Владата на СДСМ и Заев ја доведоа економијата во Република Македонија пред целосен колапс, велат од ВМРО-ДПМНЕ како реакција на соопштението на СДСМ во кое се наведува дека растот на индустриското производство во 2018 година е највисок во последните седум години.

Од опозициската партија ваквите информации од СДСМ ги оценуваат како обид да се дефокусира јавноста со лажни соопштенија.

„Економијата стагнира, цените се качуваат, а стандардот на граѓаните е во пад. За прв пат државниот долг ја надмина психолошката граница од над 5 милијарди евра, додека пак државниот долг порасна над 4 милијарди евра. ММФ оцени дека растот на БДП во 2018 година ќе биде 2%, што е многу далеку од ветените 5%“, се вели во партиската реакција.

Во неа се додава дека индексот на трошоците за живот во 2018, наспроти 2017 е пораснат за 1,5%, а индексот на цените на мало пораснат е за 2,7% .

„Ова покажува дека СДСМ и Заев на граѓаните им донесоа поголеми давачки и наместо парите да одат кај граѓаните тие одат кај криминалниот картел на власт. СДСМ донесе уназадувања, порази и црнила на секое можно поле. Криминалот, корупцијата, насилството, сиромаштијата и бедата се вистинската слика која што ја донесе СДСМ и Зоран Заев“, велат од ВМРО-ДПМНЕ и додаваат дека време е од владејачката партија да ги извадат розевите очила и да ја видат правата слика.

Растот на индустриското производство во 2018 година е највисок во последните седум години, велат од владејачката партија, нагласувајќи дека успешните економски политики на Владата продолжуваат да даваат реални резултати.

Од таму додаваат дека индустриското производство во 2018 бележи раст од 5,4 отсто.

„По години уназадување, додека државата се наоѓаше во неизвесност и изолација, денес со придвижувањето во процесот на интеграциите, местото во НАТО, економијата е стабилизирана и се движи во добар правец. Покрај индустриското производство, расте и прометот во индустријата, извозот, како и бројот на работници во индустријата“, се наведува во партиското соопштение.

Од СДСМ додаваат дека со влезот во НАТО и интеграцијата во ЕУ, ваквите позитивни трендови дополнително ќе се интензивираат.

Наместо свиткана кичма и антидржавните политики на Заев, државата има потреба од стабилност и сигурност, велат во соопштение од опозициската ВМРО-ДПМНЕ.

Од таму сметаат дека веќе две години како СДСМ е на власт правната држава е дерогирана, па повикуваат СДСМ да си замине, за владеењето на правото да биде повторно воспоставено.

„Криминалните тендери, роднинските врски со високи партиски функционери како услов за вработување во државната администрација, криминалот по улиците, руинираното здравство и образование не смее да продолжат да бидат наше секојдневие“, посочуваат од партијата и додаваат дека Заев откако ја завил во црнила државата, побегнал од предвремени парламентарни избори.

Од ВМРО-ДПМНЕ повикуваат дека граѓаните треба масовно да излезат и да гласаат на претстојните претседателски избори, за му дадат, како што велат, жолт картон на СДСМ и да му го покажат местото на буништето на историјата, каде што од партијата сметаат дека нивните ривали ќе завршат на следните парламентарни избори.