Македонија
Собранието ги избра Ана Митреска и Игор Величковски за вицегувернери на Народната банка
На предлог на гувернерот на Народната банка, Трајко Славески, Собранието ги избра Ана Митреска и Игор Величковски за вицегувернери на Народната банка, коишто ќе ја извршуваат оваа функција во наредните седум години.
Ана Митреска е реизбрана за втор мандат на функцијата вицегувернер, откако првпат беше именувана во октомври 2018 година. Таа е магистер по монетарна економија и искусен професионалец во централнобанкарското работење со дваесет и петгодишно работно искуство во Народната банка. Во својата професионална кариера има значаен придонес во активностите поврзани со макроекономските анализи, среднорочните проекции и истражувачката работа на Народната банка. Од почетокот на својата кариера во Народната банка, активно е вклучена во комуникацијата со меѓународните финансиски институции и агенциите за кредитен рејтинг и е авторка на повеќе научни и стручни трудови од областа на монетарната и фискалната политика.
Игор Величковски е избран за вицегувернер како истакнат професионалец во областа на платните системи и финансиските пазари. Тој е доктор по монетарна економија на Универзитетот во Стафордшир, Велика Британија. Величковски е дел од Народната банка повеќе од триесет години. До именувањето ја извршуваше функцијата директор на Секторот за операции на финансиските пазари и платни системи. Неговиот професионален ангажман опфаќа значајни реформи во платната инфраструктура, како и активна улога во процесите на модернизација и интеграција, вклучително и приклучувањето на земјата кон Европската област за плаќања во евра (СЕПА) во 2025 година.
Со изборот на новите вицегувернери, велат од Народната банка, се обезбедува непрекинатост во спроведувањето стабилна и кредибилна монетарна политика заради одржување на ценовната стабилност и за поддршка на економскиот развој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба Сали – Маричиќ: Реформската агенда и измените на Изборниот законик во фокусот
Првиот заменик-претседател на Владата, Беким Сали, оствари средба во Владата со претседателот на Државната изборна комисија (ДИК), Бојан Маричиќ, и потпретседателот Абдуш Демири, на која се разговараше за Предлог-измените на Изборниот законик.
На средбата беше истакнато дека овие измени, доставени од ДИК до Собранието и Министерството за правда, се од особено значење за унапредување на реформската агенда и спроведувањето на изборните реформи.
Присутните се осврнаа и на последниот извештај на ОБСЕ/ОДИХР, кој позитивно го оценува организирањето на Локалните избори 2025 година, нотирајќи напредок во демократските процеси.
Се наведува дека Владата останува посветена на реализацијата на реформите согласно предвидената динамика, со цел зајакнување на демократските стандарди и обезбедување слободни и фер изборни процеси.
Македонија
Димитров од Атина: Меѓу Скопје и Софија нема компромис, туку пакет кој не донесе решение
Дипломатскиот пристап кон решавање на спорот помеѓу Македонија и Бугарија беше тема на остра дебата на меѓународниот форум во Атина, каде поранешниот шеф на дипломатијата Никола Димитров му реплицираше на бугарски претставник од публиката.
Никола Димитров, во својство на претседател на невладината организација „Солуција“, оцени дека актуелниот модел на односи не претставува вистински компромис. Тој рече дека сегашната рамка, наместо решение, продуцирала најлоши билатерални односи во историјата на двете земји.
„Компромис е решение кое двете страни ќе ги направи подеднакво несреќни. Кога едната страна е еуфорична, тоа не е компромис. Прашањето не е решено, а резултатите од таквата стратегија се тажни“, изјави Димитров, реплицирајќи на ставот од бугарскиот претставник дека прашањето било затворено и државата сега треба да испорача.
„Бугарија на сите анкети кај нас е најголем непријател. Дали навистина тоа го сакате? Колку и да мислите дека ви е добра стратегијата – не е лошо да си ги погледнете резултатите“, му порача поранешниот шеф на македонската дипломатија на бугарскиот претставник на форумот.
Димитров потенцираше и дека земјите од регионот треба да се третираат како идни членки, а не како трети држави. Постепената интеграција, како што рече, треба да овозможи слободно движење на луѓе и стоки и ни треба поголема динамика и резултати преку иницијативи како пристапот до СЕПА, „зелените ленти“ и укинувањето на роаминг трошоците.
Македонија
Мицкоски од Виена: Потребни се дела, а не зборови – Европа мора активно да ги обликува правилата
Премиерот Христијан Мицкоски во Виена испрати јасна порака до европските партнери: Во услови на неизвесност, енергетски предизвици и економски притисоци, зборовите не се доволни, потребни се конкретни одлуки и дела.
Мицкоски кој се сретна со канцеларот Кристијан Стокер порача дека Европа се наоѓа во историски пресуден момент во кој мора да одбере дали само ќе реагира на кризите или активно ќе ги обликува новите глобални правила. Тој нагласи дека во услови на енергетски и економски предизвици, стабилноста зависи од заедничкиот раст.
„Европа нема да биде силна ако нејзините делови останат слаби. Ниту пак ќе биде конкурентна ако нејзините економии не растат заедно. Нашата определба е јасна: градиме држава што нуди сигурност и систем во кој работата се исплати“, истакна премиерот.
Мицкоски потенцираше дека македонската влада е подготвена да ја преземе својата одговорност во рамките на билатералната соработка, но и како дел од заедничката европска иднина. Фокусот на власта останува на проекти што ќе траат подолго од еден мандат и ќе донесат бенефит за идните генерации.
„Подготвени сме да работиме, подготвени сме да носиме одлуки и подготвени сме да испорачаме резултати,“ дециден беше Мицкоски, нагласувајќи дека партнерството мора да се темели на меѓусебна доверба и конкретни економски проекти.
