Македонија
Здружението „Јавна соба“ доби објект на користење од Министерството за одбрана
Министерот за одбрана, Зоран Јолевски во присуство на министерката за култура, Елизабета Канческа-Милевска, во петок симболично му ги предаде клучевите на претставникот од Здружението „Јавна соба“, Александар Велиновски од објектот кој досега беше под надлежност на Министерството за одбрана.
Министерот Јолевски во изјава за медиумите го истакна значењето на креативните индустрии и додаде дека за развој на оваа индустрија има целосна поддршка од Министерство за одбрана.
„Економија базирана на креативност и знаење е важна фаза од развојот на секоја земја. Сигурен сум дека овој објект ќе им користи на сите наши уметници и на други луѓе кои имаат идеи, за нивните иновации да бидат нотирани и потоа искористени за развој на бизнисите во земјата и да си го најдат местото на пазарот“, истакна Јолевски.
Во овој објект лицата кои имаат креативни иновации ќе можат истите да ги развијат и да се сретнат со потенцијалните инвеститори кои потоа би ги вклучиле во нивните производства, и би ги реализирале на пазарот.
Министерката, Канческа Милевска истакна дека овој Центар за дизајн односно Дизајн прототип Центар – Јавна соба ќе биде еднинствен од овој тип на Балканот, кој има за цел да го подигне и артикулира работењето на дизајн секторот во Македонија и регионот.
Претставникот на Центарот, Александар Велиновски изјави дека оваа нова институција ќе биде значајна за дизајнерите, но истовремено и за бизнис-секторот.
„Бизнис-секторот преку креативноста на младите дизајнери ќе го унапреди своето работење а, од друга страна, дизајнерите ќе постигнат самостојност во работењето“, истакна Велиновски.
Објект со вкупна површина од 1.450 метри квадратни, со одлука на Владата му е даден под наем на Здружението „Јавна соба“ од Скопје за период од 20 години. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Предизборен молк пред утрешните претседателски избори, денеска гласа дијаспората, болните и затворениците
Започна предизборниот молк пред утрешните претседателски избори. Молкот завршува на 24 април во 19 часот, кога се затвораат избирачките места.
Денеска ќе гласаат избирачите запишани во посебниот извод од избирачкиот список, односно дијаспората, затворениците, лицата во старските домови, болните и изнемоштени и внатрешно раселените лица.
Гласањето за претседател започна во саботата, први гласаа членовите на избирачките одбори кои отпатуваа да го спроведат гласањето во дијаспората.
Во посебниот извод од избирачкиот список се запишани 191 избирачи кои треба да го спроведат гласањето во дијаспората.
Во дипломатските претставништва и конзуларни канцеларии треба да гласаат наши граѓани кои живеат во странство а кои се пријавиле за гласање.
Право на глас имаат 1.814.317 гласачи запишани во единствениот избирачки список. Избирачките места се отвораат во 7 часот, а гласањето трае до 19 часот. Се гласа на 3480 избирачки места во целата земја.
Скопје
Петровец, Сарај, Карпош, Кисела Вода и Центар денеска без струја
Регионалниот центар за управување со кризи на Град Скопје, по добиеното известување од ЕВН, информира дека поради технички зафати во електродистрибутивната мрежа, без електрична енергија ќе останат делови од општините Петровец, Сарај, Карпош, Кисела Вода и Центар.
· од 8.30 до 14.30 часот корисниците од селата Кожле и Бадар, како и тунелот кај Катланово на автопатот Велес – Скопје (општина Петровец);
· од 9 до 11 часот корисниците од село Кондово (општина Сарај);
· од 9 до 11 часот корисниците од делови од улиците Вич и Разловечко востание (општина Карпош);
· од 9 до 12 часот корисниците од делови од улиците Иван Козаров и Тоне Томшиќ. (општина Кисела Вода);
· од 9 до 15 часот корисниците од дел од улицата Максим Горки, односно објектите во околината на Домот на градежниците (општина Центар);
· од 11 до 13 часот корисниците од дел од улицата Орце Николов, поточно објектите во околината на куќните броеви 155 и 156 (општина Карпош)
Македонија
Време денес повремено со пороен дожд и грмежи, температурата ќе достигне 14 степени
Вренето денес ќе биде претежно облачно со повремени врнежи од дожд, наместа пообилни (и над 20 л/м²) и поројни, проследени со грмежи особено во западните и јужните делови од земјата. Ќе дува слаб до умерен, а долж Повардарието и во источните делови повремено засилен ветер од југоисточен правец. Минималната температура ќе биде во интервал од 4 до 10, а максималната ќе достигне од 11 до 17 степен.
Во Скопје облачно со повремени врнежи од дожд повремено пороен и проследен со грмежи. Ќе дува слаб до умерен јужен ветер. Минималната температура ќе се спушти до 6, а максималната ќе достигне до 14 степени, јавува УХМР.
Ветерот долж Повардарието ќе продолжи да засилува и во среда. Во среда и четврток ќе има локална појава на повремено пороен дожд и услови за грмежи. Потоа следи период на претежно стабилно и постепено потопло време.