По повод акцијата „Лето за Македонија“, Силвана Ангелевска, член на Извршниот комитет оствари средба со граѓаните на општина Струга.

Ангелевска потенцираше дека на средбата со граѓаните разговарале за, како што рече, штетните политики кои ги спроведува ненародната власта на Зоран Заев, со посебен акцент на штетниот договор потпишан од СДСМ со јужниот сосед, Република Грција.

„Посетивме семејство кое што е потомок на Браќата Миладиновци, човек кој што е малтретиран, затворан за Република Македонија, за она кое што ние денес го имаме, независна и самостојна Република Македонија. Затоа луѓето беа посебно емотивни за она што денеска сед прави моментално со нашата држава, вели Ангелевска“, рече таа.

Ангелевска смета дека овој договор е штетен бидејќи со него се губи идентитетот и историјата, односно како што рече таа во членот 8 од самиот договор била предвидена Комисија која ќе ги анализира историските настани на Република Македонија и Република Грција, додавајќи дека и покрај тоа што има уште неколку дена до референдумот Комисијата веќе била формирана.

Ангелевска истакна дека граѓаните се разочарани од владата на СДСМ, од колапсот во економијата, во здравството, образованието, а на сметка на ова корупцијата и скандалозните афери на доделување на криминални тендер од милионски суми цветаат.

На крај Ангелевска го повтори ставот на ВМРО-ДПМНЕ дека е против, како што рече, капитулантскиот договор и порача дека секој граѓанин треба да се води од сопствените чувства и на 30 септември да се однесува она како што налагаат нивните чувства.

Таа упати јавен повик до сите граѓани в недела во 13 часот во Охрид да излезат на протесниот марш.

Десетици милиони евра расипнички се фрлаат за Зоран Заев да го покрие капитулантскиот договор и да го оправда прифаќањето на грчките линии, наведуваат во соопштение од опозициската ВМРО-ДПМНЕ.

Оттаму додаваат дека граѓаните сами ги плаќаат со десетици милиони евра манипулациите на Заев со кои, како што велат, се обидува да ги убеди дека е добро да се самоукинат и да ги сменат името, идентитетот, културата, традицијата и историјата кои ги наследиле од нивните претходници.

„Власта не запира со расипништвото, СДСМ вчера ја задолжи државата за нови 57 милиони евра. Владата се расфрла и купува гласови со пари на граѓаните, а веќе стигнуваат ратите за исплата од кредитите кои истите ги позајми пред година дена. Милионите задолжувања се редат, а во реалноста не гледаме каде завршуваат парите. Нема проекти. Капиталните инвестиции се на децениско најниско ниво од 21.33% за првите 7 месеци од годината. Никој во државата не знае на што се трошат позајмените милиони, за кои годишно плаќаме огромни камати“, стои во партиското соопштение, во кое се додава дека со СДСМ на власт јавниот долг за првпат во историјата на државата надминал 5 милијарди евра, а државниот 4 милијарди.

Од опозициската партија истакнуваат дека доколку ова темпо продолжи на среден рок, се доведува во прашање ликвидноста на државата.

Знам дека Кратово, како и цела Македонија, ќе донесе вистинска историска одлука за европска Македонија. Ова е неповторлива шанса и еден од оние моменти кога во прашање е што ние може да направиме за државата, порача премиерот Зоран Заев на трибината во Кратовo.

„Преку вас да допреме до сите, ова е моја, ваша и нивна Македонија, нема веќе причини, изговори, план Б или Ц. На Македонија ѝ треба економски раст, мора да направи квантен скок за да се крене стандардот. Македонија мора да носи одлуки. Поради калкуланството изминатите години, земјата остана во калта, додека светот стана глобално село, ние во кавги со соседите, никако да донесеме одлука. Оваа одлука што ја донесов не е затоа што Владата и парламентот застанаа зад мене, туку затоа што знам кој стои зад мене, дека зад мене стои мојот народ, кој сака живот овде во Македонија“, додаде Заев.

Тој пред присутните ги објасни придобивките од договорот од Преспа, кои, како што рече, вклучуваат осигурена држава, македонски идентитет и македонски јазик.

„Од Кратово, утре одам во Вашингтон на состанок со потпретседателот на САД, Пенс. Ваквото пријателство мора да го почитуваме, не смееме да го изневериме заради нас и нашата држава. Мора на 30 септември сите да излеземе“, рече премиерот во свoето обраќање.

По гласањето на референдумот, вратете се дома, гушнете си ги децата и знајте дека сте донеле државотворна историска одлука и за вашата земја и за вашите деца, повика претседателот на СДСМ и премиер на трибината во Кратово.