Претседателката Гордана Сиљановска-Давкова која престојува во официјална посета на Република Словенија, денеска во Љубљана ја посети Македонската православна црква „Св. Климент Охридски“ и оствари средба со членовите на Сојузот на Македонските културни друштва и Црковните одбори.

Во црквата македонската претседателка присуствуваше на неделна служба. По нејзиното завршување на барање на црковната заедница таа се обрати пред присутните верници.

-Каде и да сме по светот имаме еден заеднички дом, заедничко црковно катче каде може да се собереме – рече претседателката.

Црквата и религијата, додаде таа, се многу важни за македонскиот народ и за опстојувањето на неговиот долг пат.

Сиљановска Давкова денеска во македонската Амбасада во Љубљана ќе се сретне и со македонски иселеници кои работат во областа на науката, културата, медицината, а дел од нив се и добитници на признанија во Словенија.

Претседателката Сиљановска-Давкова попладнево ќе одржи состанок со членовите на Македонско-словенечкиот бизнис клуб, додека во Крањ ќе го посети Македонското културно друштво, во чии простории се наоѓа и првата македонска библиотека.

Сиљановска-Давкова утре во Љубљана ќе биде пречекана со највисоки државни и воени почести од претседателката на Република Словенија, Наташа Пирц Мусар.

Предвидено е претседателките да одржат тет-а-тет средба, по што ќе следува пленарен состанок на македонската и словенечката делегација.

Сиљановска-Давкова ќе оствари средба и со претседателот на Државниот збор на Република Словенија, Зоран Стевановиќ.

Во рамки на посетата на Словенија предвидено е претседателката Сиљановска-Давкова да положи венец пред Споменикот на жртвите од сите војни и жртвите поврзани со војните.

Во вторник, претседателката Сиљановска-Давкова ќе одржи предавање на Правниот факултет во Љубљана на тема: „Уставни трансформации на патот кон ЕУ: Реформи или уставен инженеринг?“.

Премиерот Христијан Мицкоски во врска со предлог-законот за игрите на среќа изјави дека новите законски решенија имаат цел да воведат ред и ограничувања во оваа дејност, нагласувајќи дека државата мора да се заштити од негативните последици на неконтролираната експанзија на казината и објектите за коцкање.

„Имаме чувство дека државата наликуваше на Лас Вегас. Буквално, на секој чекор гледавме дуќани, кои со силни светлечки реклами се рекламираат на овој тип на игри на среќа, пред сè тука мислам на казината и коцкањето, и некако како по правило до нив веднаш имате канцеларија за брзи кредити. Па веднаш до нив имате заложувалница и така натаму.

Тоа е некаков систем кој мораме да го регулираме и цениме дека претставува систем кој, за жал, е причина за многу семејни несреќи и човечки трагедии. Со овој закон се регулира оваа дејност, повеќе нема да има таков тип на реклами кои привлекуваат внимание. Во некои места дури цели мали населби имаа по неколку казина, буквално не личеше тоа на ништо.

Со овој закон, свесни за последиците, можеби и за фискалниот ефект, но ние цениме дека мора да се стави ред и дисциплина во игрите на среќа и дека државата не може да наликува на Лас Вегас“, вели Мицкоски.

Во врска со реакциите дека законот бил донесен нетранспарентно и „мафијашки“ и дека тоа ќе значи отворање врата на црно пазарење и губење на илјадници работни места, Мицкоски вели дека законот бил ултратранспарентен.

„Беа повикани буквално сите засегнати страни да учествуваат во неговата изработка. Нормално е дека не можеме да се усогласиме сто проценти со оние кои се дел од тој бизнис, бидејќи тие имаат свој интерес. Ние го штитиме интересот на државата и граѓаните.

Не мислам дека ќе има нелегални приредувања на игрите на среќа и не мислам дека ќе се изгубат работни места. Едноставно се става дисциплина и поинаков лик, поинаква перцепција ќе имаат македонските граѓани“, изјави Мицкоски.

Премиерот Христијан Мицкоски посочи дека вчерашната одлука на Владата за продолжување на мерките за намален ДДВ за бензините и намалени акцизи за дизелот и за бензините до 1 јуни ќе значи дека и понатаму ќе имаме горива со најниски цени во регионот.

-Вчера имваме вонредна онлајн седница на Владата на која до 1 јуни ги продолживме мерките што значат намален ДДВ за бензините и намалени акцизи за бензините и за дизелот. Со тоа ние како држава повторно сме со најниски цени на бензините и на дизел горивата, рече Мицкоски во одговор на новинарско прашање по пуштањето нов градски пазар во Виница.

Мислам, додаде, дека така и треба да продолжиме и понатаму.

-Покрај сите ризици и покрај сите предизвици со кои се соочува светот ние во овие речиси три месеци од би рекол најголемата енергетска кзриза која се има случено не според моето кажување, тукуи според кажувањето на претседателот на Светската енергетска заедница, како држава не само што успеваме да обезбедиме најниска цена за горивата, туку и практично да им ја понудиме на соседните земји, бидејќи голем дел од нивните граѓани од север, запад и југ доаѓаат кај нас да точат гориво, рече Мицкоски.

Како Влада, порача, ќе продолжиме во таа насока и понатаму.

Со одлуката на Владата и во наредните две недели ќе важи намалениот ДДВ од 18 на 10 отсто за бензините и намалената акциза од 4 денари по литар за дизелот и од два денари по литар за бензините.