Македонија
Таткото на Боки 13 во случајот „Меѓународен сојуз“: Ме правите криминалец на 60 години
Заменик-претседателката на Меѓународниот сојуз – Јасна Мандиќ, таткото на Бојан Јовановски – Миле Јовановски, асистентката на Јовановски – Кристина Блажевска, пратеничката Фросина Ременски, како и самиот Бојан Јовановски пред судот се изјаснија дека не чувствуваат вина во случајот „Меѓународен сојуз“, кој го води обвинителката Вилма Русковска, а во кој се сомничат за дела измама и перење пари и други приноси од казниво дело.
Откако на самиот старт обвинителката Русковска го извести судот дека републичкиот обвинител Љубомир Јовески го отфрлил барањето на обвинетите Ременски и Јовановски, таа даде и воведен збор пред судечкиот совет. Според Русковска, хуманитарната организација „Меѓународен сојуз“ функционирала со лаги и била лажно прикажана дека е под покровителство на Европската Унија. Таа кажа дека парите кои биле земани од бизнисмените Адријан Амзоски и Силјан Мицев за наводни проекти за старски домови биле уплаќани на сметките на згаснатата „1ТВ“ и „БМЈ медија груп“ од страна на Миле Јовановски и Јасна Мандиќ, кои беа дел од сопственичката структура на двете фирми.
„Обвинителството има несоборливи докази за сите обвинувања и пред судот ќе ја докаже вината на сите обвинети, кажа Русковска во воведните зборови.
Таткото на Бојан, обвинетиот Миле Јовановски, пред судот кажа дека ништо од тоа што го кажала Русковска не е точно.
„Не разбирам. Ме правите криминалец на 60 години“, коментира Јовановски по што беше прекинат од судијката Софче Гаврилова-Ефремова, која му кажа дека не треба да коментира, туку само да каже дали чувствува вина или не.
Според обвинението, Бојан Јовановски како претседател на Меѓународен сојуз имал намера за себе да прибави имотна корист, па користеjќи документи од сојузот, оштетил управители на друштва, со што ги довел во заблуда. Јовановски лажно прикажувал дека ќе обезбеди државно неизградено земјиште за изградба на европски центар за возрасни лица и мобилен сервис, како и субвенции од државата, па оштетените преку Македонската авторска агенција му исплатиле 719.905 евра, односно 233.821 евро во денарска противвредност.
Во измамата на Бојан Јовановски, според Обвинителството, му помагале пратеничката Фросина Ременски, неговата заменичка – Јасна Мандиќ и асистентката. Мандиќ и асистентката ги изготвувале договорите, ги подигале уплатените пари и му ги давале на Јовановски. Иако знаејќи од каде потекнуваат парите, односно дека се земени со сторено кривично дело, тие со умисла му помагале и да ги пушти во промет.
Обвинителството го сомничи Миле Јовановски дека тој знаел од каде потекнуваат парите и со умисла му помогнал на својот син Бојан Јовановски да ги пушти во оптек, со што ги уплаќал парите на своја девизна сметка, а дел од нив ги уплаќал на правните лица како заем.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Центар со стратешки план ќе ги дефинира приоритетите за енергетска транзиција
Потребна е стратегија и патоказ за да имаме одржлив процес за енергетска транзиција во Општина Центар, ова е заклучокот од денешната работилница што се одржа во Енергетската канцеларија во локалната самоуправа. На работилницата на која учествуваа експерти, претставници на невладини организации, преставници на Општината и општинското претпријатие Енергија центар, соговорниците дискутираа за актуелните проекти во доменот на енергетиката, зелената агенда, животна средина и др.
Градоначалникот Герасимовски презентираше до каде е Општината во процесот на енергетска трансформација и транзиција. Тој потенцираше дека фотоволтаичната централа поставена на градинката Пепелашка минатото лето дава одлични резултати во намалување на трошоците за електрична енергија, а следно е поставување на централа врз покривот на ООУ ,,Киро Глигоров”. Наша цел е да поставиме фотоволтаични системи на сите основни училишта, но засега почнуваме прво со ООУ „Киро Глигоров“. Мораме да бидеме претпазливи и внимаваме на секој детаљ. Засега сме во процес на јавен тендер и фирмите учесници треба да ги исполнат критериумите.
Вангел Андрески, директор на Енергија Центар ја потенцираше улогата на првото вакво претпријатие во државата за производство и продажба на електрична енергија од обновливи извори.
„Со поддршка на Фондацијата „Фридрих Еберт“ успеавме да формираме вакво претпријатие, а процесот беше макотрпен и понекогаш фрустрирачки, со многу докуменатција, барања за куп дозволи по разни институции. Сега кога веќе започнавме со работа се соочивме со нов проблем, а тоа е потреба од едукација и подигање на свеста на граѓаните за придобивките на фотоволтаиците и нивната безбедност за корисниците, истакна Андрески, зборувајки за проектот кој се планира за ООУ ,,Киро Глигоров”.
Експерите се согласија дека иднината е токму во енергетската транзиција и трансформација која треба да почне од локално за да се прошири на национално ниво. Заштедите, но и бенефитите за животната средина се од непроценлива важност за воведување на вакви „зелени“ енергетски системи, но за разлика од другите држави во ЕУ и регионот, ние сме се уште во пионерска фаза.
