Во која земја бегалец од правдата откако ќе биде вратен, завршува со домашен притвор и низа други екстра поволности, реагира преку соопштение, опозициската ВМРО-ДПМНЕ за случајот со Сашо Мијалков.

„Циркусот кој што го приреди власта на Заев во содејство со правосудните органи под негова контрола, покажа уште еднаш дека во Македонија не владее правна држава, туку мафијата и криминалот. Бегството на Мијалков и неговото враќање е само една обична театарска претстава која не поминува веќе ни кај членовите на СДСМ“, велат од оваа партија.

Според нив, целиот договор, заедно со анексите е разобличен од јавноста и сите знаат, како што велат дека се работи за евтин пазар со правдата, нешто кое што Заев, според нив во континуитет го прави.

„Резултатите од таквиот договор се наѕираат и јавноста ги претпоставува. Затоа е нервозата кај власта толку голема. Затоа се хаотични во своите постапки, па час распишуваат потерници, час се жалат на системот, час глумат одлучност, час симнуваат телесна температура, час зборуваат за координирани акции. Вистината е дека реакцијата на јавноста и други фактори влијаеа да се пишманат и да се предоговараат“, велат од опозициската партија.

„Зоран Заев покажа дека е врвот на коруптивната и мафијашката пирамида во Македонија, а неговата единствена улога е да координира меѓу криминалните релации“, се додава во соопштението од ВМРО-ДПМНЕ.

Мнозинство во Собранието е 61 пратеник, а не 39 колку што се потпишаа за поддршката на губтиникот Мицкоски, велат во соопштение од СДСМ и додаваат дека парламентарното мнозинство е стабилно и тоа може само дополнително да расте.

„Бројот на пратеници на Мицкоски во Собранието варира од 39, колку што се потпишаа зад неговата поддршка, и 53 пратеници од целата опозиција во парламентот, кои гласаа за интерпелација на вицепремиерот Никола Димитров. Тоа е далеку од парламентарно мнозинство и со вакви математики Мицкоски треба да се врати во основно образование и да престане да шири лаги во кои не веруваат ниту во неговата партија“, нагласуваат од владејачката партија, од каде што му порачуваат на лидерот на ВМРО-ДПМНЕ да сфати дека 100 пати повторена лага не може да стане вистина.

Советничката група на ВМРО-ДПМНЕ за Град Скопје со реакција за одлуката на градоначалникот Петре Шилегов за менување на имињата на улиците.

„Менувањето на имињата на улици се прави на насилен пат, без квалитетна јавна дебата и со многу политика. Од ветениот зиплајн, луна-парк, нови булевари, подземни сообраќајници, тунел под кале, Шилегов спадна  главен проект да му се имиња на улици како Социјалистичка зора наместо Христо Батанџиев, 4 јули наместо Борис Сарафов, Бихакќа наместо Павел Шатев, Иво Лола Рибар наместо Теодосиј Гологанов“, реагираат од опозициската партија.

Од ВМРО-ДПМНЕ објаснуваат дека нивната партија бараше повлекување на предлозите за имиња на улици и нивна разработка со сите надлежни фактори и вклучување на општествени авторитети, градски јавни личности, и институтот за историја при Универзитетот „Св. Кирил и Методиј“.

„Шилегов овој предлог го одби. Предлозите за менување на имињата на улици сега чекаат одобрение од владата чиј идеен творец е. Апелираме истите да не се прифатат и да се прифати општествена јавна расправа“, стои во соопштението од ВМРО-ДПМНЕ.