Нервозни реакции доаѓаат од белиот дворец во моменти кога, според информации во медиумите, на распит за случајот „Рекет“ е повикан еден од осомничените, Зоки Кичеец, велат од владејачкиот СДСМ.

„Денеска кулминира нервозата во ВМРО-ДПМНЕ. Фрчат лажни вести, панични изјави, прес-конфернции“, се наведува во партиското соопштение во кое од СДСМ прашуваат дали нервозата во опозициската партија има врска со распитот на Зоран Милески.

Од таму додаваат дека ваквиот заклучок е уште пореален доколку се земе предвид дека Христијан Мицкоски пред неколку дена, како што велат, јавно признал дека се сретнал токму со Зоки Кичеец.

„Остана неодговорено прашањето што разговарале Мицкоски и Кичеец и дали нешто му дал? Ако му дал, што е тоа? Но, нервозата и паничните реакции на ВМРО-ДПМНЕ нема да им помогнат на оние што ги чека соочување со правдата“, истакнуваат од СДСМ.

Не се точни тврдењата дека се менува влезот на Трнодол, како што не беа точни ниту тврдењата дека на т.н. чатал ќе се гради нова зграда или, пак, дека каналот ќе се затвори, велат од скопската Општина Карпош.

„Токму денешната изјава на двајца од претставниците на граѓани од Трнодол е потврда за промените во начинот на носењето на детаљните урбанистички планови во Карпош.
Денеска, граѓаните имаат можност да ги посочат своите забелешки и предлози уште на почетокот кога се носи одреден ДУП, нешто што, за жал, не претставуваше пракса во минатото“, наведуваат општинските власти.

Од таму додаваат дека поканата за јавна презентација била објавена транспарентно, без намера нешто да се скрие.

„Затоа и посетеноста на првата јавна презентација беше голема, но, за жал, не постоеја услови и работна атмосфера за детаљно, од стручните служби, да се образложат дилемите што ги имаа засегнатите граѓани“, образложуваат од Општината.

Од таму ги охрабруваат граѓаните да дојдат и на втората јавна презентација во текот на есента, каде што стручни лица, заедно со претставници од Секторот за урбанизам, повторно ќе го образложат предлог ДУП-от за Градската четврт Ј 03 Блок 7.

Тајкнуните за кои се водат серија предмети пред правосудните органи се создадени од режимот на Никола Груевски, велат од владејачкиот СДСМ, од каде што додаваат дека лицата што се на снимките поврзани со „Рекет“ се блиски до ВМРО-ДПМНЕ.

„Лично Мицкоски призна дека се среќавал со еден од обвинетите во случајот ‘Рекет’, споменатиот Зоран Кичеец“, се наведува во партиското соопштение во кое се додава дека медиумот во кој се објавуваат снимките има линкови со ВМРО-ДПМНЕ и Никола Груевски.

Од СДСМ го повикуваат лидерот на опозициската партија, наместо, како што велат, да се крие за лажни вести, да излезе пред граѓаните и да одговори дали имал тајни средби.

„Дали се сретнал со Никола Груевски во Будимпешта и зошто? Дали се сретнал со итлајанскиот новинар? Дали и што му дал? Дали се среќавал и со други лица во Словенија и со која цел?“, се прашањата за кои од владејачката партија очекуваат одговор од Мицкоски.

Од СДСМ исто така констатираат дека ВМРО-ДПМНЕ како партија останува посветена на одбрана на криминалот на режимот и фабрикување лажни вести.