Во однос на бегството на поранешниот партиски лидер, Никола Груевски, портпаролот на ВМРО-ДПМНЕ, Наум Стоилковски, денеска кажа дека партијата не се согласува со самото заминување и дека тоа не е опција дури и кога сите знаат дека се работи за политички прогон. Како што рече тој, така се загрозуваат и другите лица кои исто така се цел на тој прогон.

„Денес јасно се покажува дека ВМРО-ДПМНЕ е под политички инструирана полициска опсада само заради евтин политички театар кој се случи поради покривање на сопствената немоќ и неспособност на власта“, рече портпаролот на опозициската партија.

Според него, со претресот со кој се бараше осудениот поранешен партиски лидер, Груевски, беспотребно се вознемирувале членови и симпатизери на ВМРО-ДПМНЕ и биле претресувани недолжни граѓани, без налог и без посебна наредба која, како што рече, никогаш не била презентирана во јавноста.

„Од фотографии достапни во јавноста се гледа дека спротивно на закон, беше ангажирана и воена полиција која е под надлежност на министерството за одбрана со која раководи министерката Радмила Шекеринска. Се покажа дека она што треба да бидат професионални институции работеа под чисто политички диктат. Политичкиот притисок и прогон е евидентитен. Мотивите се политички и средствата што се употребуваат се политички. Прогонот се прави врз лица на партија кои се следени, прислушувани, под константен притисок“, посочи Стоилковски.

Исто така тој нагласи дека Оливер Спасовски и Зоран Заев треба да одговорат кого лажат и кого замајуваат.

„Тие имајќи ги во раце неограничените ресурси на државната безбедност и под едни вакви услови сакаат и уште сакаат лажно да прикажат дека не знаеја, или не знаат за движењето на Никола Груевски? Тоа е дилема која треба тие да ја одговорат“, рече партискиот портпарол.

Општинскиот комитет на ВМРО-ДПМНЕ при Ѓорче Петров преку советничката група на ВМРО-ДПМНЕ и коалицијата „За подобра Македонија“, денеска поднесе барање за надополнување на дневниот ред на наредната седницата на Советот на Општина Ѓорче Петров, изјави Бојан Стојаноски од ВМРО-ДПМНЕ.

„Бараме од буџетот на Општината, наместо ненаменски да се трошат средства, да се определи ставка за финансиска поддршка на бранителите учесници во конфликтот во 2001 година кои живеат на територијата на Ѓорче Петров.

Бараме на дневен ред да се стави точка: финансиско олеснување на обврските на кои подлежат бранителите учесници и нивните семејства што учествуваа во конфликтот во 2001 година во Република Македонија.

Поточно финансиско олеснување за:
– ужина и екскурзии во училиштата,
– стипендии за младите,
-поддршка при изработка на елаборат за легализација,
– ослободување од комуналии за градба,
– ослободување за надоместок за градинка,
– ослободување од ѓубрарина во руралниот ден на општината.

Во согласност со процедурите, сакам да истакнам дека ВМРО-ДПМНЕ целосно ќе го сработи предлогот и сите овие барања дополнително ќе бидат вметнати во амандманската расправа за формирање на буџетот на Општината за 2019 година“, истакна Стојаноски.

Од Демократската фракција на ВМРО-ДПМНЕ велат дека се згнасени од политичките игри во кои на најголемите злосторници им се овозможува да избегаат неказнети пред лицето на правдата, алудирајќи притоа на бегството на осудениот експремиер Никола Груевски.

„Сето ова е добро реализирана режија од спрегата обвинет – највисоко политичко раководство – судство – полиција. Срамно е за една држава за рок од помалку од една година четворица осудени да побегнат од лицето на правдата и за тоа никој да не одговара“, наведуваат од Демократската фракција.

Според нив, ова е јасен показател дека власта и обвинетите имаат, како што велат, одличен „дил“ за меѓусебно негонење.

„Господине Заев, како прв човек на извршната власт срамно е и понатаму да молчите и да не барате кривична и морална одговорност од вашите соработници и судските функционери. Вашето молчење и непреземање мерки е знак за Ваше соучесништво во ова најголемо злосторство во последните двесетина години. Немојте да мислите дека и Вие ќе поминете неказнето поради вашето премолчување за целокупната правна и морална рашомонијада и за девалвирањето на државата. Правдата е бавна, ама достижна и за Вас“, се наведува во соопштението во делот каде што од Демократската франкција се обраќаат директно до премиерот.

Обраќајки се до премиерот, оттаму порачуваат и дека не е дозволиво неговата партија и неговите блиски соработници, како што велат, со манипулации и спинувања да бараат и да ја префрлаат вината врз претседателот на државата, кој во оваа ситуација, според нив, е настрана од овие процеси.

„Доколку имате поинакви сознанија за неговото замешателство, тогаш слободно изнесете ги пред јавноста тие сознанија за да му суди народот, а не корумпираното судство под Ваша контрола“, порачуваат од Демократската фракција.

Исто така, ја повикуваат партијата ВМРО-ДПМНЕ безусловно и во најкраток можен рок да се огради и да му ја одземе титулата почесен претседател на, како што велат, бегалецот Никола Груевски.

„Мицкоски може лично да има морална обврска и почит кон својот ментор, но партијата во своите редови не смее да има вакви лажни патриоти, кукавици, бедници и криминалци, кои ја девалвираат и понижуваат партијата и државата и ги оставаат најблиските соработници на цедило“, сметаат од Фракцијата.