Mинистерот за правда Бојан Маричиќ ја криел информацијата дека Мијалков ќе бега и помагал да се реализира планот Заев -Мијалков, обвинуваат од опозициската ВМРО-ДПМНЕ.

„Мијалков кој бил помаган од власта, на крај со црн владин ‘пасат’ стигнал до ЈО, од каде правеше циркуз за потребите на Заев и глумеше изненаден. Во режијата на Заев за Мијалков учествувало и ЈО, кое дозволило Мијалков 40 минути откако се пријавил, наместо да оди во куќен притвор да парадира пред камери и да го пере Заев“, стои во партиското соопштение.

Според ВМРО-ДПМНЕ, поради ваквиот скандал, или Русковска треба да си даде оставка или Маричиќ да си оди.

Од владеачката СДСМ потсетуваат дека процесот на попишување на граѓаните започна, а со учество во пописот, како што додаваат од партијата „секој граѓанин придонесува за развој и подобра иднина на државата“.

„Започна попишувањето на одделни категории на лица како што е предвидено во методологијата и од вчера се попишуваат лицата кои за време на пописот се наоѓаат во странство, во служба на Армијата, во казнено- поправни и воспитно-поправни установи, лицата кои се на служба во дипломатско-конзуларните претставништва на Република Северна Македонија и членовите на нивните семејства кои престојуваат со нив, како и бездомните лица“, информираат од СДСМ.

До 21 април ќе се спроведе и самопопишување на дијаспората коешто се одвива електронски, преку веб страницата на Дджавниот завод за статистика.

„Пописот е најважната и најголемата статистичка операција со којашто ќе се обезбедат податоци коишто ја даваат основата за креирање ефикасни јавни политики со цел создавање услови за економски раст и развој, искоренување на сиромаштијата, зголемување на еднаквоста меѓу граѓаните, рамномерен регионален раст и поголема заштита на животната средина“, велат од СДСМ.

Оценуваат дека, „обвинувањата на ВМРО-ДПМНЕ дека Законот е неевропски и собирањето на потписи за наводно одложување на пописот е само лош партиски маркетинг, на којшто граѓаните не смеат да подлегнат“.

Апелираат, граѓаните активно да се вклучат во пописот со што ќе дадат свој личен придонес за подобра иднина на државата .

Дека наскоро ќе стигнат вакцините граѓаните слушаат секој ден, реагираат од опозициската ВМРО-ДПМНЕ.

„И додека Венко Филипче и Зоран Заев велат дека ако е вратен авансот за кинеските вакцини, бројката на заразени се зголемува. Филипче и Заев уште велат ако е вратен авансот, сепак вакцините ќе стигнат наскоро. Но, што значи тоа наскоро? Ништо! Во ситуацијата во Македонија едно е јасно, вакцини нема“, велат од ВМРО-ДПМНЕ.

Од оваа партија додаваат дека „Филипче и Заев не само што покажаа, туку и докажаа дека не се способни и дека не се заинтересирани“ за набавка на вакцини.

„Филипче и Заев тераа одмор минатата година во август додека сите преговараа и договараа вакцини за годинава. За вакцини „ќе има наскоро“, а ги нема, иако сите земји вакцинираат од декември минатата година, одговорност мора да има“, потенцираат од ВМРО-ДПМНЕ.