ВМРО-ДПМНЕ: Филипче лицата со правосилни пресуди со кои се појави во Ново Село ги нарекува „деца на Македонија“

ВМРО-ДПМНЕ денеска упати обвинувања кон лидерот на СДСМ, Венко Филипче, за лицата со кои се појавил за време на неодамнешните случувања во Ново Село, тврдејќи дека меѓу нив има лица со правосилни пресуди за насилство и кривични дела поврзани со наркотични средства.

Од владејачката партија реагираат на тоа што Филипче овие лица ги нарекол „деца на Македонија“ и тврдат дека СДСМ се обидел да предизвика инцидент и од него да извлече политичка корист.

„Лицата со кои Филипче се појави во Ново Село не се невини жртви како што сака да ги претстави, не се деца, а најмалку невини. За дел од нив постојат правосилни судски одлуки за кривични дела поврзани со насилство и наркотични средства“, соопшти ВМРО-ДПМНЕ.

Партијата конкретно го посочува Христијан Ефтимов, за кого тврди дека е внук на Вице Заев и менаџер во „Тотал Инженеринг“. Според ВМРО-ДПМНЕ, Ефтимов заедно со Илија Стојанов е правосилно осуден на условна казна затвор од една година и шест месеци за тепање луѓе на плоштадот во Струмица.

За Стојанов, пак, од партијата тврдат дека има и правосилна условна пресуда за кривично дело по член 215 став 1 од Кривичниот законик, поврзано со неовластено производство и пуштање во промет наркотични дроги, психотропни супстанции и прекурсори.

ВМРО-ДПМНЕ го посочува и организацискиот секретар на СДСМ, Зоран Трифуновски, кој бил присутен со Филипче во Ново Село. Во соопштението се тврди дека Трифуновски бил гонет за обид за убиство и дека има досие поврзано со насилство и тепачки.

Од ВМРО-ДПМНЕ обвинуваат дека Филипче со овие лица сакал да предизвика инцидент во Ново Село, а случувањата ги споредуваат со претходниот инцидент во Ташмаруништа.

„Токму такви насилници и корисници на дрога, како што се Ефтимов, Стојанов, Трифуновски, Филипче ги носи со себе и се обидува да ги претстави како симбол на младоста и иднината на Македонија“, се наведува во партиското соопштение.