Сите заштедени средства, велат експерите, по теркот на европските држави, понатаму треба да се влеваат во проектите од доменот на животната средина, преку субвенции за здрав и еколошки начин на живот на граѓаните.
Денешната работилница ,,Патоказ за енергетска транзиција – дефинирање на стратешки пристап кон одржлива иднина на Општина Центар” се организираше под покровителство и соработка со Фондација Фридрих Еберт, невладината Гринер и Општина Центар.
Македонија
Бојмацалиев во ЕВР Карпош: МВР е подготвено да обезбеди мирен, фер и демократски изборен процес
Денеска, дополнителниот заменик-министер за внатрешни работи, Митко Бојмацалиев, оствари работна посета на Единицата за внатрешни работи Карпош, каде што оствари средби со раководството на оваа организациска единица во склоп на СВР Скопје, а во рамките на серијата посети во секторите за внатрешни работи во државата со цел увид во резултати и планирање на идните активности.
Фокусот на средбата беа претстојните двојни избори што ќе се одржат периодов за што дополнителниот заменик-министер, Митко Бојмацалиев, пред раководството на ЕВР Карпош констатира дека МВР во рамките на своите надлежности од досегашните средби и разговори со раководствата во секторите е подготвено да обезбеди мирен, фер и демократски изборен процес како што беа претходните.
Притоа тој ги сподели резултати за првото тримесечје од 2024 година.
„Бев информиран за резултатите во областа на криминалитетот, каде што во првото тримесечје од 2024 година безбедносната состојба на подрачјето може да се оцени како поволна со намалување на кривичните дела по службена должност од 40 %. Од областа на криминалитетот на подрачјето на ЕВР Карпош, според статистиката за горенаведениот период, бележиме намалување за 30 % во делот на кривичните дела од имотни деликти, како што се тешките кражби, кражби и џепни кражби“, истакна Бојмацалиев додавајќи дека раководството го информира дека ова се најдобрите резултати во последните 10 години постигнати во 2023 година.
Во однос на условите за работа во оваа единица Бојмацалиев истакна дека станицата беше реконструирана во 2022 година во насока на создавање подобри услови за работа на полициските службеници, со вложени 21 милион денари обезбедени од буџетот на МВР.
„Динамично тргнавме во процесот на надминување на претходните негативни состојби на овој план со јасно одредена цел – да воспоставиме модерни инфраструктурни стандарди на функционирање како на полициските службеници така и на нивните средства за работа, на објектите и на нивната опременост“, рече Бојмацалиев при посетата на ЕВР Карпош.
Македонија
„Вреди“: ДУИ во руско сценарио бара лек за изборниот пораз
Навреме предупредивме дека очајниот ДУИ смислил сценарио за предизвикување политичка криза после првиот круг на претседателските избори со цел да избегне чесно признавање на извесниот пораз. Нивен сон е техничката Влада на Талат Џафери да опстои повеќе од предвидените 100 дена, велат од коалицијата „Вреди“.
„Бујар Османи избегнува одговор на многу логичното прашање што правел како претседавач со ОБСЕ во текот на 2023 за оваа меѓународна институција да оцени дека постои потенцијал за нарушувањето на безбедноста во изборниот процес и го зголеми бројот на набљудувачи. Исто така молчи дали Османи како домаќин на Лавров го прашал за рецептот за суспендирање на демократската волја на граѓаните.
Но, контурите на ова руско сценарио полека излегуваат на виделина. Владата на Талат Џафери незаконски спречува поставување на началник и дополнителен началник на СВР Тетово за да може да ги злоупотребува партиските војници на ДУИ инсталирани во полицијата во кампањата. Потврда за ова е последниот скандал со училиштето во Житоша кое не само што е претворено во штаб на ДУИ, туку во него полицајци отворено агитираат за Али Ахмети, се фотографираат и објавуваат на социјалните мрежи“, реагираат од коалицијата.
Очекуваат како што велат, дека раководството на МВР соодветно ќе ги евидентира и санкционира овие девијации од страна на полициски службеници.
„Јасно им порачуваме на полициските службеници и останати кадри на ДУИ во државните институции, добро да размислат какви партиски задачи прифаќаат и спроведуваат. Ништо не може да ја смени реалноста. ДУИ после осми мај преминува во опозиција и за секој нивен кадар кој се огрешил пред законите ќе следи соодветна правосудна постапка. Добро е секој партиски активист на ДУИ да размислува трезвено и да не се впушта во незаконски авантури лажно верувајќи дека ќе продолжат кариерите на Али Ахмети, Бујар Османи и Артан Груби.
Знаеме дека исплашеното раководство на ДУИ и нивните коалициони другарчиња се подготвени на различни предизборни далавери, но треба да земат предвид дека на секој обид за спречување на слободно, фер и демократско гласање на Албанскиот народ, жестоко ќе одговориме“, додаваат во партиското соопштение.
Нагласуваат дека ништо не може да ги спречи промените. Гласачите, како што оценуваат, уште повеќе се мотивираат да гласаат против ДУИ кога ги гледаат овие нивни очајнички потези.
„Бранот е тргнат и тој секојдневно ќе расте додека не се претвори во цунами за ДУИ на изборите“, се потенцира во напишаното од коалицијата „Вреди“.