Според опозициската ВМРО-ДПМНЕ, Македонија трпи закани, а Заев не е способен да го спроведува Уставот и да го заштити територијалниот интегритет и суверентитет на Македонија, реагираат од оваа партија.

„Зоран Заев и СДСМ ја доведоа Македонија во подредена и понижувачка состојба со Бугарија. Заканите за интервенции на бугарски разузнавачки служби на територијата на Македонија од страна на Румен Радев се директна вина и одат на контото на Зоран Заев, кој ја понижи државата и ја клекна на колена“, истакнуваат од опозициската партија.

Според нив, владеењето на Заев, како што велат, сериозно го поткопува принципот на суверенитет гарантиран со меѓународното право.

„Владата треба најитно да го осуди однесувањето на Радев, Захариева и другите бугарски политичари, кои се закануваат врз интегритетот на државата. Владата треба веднаш да ги извести сите меѓународните претставници во Македонија, ЕУ и НАТО за однесувањето на Радев, во спротивно Заев ќе биде директно виновен за поткопувањето на суверенитетот на државата и ќе сноси одговорност во иднина“, додаваат од ВМРО-ДПМНЕ.

Според лидерот на ВМРО-ДПМНЕ, Христијан Мицкоски, новиот бран на коронавирусот и неспособната Влада, како што ја нарекува, се гаранција дека или ќе биде одложен пописот на резидентното население или ќе биде уште еден неуспешен обид на Владата.

„Оваа Влада не е способна прегорена улична светилка да смени, а не да организира сложена статистичка операција – попис. Уште при првиот ден на евидентирање на дијаспората се случи крах на апликацијата, првин падна системот, слично како и училишниот онлајн-систем, а потоа во него можеше да се попише кој било со лажни и измислени податоци“, реагира Мицкоски преку статус на социјалните мрежи.

„Се покажа дека од дијаспората може да се попише секој граѓанин што живее во Македонија, а тоа докажува дека Владата и Заев, како и за сѐ друго, не се способни да спроведат каков било процес. Не би ме зачудило ако на крајот се евидентираат неколку десетици милиони нашинци од дијаспората. Полека но сигурно пред очи имаме уште еден циркуз“, пишува Мицкоски.

Додава дека пописот во Македонија е закажан да почне на 1 април.

Но, она што се случува со евидентирањето на дијаспората е електронскиот метод, кој, како што вели, е методологија што ја има предложено неговата партија.

„Мојот повик за евидентирање на дијаспората се однесува на регистрирање на државјанствата и тие не влегуваат во резидентното население. Оттука, треба да престанат сите спинови, подметнувања и манипулации на Владата. До почетокот на пописот во Македонија, 1 април, има можност, а ние ќе поднесеме закон за поништување на пописот. Овој закон што ќе го поднесеме, покрај потписите на пратениците поднесувачи, ќе го има кредибилитетот и на над 100 илјади граѓани што се потпишаа со име и презиме за запирање на пописот“, стои во писмената реакција од Мицкоски.

Mинистерот за правда, Бојан Маричиќ, ја криел информацијата дека Мијалков ќе бега и помагал да се реализира планот меѓу Заев и Мијалков, обвинуваат од опозициската ВМРО-ДПМНЕ.

„Мијалков, кој бил помаган од власта, на крајот со црн владин ‘пасат’ стигнал до ЈО, од каде што правеше циркуз за потребите на Заев и глумеше изненаден. Во режијата на Заев за Мијалков учествувало и ЈО, кое дозволило Мијалков 40 минути по пријавувањето, наместо да оди во куќен притвор, да парадира пред камерите и да го пере Заев“, стои во партиското соопштение.

Според ВМРО-ДПМНЕ, поради ваквиот скандал, или Русковска треба да си даде оставка или Маричиќ да си оди.