Македонија
Манчевски: Државата нема намера да биде сопственик ниту водач во технолошкиот парк, тоа треба да бидат универзитетите, бизнисот и студентите
Министерот за информатичко општество и администрација, Дамјан Манчевски, се обрати на презентацијата на нацрт-студијата за изводливост за Научно-технолошки парк во Скопје. Носител на проектот е Фондот за иновации и технолошки развој, а се имплементира во соработка со Министерството за информатичко општество и администрација.
Како што потенцираше министерот Манчевски, идејата за технолошки парк во минатото била далеку од реализација, за разлика од денес.
„Среќен сум што имаме не само презентација на физибилити-студија, која ја финансираше и Европската Унија, туку за разлика од други проекти или стратегии, веќе се обезбедени и целосни финансиски средства и целосна конструкција за тој да стане реалност. Следната година, многу брзо откако оваа студија ќе се финализира, ќе се направи комплетен план и технолошкиот парк ќе стане реалност“, истакна Манчевски изразувајќи задоволство што се вклучени сите универзитети и стопански комори.
Според него, државата нема намера да биде сопственик ниту водач во технолошкиот парк, туку тоа треба да бидат универзитетите, бизнисот и студентите, што всушност го покажува и избраната локација, со цел да се развие нов вид на претприемнички дух и задржување на младите во нашата држава, односно квалитетниот кадар.
На презентацијата се обрати и директорот на Фондот за иновации и технолошки развој, Јован Деспотовски, кој посочи дека на вчерашниот состанок биле прецизирани деталите за претстојните активности во насока на целосна реализација. Притоа појасни дека Научно-технолошкиот парк ќе има три столба, односно првиот ќе значи поддршка на процесот на дигитализација, вториот столб е делот за трансфер на технологија, а третиот е акцелерација на стартап-компании.
На денешниот настан беше презентиран севкупниот концепт на научно-технолошкиот парк, а присутните, меѓу кои претставници на релевантни институции, факултети и стопански комори, имаа можност да дискутираат и дадат свои предлози до конечна финализација на проектот, во којшто е вклучен и тим од меѓународната консултантска фирма „ДАИ“, како и претставници на делегацијата на Европската Унија во државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
В недела посебен сообраќаен режим во Скопје
Министерството за внатрешни работи известува дека на 31.3.2024 (недела), со почеток во 9 часот, поради одржување атлетска трка на 10 км, со траса на движење од долниот паркинг на Средно Водно по регионалниот пат (Р2138) до паркингот на манастирот „Св. Пантелејмон“ и обратно, Единицата за безбедност на патниот сообраќај при СВР Скопје ќе преземе мерки за посебен режим на сообраќај, при што сообраќајот ќе се пренасочува по околните сообраќајници.
Министерството за внатрешни работи апелира до граѓаните да ги почитуваат наредбите што ги издаваат полициските службеници на сообраќајниците на кои ќе се одвива настанот.
Македонија
Левицата: Решението за градба кај болничкиот комплекс Воена болница да се поништи веднаш
„Го повикуваме градоначалникот Стевчо Јакимовски да ги почитува законите и да го поништи Решението за градба на 17-катницата кај Болничкиот комплекс „Воена болница“, истакнуваат од Левица.
Потсетуваат дека политичката партија Левица повеќепати укажа на штетноста од градбата на повеќекатницата на истата локација, паралелно организираше протест на којшто граѓаните јавно го искажаа незадоволството од своеволието на градоначалникот и инвеститорите за противзаконската одлука на истите да почнат со градба на зграда за којашто немаат законска дозвола.
„Од пред неколку дена е правосилно Решението со кое се поништува незаконски позитивното конзерваторско мислење, кое се обидоа да го издејствуваат инвеститорите, а истото, по наши сознанија, е пристигнато во Општината на 21.3.2024 година, по што градоначалникот треба веднаш во законски рок да постапи по истато. За жал, Решението за градба уште не е поништено.
Од општинската администрација не даваат одговори по однос на прашањето по Решението со кое се одбива жалбата на инвеститорите, но успеавме да го добиеме, бидејќи е информација од јавен карактер“, дообјаснуваат од оваа партија.
Го повикуваат градоначалникот Стевчо Јакимовски во пресрет на изборната претседателска кампања да се одважи, како што велат, да ги испочитува законите и да го поништи Решението за градба веднаш, како би докажал пред граѓаните дека, навистина, ги застапува нивните интереси“.
Македонија
Инспектори затекнале диви менувачници на Бит-пазар, но наместо да ги запечатат, им дозволиле да работат
Полицијата поднесе кривична пријава против шест инспектори, вработени во Државниот пазарен инспекторат, и тоа: С. Б. (32), Ј. Р. (54), В. М. (47), Б. С. (46), С. С. (61) и Р. Б. (37), сите од Скопје, поради злоупотреба на службената положба и овластувањето.
Во текот на март и април 2023 година, вршејќи контрола кај три менувачници, лоцирани во близина на Бит-пазар, а за кои било утврдено дека не биле регистрирани како фирми и не поседувале лиценци издадени од НБРМ за вршење менувачко работење, но подолг временски период работеле како менувачници, инспекторите на затекнатите лица во дивите менувачници биле должни да им изречат решение за забрана за вршење дејност, да им ги запечатат објектите, да им ги одземат предметите, опремата и средствата со кои е направен прекршокот, како и да им изречат глоба во износ од 1.000 до 20.000 евра во денарска противвредност.
Но, пријавените пазаришни инспектори ги прекршиле сите одредби од наведениот закон и во три извршени вонредни инспекциски надзори на затекнатите лица во сите три објекти како менувачници ниту им издале решение за забрана за вршење нерегистрирана дејност, ниту им ги запечатиле просториите во кои ја вршеле противзаконската активност, ниту им ги одзеле средствата, предметите и опремата со кои е направен прекршокот ниту, пак, им изрекле глоба во износ од 1.000 до 20.000 евра.
Напротив, во сите три извршени вонредни надзори на сите три менувачници на секој од сопствениците им изрекле еднократна глоба во износ од 80 евра во денарска противредност и ги оставиле и понатаму менувачниците редовно да работат, со што постапиле спротивно на законот за забрана и спречување вршење нерегистрирана дејност и со неизвршување на својата службена должност го сториле кривичното дело злоупотреба на службената положба и овластувањето.