завршните градежни работи на реконструкција на водоводната мрежа на улицата Антон Попов во општината Гази Баба.
Со изведбата на водоводните приклучоци на овој потег кои се поврзуваат со постојната водоводна мрежа со профил од 150 милиметри, се решава повеќедеценискиот проблем на жителите со честите прекини во водоснабдувањето поради застареноста на системот, а се решаваат загубите на вода и трошоци за поправките на дефектите на водоводната мрежа, велат од Град Скопје.
Изведбата на овој проект претставува дел од програмата на градоначалничката Данела Арсовска за обновување на градската мрежа, во децениски заборавените населени места, што претставуваше и долгогодишно барање на жителите од тој дел на градот, се додава во соопштението на Град Скопје.
Скопје
Скопје викендов со изменет режим на сообраќај поради одржување на предизборни митинзи
Поради одржување митинг од изборната кампања за претседателските избори 2024 година на 21 април (недела) во 13.00 часот пред седиштето на Европската унија на ул.„Св. Кирил и Методиј“ во Скопје, Единицата за безбедност на патниот сообраќај при СВР Скопје ќе преземе мерки за посебен режим на сообраќај на оваа улица почнувајќи од 19:00 часот на 20 април (сабота) до 21.00 часот на 21 април (недела), соопштуваат од МВР.
Притоа, за сообраќај ќе биде затворена ул.„Св.Кирил и Методиј“ на потегот од крстосница со булевар „Кочо Рацин“ до крстосница со булевар „Св. Климент Охридски“.
Исто така, на 21 април во 20.00 часот на плоштад „Македонија“ во Скопје ќе се одржи митинг од изборната кампања за претседателските избори 2024 година.
Од тие причини, Единицата за безбедност на патниот сообраќај при СВР Скопје ќе преземе мерки за посебен режим на сообраќај во централното градско подрачје, а сообраќајот времено ќе се запира на сообраќајниците по кои ќе се движат учесниците на настанот.
За таа цел, МВР апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвиваат настаните
Скопје
Советот на Општина Центар даде зелено светло за бесплатни тренинзи на јуниорите на КК Работнички во салата на ООУ ,,Коле Неделковски’’
На денешната 35. Седница на Советот на Општина Центар е усвоен предлогот на градоначалникот Горан Герасимовски за користење на училишната спортска сала во ООУ ,,Коле Неделковски” за потребите на младите кошаркари на КК Работнички, без надоместок, додека не биде реновирана салата во Градски парк.
На советниците градоначалникот Герасимовски им појасни дека се работи за исклучителна ситуација која ќе трае само додека не се создадат услови за одржување тренинзи во реновираното здание и дека оваа одлука е наменета само за јуниорскиот тим.
,,Ова не е одлука за првиот тим на Работнички туку за младинскиот клуб на КК Работнички бидејќи во моментот кога ќе почне да се реновира салата, тие ќе немаат простор за тренинзи. Знаеме каква е финасиската ситуација на младинскиот тим. Истиот функционира и од спортскиот ваучер што го доделува Владата, кој за жал доцни. И поради тие причини и поради тоа што самиот тим е сопственост на Општината, ние мораме да се грижиме за клубот и за младинците што таму тренираат и играат. Затоа мислам дека барањето е издржано и очекувам советниците да се согласат” истакна Герасимовски.
Предлог одлуката за користење на спортската сала во ООУ ,,Коле Неделковски” без надоместок од страна на КК Работнички за 2024 година е усвоен со 21 гласа ЗА, ниеден глас против и без воздржани.
Одлуката беше донесена откако КК Работнички-Скопје побара од Општината, како акционер, да добие тренинг термини во основните училишта за својот младински тим, поради реновирање на салата.
,,Како наш единствен акционер, сопственик и воедно сопственик на основните училишта во општината ве замолуваме да ни дозволите нашите младинци да тренираат во една од салите на школите кои се во ваша надлежност, стои во дописот на КК Работнички-Скопје испратен до Општина Центар.