Костадин Костадинов и СДСМ продолжуваат слепо да го следат Зоран Заев во распродавањето на националните интереси, реагираат од ВМРО-ДПМНЕ, откако портпаролот на владејачката партија денеска обвини дека ВМРО-ДПМНЕ и Мицкоски целосно се загубиле во деструктивноста.

Од опозициската партија прашуваат зошто СДСМ и двоецот Заев – Бучковски молчи и на одговара дали во преговорите со Бугарија е ставена бугарската декларација како основа на новиот анекс.

„Зошто бегаат од одговорот дали историскиот континуитет на македонскиот јазик и народ се дел од преговорите со Бугарија? Дали подготвуваат ретуширање на историјата, газење на антифашистичката борба на македонскиот народ и асномските идеали врз кои е градена Македонија?“, прашуваат од ВМРО-ДПМНЕ.

Според оваа партија, Заев е подготвен на секакви концесии и отстапки за да ја зачува власта бидејќи, како што велат, се чувствува заштитен од одговорност за својот криминал.

Шилегов потроши 4 години мандат и ништо не направи од она што го ветуваше, реагираат од опозициската ВМРО-ДПМНЕ.

Додаваат дека Шилегов пред крајот на мандатот потпишува меморандуми, дава, како што велат, рециклирани ветувања и повторно говори дека нешто ќе направи.

„Вистината е дека Шилегов ќе остане запомнат како најнеспособниот, најарогантен и најнедомаќински градоначалник што Скопје го имало, кој ветувал брда и долини, а зад себе има огромна НУЛА. За волја на вистината, набави едно противпожарно возило со скала, кое чини двојно поскапо од идентично возило набавено од Град Загреб, поставува клупи, кои чинат неверојатни 500 евра за една, и успеал да го зголеми долгот на Град Скопје 8,5 пати“, стои во писмената реакција на ВМРО-ДПМНЕ.

Од опозициската партија посочуваат дека тој е единствениот градоначалник што нема почнато капитален проект во својот мандат, а патем потрошил 4 годишни буџети, кои заедно чинат речиси половина милијарда евра.

Од СДСМ реагираат на обвинувањата на Игор Николов од ВМРО-ДПМНЕ, кој побара да им се зголемат платите на докторите и здравствените работници.

„Тажно е што еден лекар како Игор Николов, кој во време на Владата предводена од СДСМ и министерот за здравство, Венко Филипче, лично ги почувствувал бенефитите во здравството, да лаже и манипулира. Попуст му е обидот на д-р Николов во име на неговата партија ВМРО-ДПМНЕ и за додворување на Христијан Мицкоски да говори лаги! Основната плата на лекарите специјалисти се зголемени 40 %, на медицинските сестри помеѓу 20 и 23 %, на општите лекари 25 %, а на здравствени соработници 15 %.

Во време на ВМРО-ДПМНЕ приватните специјализанти имаа месечни примања од 0, со букви, НУЛА денари. Сега земаат по 30.000 денари месечно, а од јуни почна да им се плаќаат и здравствено осигурување и дежурства. Од март сите вработени во здравството, без разлика дали се медицински или немедицински персонал, добиваат по плус 5 %“ велат од партијата на власт.

Од таму ѝ порачаа на ВМРО-ДПМНЕ дека може да гледа и да учи што значи вистинска грижа за здравствените работници, што значат инвестиции во здравството.