Телото на убиеното момче од Бојане е дадено на обдукција, осомничениот е во притвор

Јавен обвинител од Основното јавно обвинителство Скопје издаде Наредба за обдукција на телото на убиеното 18 годишно момче од скопско Бојане.

Како што информираат од ОЈО Скопје дадени се и наредби за вештачење на траги и за вештачења и споредбени анализи на оружјето со кое се смета дека е сторено делото.

– Постои основано сомнение дека кривичното дело – Убиство според член 123 став 1 од Кривичниот законик го извршил 19-годишник од истото село, кој е лишен од слобода. Но, имајќи предвид дека прибирањето на доказите е во тек, а постојат околности кои укажуваат на опасност од бегство, можност за влијание на сведоци и прикривање на трагите, како и ризик осомничениот да изврши друго кривично дело, јавниот обвинител од судијата на претходна постапка побара да определи мерка краткотраен притвор од 48 часа до обезбедување на сите докази и формално отворање на истрагата, информираат од ОЈО Скопје.